پایتەخت
خالد علی سلێڤانەیی
ناهەژیت ب مۆشەكا
نا ترسیت ژ چ چەكا
نێ پێشتر ژی گەلەكا
كرن بزاڤێن بێخیر
هەر خۆراگر ما هەولێر
:: :: ::
وەك كەلها خۆ دێرینە
ژناڤبرنا وێ نینە
تێكدا ژیان و ڤینە
ب خەلكێ خۆ یێ دلێر
هەر خۆراگرە هەولێر
:: :: ::
هێما مە ئەو پایتەختە
مەتالا رۆژێن سەختە
چەند دوژمن ژی بێبەختە
دێ بەردەوام بن حنێر
هەر خۆراگرە هەولێر
:: :: ::
ڕۆژ بۆ ڕۆژێ گەشترە
ژیانبەخش و خوەشترە
دوژمن ژی روی رەشترە
چ ل ژۆر و چ ل ژێر
هەر خۆراگرە هەولێر
:: :: ::
كاروان قەد ناراوەستیت
بەردەوام دێ پێشڤە چیت
بۆ ئارمانجێ بەرهەڤ بیت
شێر ژی دێ هەر مینن شێر
هەر خۆراگرە هەولێر
:: :: ::
نفشێ رۆژێ زندیە
ژ ڕیشال رۆناهیە
رابۆری و سوباهیە
بها وەك ئەلماس و زێر
هەر خۆراگرە هەولێر.
