پایسكلڤانێن دهۆكێ رێزا ئێكێ ب ده‌ستڤه ئینا
ئه‌ڤرۆ،
تیما پایسكلڤانێن یانا دهۆك ل سه‌ر ئاستێ لاوان شیان رێزائێكێ یا قاره‌مانیا ئیراقێ بۆ قۆناغا دویێ ب ده‌ستڤه بینن، د هه‌ڤڕكیێن واندا ئه‌وا دوهی ب پشكداریا 12 یانێن ئیراقێ بۆ لاوان و تازه‌پێگه‌هشتیان ل باژێرێ سلێمانیێ هاتیه كرن و یاریزان وه‌هبی سلێمان بوو قاره‌مانێ ئیراقێ.
هه‌ڤڕكیێن قاره‌مانیێ ل سه‌ر دو به‌ریكانا هاتبوو كرن و ئه‌نجامێن یاریزانێن دهۆكێ بڤی شێوه‌یی بوون، بۆ به‌ریكانا دژی ده‌مژمێرێ ئه‌وا درێژاهیا 20كم وه‌هبی سلێمان رێزا دویێ هات ب 31 خوله‌ك و 17 چركا، سیداد سه‌لام ب 10 خوله‌ك و 34 چركه رێزا شه‌شێ هات، مونته‌زه‌ر عه‌لی ب پێنچ خوله‌ك و 35 چڕكا رێزا ده‌هێ هات، هه‌روه‌سان به‌ریكانا كت بۆ گشت یاریزانا وه‌هبی سلێمان شیا ناسناڤێ قاره‌مانیێ ب ده‌ستخوه‌ڤه بینت و پێشكه‌فیت ل سه‌ر هه‌ڤڕكێ خوه یێ یانا حدبا‌و ئه‌حمه‌د زوهێر، هه‌ڤالێ وی سیداد سه‌لام شیا رێزا سێیێ بهێت، بڤان ئه‌نجاما هه‌ردو یاریزانێن دهۆكێ شیان جهێ خوه دناڤ رێزێن هه‌لبژارتیێ ئیراقێ دا پارێزین.
لدور ئه‌نجامێن هاتینه تۆماركرن هشیار فه‌ریق سه‌رپه‌رشتێ تیما یانا دهۆك بۆ رۆژناما ئه‌ڤرۆ گۆت: هه‌رچه‌نده پلانا مه ده‌ستڤه ئینانا رێزا ئێكێ یا به‌ریكانا سه‌ر ئاستێ گشت تیمان بوو لێ ژبه‌ركو قۆناغا دویێ یه و هێشتا دو قۆناغێن دی ماینه بۆ دیاركرنا قاره‌مانا ئیراقێ له‌ورا ئه‌و ئه‌نجامێن هاتینه پێش گه‌له‌ك باشن و لاوێن دهۆكێ لسه‌ر هه‌ڤڕكیێ بۆ ناسناڤی به‌رده‌وامن و بتنێ چه‌ند چڕكه‌كێن كێم دناڤبه‌را مه خودانا رێزا ئێكێ یه، هه‌روه‌سان یاریزانێن مه هه‌تا نوكه ئاسته‌كێ مه‌زن نیشان ده‌ن و هه‌ردو یاریزان وه‌هبی سلێمان و سیداد سه‌لام جهێ خوه دناڤ رێزێن هه‌لبژارتیێ ئیراقێ پاراستیه، له‌ورا گه‌شبینم دێ بۆ قۆناغا سێیێ باشتر بین و تنێ ناسناڤ ئارمانجامه‌یه، كارگێریا یانێ پشته‌ڤانیا به‌رده‌وام بۆ تیمێ دكه‌ن پێخه‌مه‌ت چو كێماسی نه‌بن.
ژلایێ خوه‌ڤه تارق سه‌عید راهێنه‌رێ تیمێ گۆت: هه‌ڤڕكیه‌كا بهێز دهاته كرن بتنێ چه‌ند چڕكه‌كێن كیم دناڤبه‌را مه دا هه‌بوون، ئه‌م شیاین به‌رده‌وامیێ بده‌ینه هه‌ڤڕكیێ و مه ئۆمێده‌كا مه‌زن هه‌یه بۆ قۆناغا سێیێ و یا دووماهیێ ناسناڤێ قاره‌مانیێ بده‌ستڤه بینن، سۆپاسیا كارگێریا یانا دهۆكێ دكه‌ین كو پشته‌ڤانێن مه‌نه و به‌رده‌وام دووڤچوونا تیمێ دكه‌ن و چاره‌سه‌ریا هه‌ر كێماسیه‌كێ دكه‌ن، بۆ قۆناغا بهێت دێ بشێوه‌كێ باشتر خوه به‌رهه‌ڤكه‌ین و نا راوه‌ستیێن هه‌تا بگه‌هینه ئارمانجا خوه ئه‌وژی پاراستنا ناسناڤێ قاره‌مانیا ئیراقێ یا سالا بوری.
