پایسكلڤانێن دهۆكێ ئه‌نجامێن دلخوه‌شكه‌ر ل ئیماراتێ ئینا
ئه‌ڤرۆ،
چار یاریزان و راهێنه‌ره‌كێ پارێزگه‌ها دهۆكێ ل گه‌ل هه‌لبژارتیێ ئیراقێ شیان ئه‌نجامێن دلخوه‌شكه‌ر بینن و وه‌هبی سلێمان یێ ئێكی ده‌ستڤه ئینا ژ چارچووڤێ هه‌ڤڕكیێن قاره‌مانیا عه‌ره‌بی بۆ یاریا پایسكلان ل سه‌ر ئاستێ ژیێن جودا ئه‌وا نوكه یاریێن وێ ل باژێرێ شارقه یێ وه‌لاتێ ئیمارات دهێنه كرن.
ل سه‌ر ئاستێ پێشكه‌فتیان هه‌ردو یاریزانان سه‌ربه‌ست عه‌بدوللا و نه‌وزاد مسته‌فا شیان میدالیا برۆنزی ب ده‌ستڤه بینن و رێزا سێیێ بهێن بۆ به‌ریكانا 69كم لسه‌ر شێوازێ دژی ده‌مژمێرێ بۆ ماوێ ئێك ده‌مژمێر و 33 خوله‌ك و هه‌شت چركان، ئه‌وا هه‌لبژارتیێ ئیمارات و جه‌زائیر ل رێزێن ئێكێ و دویێ هاتین.
ل سه‌ر ئاستێ لاوان هه‌ردو یاریزانێن دهۆكێ وه‌هبی سلێمان و سیداد سه‌لام رێزا چارێ هاتن، سه‌رباری رێزبه‌ندیا هه‌ردو یاریزانێن پارێزگه‌هێ د ماوێ به‌ریكانێ دا لێ گیرۆبوونا هه‌ردو هه‌ڤالێن وان كارتیكرن ل سه‌ر ئه‌نجامێ گشتی كر، ژلایێ خوه‌ڤه وه‌هبی سلێمان بۆ یاریزانێن تاك ریزا ئێكێ ب ده‌ستڤه ئینا و ب میدالیا زێری هاته خه‌لاتكرن.
ل سه‌ر ئاستێ تازه‌پێگه‌هشتیان راهێنه‌رێ دهۆكێ تارق سه‌عید وه‌كو راهێنه‌رێ هه‌لبژارتیێ ئیراقێ شیا تیما خوه به‌ر ب رێزا سێیێ ببه‌ت بتنێ چه‌ند چڕكه‌كێن كێم ژ ناسناڤی دووركربوو.
ل دۆر ڤێ یه‌كێ راهێنه‌رێ ناڤهاتی بۆ رۆژناما ئه‌ڤرۆ گۆت: یاریێن قاره‌مانیێ هه‌تا ئه‌ینیا بهێت به‌رده‌وامبن لێ ئه‌و رێزبه‌ندیا نوكه هه‌لبژارتیێ ئیراقێ ئیناین ل سه‌ر گشت هه‌لبژارتیێن عه‌ره‌بی بوون بۆ ئه‌ڤرۆ و هه‌تا ئه‌ینی ل سه‌ر ئاستێ پێشكه‌فتیان، لاوان، تازه‌پێگه‌هشتی و كچان دێ ل سه‌ر هه‌ڤڕكیا به‌ریكانا كت بۆ گشت یاریزانان بیت ژبۆ دیاركرنا یاریزانێن ئێكێ و درێژاهیا به‌ریكانێ ژ 17كم هه‌تا 160كم دا بیت، ده‌ستكه‌فتێ وه‌هبی سلێمان چو یاریزانێن ئیراقێ نه ئیناینه ل سه‌ر ئاستێ لاوان د قاره‌مانیێ دا، بۆ هه‌ڤڕكیێن بهێت من باوه‌ریا هه‌یی یاریزانێن مه دێ بخوه ناسناڤه‌كێ دی یێ كه‌سۆكی تۆماركه‌ن
