پایسكلڤانێن دهۆكێ ل كەربەلا دێ بزاڤێن ڤەگەڕاندنا ناسناڤی كەن
د داخویانیەكێ دا سەرۆكێ لژنەیا دادڤانان ل فدراسیۆنا پایسكلڤانێن ئیراقێ دیار كر ئەڤرۆ دێ دەست ب هەڤڕكیێن قۆناغا دویێ یا قارەمانییا یانەیێن ئیراقێ ل سەر ئاستێن جودا ل پارێزگەها كەربەلا هێتە كرن و ئەوا دێ بۆ هەتا سوبەهی پێنج شەمبی هەڤڕكیێن وێ بەردەوامبن.
زێدەتر هشیار فەریق كو هەمان دەمدا سەرپەرشتێ تیما پایسكلڤانێن یانەیا دهۆك بۆ رۆژنامەیا ئەڤرۆ گۆت: قارەمانییا یانەیێن ئیراقێ بۆ چار قۆناغان هاتیە دانان ل سەر ئاستێن پێشكەفتی، لاوان، تازەپێگەهشتی، پشكۆژ و كچان، قۆناغا ئێكێ ل پایتەختێ ئیراقێ بەغدا هاتبوو كرن، ئەڤرۆ دێ قۆناغا دویێ دەستپێبكەت، یێن ئەڤرۆ ل سەر ئاستێ بەریكانەیا كت یاریزان بۆ گشت یانەیان بۆ پێشكەفتییان ب درێژاهییا 50كم، یارییا دویێ كت بۆ یاریزانێن گشت یانەیا ل سەر ئاستێ لاوان ب درێژاهییا 40كم، بەریكانەیا سێیێ دێ بۆ شێوازێ كت یاریزانێن یانەیان ل سەر ئاستێ تازەپێگەهشتی و پشكۆژان ب درێژاهییا 40كم.
هەروەسان ناڤهاتی گۆت: سوبەهی ل سەر ئاستێ كت بۆ گشت یانەیان بۆ پێشكەڤتیان ب درێژاهییا 100كم، بەركانەیا دووڤدا دێ ل سەر ئاستێ كت بۆ هەموو یاریزانێ، یانەیان ل سەر ئاستێ لاوان بۆ 80كم ئەوا ل سەر هەموو ئاستان ب پشكدارییا 36 یانەیێن ئیراقێ و هەرێما كوردستانێ دهێتە كرن، تاكە یانەیا پارێزگەهێ تازەپێگەهشتی و لاوێن دهۆكێ نە ئەوێن د قۆناغا ئێكێ دا شیاین رێزا دویێ ب دەستڤە بینن هەروەسان یاریزانێ پشكۆژێ دهۆكێ عەبدولرەحمان شیڤان ئەكرەم ل سەر ئاستێ تاك ناسناڤ دەستڤە ئینایە، دیسان تیما پایسكلڤانێن دهۆكێ یا لاوان ب سەرپەرشتییا ڕاهێنەرێ باژێرێ دهۆكێ تارق سەعید یە كو ڕاهێنەرێ هەلبژارتیێ ئیراقێ یە و یاریزانێن پشكدار هەر ئێك ژ یوسف جیهاد، محەمەد سادق نوری، ئیهاب عومەر، ئارام سەباح، ئاڤەند هشیار فەریق و عیسام عەلی، گەشبینن بۆ ڤێ قۆناغێ یاریزانێن مە شیانێن مەزن هەنە بۆ پاراستنا بەرگێریكرن ژ پاراستنا ناسناڤێ لاوان یێ سالا بۆری.
