پایسكلڤانێن دهۆكێ بوونە قارەمانێن قۆناغا ئێكێ
قەیس وەیس:
تیما تازەپێگەهشتیێن یانەیا دهۆك ناسناڤێ قۆناغا ئێكێ یا قارەمانییا ئیراقێ بۆ یارییا پایسكلان ب دەستڤە ئینا، پشتی یاریزانێن وێ شیایین رێزێن پێشیێ بهێن و پێنج ژ وانا جهێ خوە د ناڤ رێزێن هەلبژارتیێ ئیراقێ دا پارست، د هەڤڕكیێن واندا ئەوا ل دەستپێكا ڤێ حەفتێ پایتەختێ ئیراقێ بەغدا مێڤاندارییا وێ كر.
هشیار فەریق سەرپەرشت تیمێ و ئەندامێ كارگێرییا یانەیا دهۆك بۆ رۆژنامەیا ئەڤرۆ گۆت: ب سەرفەرازی كوڕێن مە یێن تازەپێگەهشتی شیان ناسناڤێ قۆناغا ئێكێ بینن ل سەر ئاستێ تیمان بۆ گشت یانەیێن پشكدار كو دگەهشتنە 17 یانەیان پشتی رێزا ئێكێ هاتین بۆ بەریكانەیا 30 كم ب دو دەمژمێر، 13 خولەك و 17 چركەیان، تیما ئەلحدبا‌و رێزا دویێ هات و یا سێیێ دیفاع ئەلجەوییە.
ل سەر ئاستێ یاریزانان ئەوا زێدەتری 60 یاریزان پشكداربووین هەڤڕكیێن بەریكانێ بۆ 25 كم هاتە بڕین یاریزانێن دهۆكێ كونترۆلا رێزێن دویێ هەتا حەفتێ كرن بڤی شێوەیی بوون، یوسف جیهاد، محەمەد سەدیق نوری، ئیهاب عومەر سلێمان، عیسام عەلی ئەبۆزێد، ئارام سباح حسێن و ئیبراهیم سەمیر راجی رێزێن دویێ هەتا حەفتێ ب دەستڤە ئینان و هەڤالێ وان ئاڤەند هشیار رێزا نەهێ هات، هەروەسان یاریزانێ فیدراسیۆنا پایسلڤانێن دهۆكێ ئەمیر نواف رێزا 13 ئینا.
ناڤهاتی ئەوچەندە دیار كر ژبلی كو یاریزانێن دهۆكێ بووینە قارەمان هەر پێنجێن ئێكێ بۆ هەلبژارتیێ ئیراقێ هاتنە دەستنیشانكرن و گۆت: ب سەرپەرشتییا راهێنەرێ خودان شیان تارق سەعید د قۆناغا ئێكێ دا شیاین پێنگاڤەكا مەزن پاڤێژین، پێنەڤێت ئەڤە دێ بیتە پالدەرەك بۆ قۆناغا دویێ بەردەوامیێ بدەینە هەڤڕكیێ، كارگێرییا یانەیێ بەردەوام پشتەڤانێن یاریزانێن خوە بووینە پێخەمەت بلندكرنا ناڤێ دهۆكێ د قارەمانیێن ئیراقێ دا.
