پایسكلڤانێن دهۆكێ دێ پێنگاڤا ئێكێ بۆ پاراستنا ناسناڤێ ئیراقێ هاڤێژن
فدراسیۆنا پایسكلڤانێن ئیراقێ ب فەرمی بڕیار دا وەرزێ نوو یێ 2025ێ بۆ قۆناغا ئێكێ یا قارەمانییا خولا بۆ یانەیێن پلا نایاب ل پایتەختێ ئیراقێ بەغدا ل سەر ئاستێن پێشكەفتی، لاوان، تازەپێگەهشتی و كچان، بڕیارە تیما لاوێن یانەیا دهۆك قارەمانا وەرزێ 2023 پشكداریێ تێدا كەن.
ل دۆر ڤێ قارەمانیێ و بەرهەڤیێن تیما دهۆكێ هشیار فەریق سەرپەرشتێ تیمێ و سەرۆكێ لژنەیا دادڤانان ل فدراسیۆنا پایسكلڤانێن ئیراقێ بۆ رۆژنامەیا ئەڤرۆ گۆت: بڕیارە ل 27ێ ڤێ مەهێ دەست وەرزێ نوو یا قارەمانییا ئیراقێ بهێتە كرن، پشتی ل وەرزێ بۆری تیما مە یا تازەپێگەهشتییان شیاین ناسناڤێ قارەمانییا ئیراقێ ب دەستڤە بینن و شیاین د هەر چار قۆناغان دا رێزێن ئێكێ بهێن، ژیێ وان یاریزانان بۆ ئاستێ لاوان بلند بووینە لەوما ژی دێ ب ئەوان یاریزانان پشكداری د وەرزێ ئەڤ سالە بین بۆ ئاستێ لاوان و ئارمانجا مە دێ بۆ ناسناڤی بیت، هەرزوو ڕاهێنەر تارق سەعید هەموو یاریزانێن كۆمكرینە و پلان بۆ ڕێكخستنا بەرهەڤیێن خوە داناییە كو ئەڤە بۆ ماوەیەك درێژەپێدان ب راهێنانێن خوە دكەن.
ژلایەكێ دووڤە ناڤهاتی گۆت: كارگێرییا یانەیێ ژی بەرهەڤییا خوە دیاركرییە ژبۆ پشتەڤانییا لاوێن تیما خوە یا پایسكلان، هەرچەندە دێ وەرزێ ئەڤ سالە هەڤڕكی دناڤبەرا یانەیان دا دژوارتر بیت ژبەركو پرانییا ئەوان یاریزانێن پشكدار خودان ئاست و شیان بووینە، لێ ئەم ڕژدن ناسناڤێ لاوان ب دەستڤە بینن و ڕاهێنەرێن مە تارق سەعید خودان شیانە و دشێت یا پێدڤی ئەنجامبدەت.
ژلایێ خوەڤە تارق سەعید ڕاهێنەرێ تیمێ دیار كر ئەوان بەرهەڤی كرینە و دێ كەمپەكێ نافخوە یێ ڕاهێنانێ دانان و گۆت: وەرزێ ئەڤ سالە ب هێزترە لێ من باوەری ب شیانێن یاریزانێن خوە هەیە، هەموویان سەربۆریا ئاستێ تازەپێگەهشتییان یا هەیی بۆ ئاستێ لاوان ژی ئەم نا ترسین ژ چو تیمێن بەرانبەری مە، مەرەم و ئارمانجا مە پاراستنا ناسناڤێ لاوانە و هەموو یاریزان جهێ خوە دناڤ رێزێن هەلبژارتیێ ئیراقێ پارێزێن، پێنەڤێت كاروانێ خولێ یێ درێژە ژبەركو چار قۆناغن و هەر قۆناغەك دێ ل پارێزگەهەكێ بیت ب هیڤینە ل دهۆكێ ژی بهێتە كرن دا مفایی ژێ وەربگرین.
بۆ زانین تیما پایسكلڤانێن دهۆكێ دێ ب شەش یاریزان پێكهێت ئەوێن ل وەرزێ 2024ێ ل سەر ئاستێ تازەپێگەهشتییان بۆ ناڤ رێزێن هەلبژارتیێ ئیراقێ هاتبوونە ژێگرتن ئەو ژی، یوسف جیهاد، محەمەد سادق نوری، ئیهاب عومەر، ئارام سەباح، ئاڤەند هشیار فەریق و عیسام عەلی پشتی ب سەركەفتییانە و رازیبوونا راهێنەرێ ئیرانی شیان پلێتا پێكهاتیێ ئیراقێ وەربگرن.
