پایسكلڤانێن دهۆك و كۆیە بوونە قارەمانێن كوردستانێ
هەردو یانەیێن دهۆك و كۆیە ب ناسناڤێ قارەمانییا هەرێما كوردستانێ یا پایسكلان ل سەر ئاستێ پێشكەفتی و تازەپێگەهشتییان ب دەستڤە ئینان پشتی شیایین كۆنترۆلا رێزێن ئێكێ ل سەر ئاستێ تاك و گشتی یا هەڤڕكیێن بەڕیكانێ بكەن، ئەوا ل ئینیا بۆری ب پشكدارییا پێنج یانەیان ل هەولێرا پایتەخت هاتییە كرن.
ل سەر ئاستێ تاك بۆ پێشكەفتیان یا غاردانا 60كم 14 یاریزان پشكداربوون، ئەنجام بڤی شێوەیی بوون، سەربەست عەبدوللا ژ كۆیە رێزا ئێكێ، وەهبی سلێمان ژ دهۆكێ رێزا دویێ، نەوزاد مستەفا ژ كۆیە رێزا سێیێ، ل سەر ئاستێ گشتی یێ یانەیان بۆ 60كم، كۆیە رێزا ئێكێ، دهۆك رێزا دویێ و بابەگۆرگۆر رێزا سێیێ.
ل سەر ئاستێ تازەپێگەهشتییان بۆ یاریزانێن تاك یا 20كم هەشت یاریزان پشكداربوون و ئەنجام بڤی شێوەیی بوون، هەستیار فەتحوللا ژ كۆیە رێزا ئێكێ، محەمەد سادق، یوسف عرفان و حسێن ئازاد ژ دهۆكێ رێزێن دویێ هەتا چارێ، ل سەر ئاستێ گشتی، یانەیا دهۆك رێزا ئێكێ، سۆلاڤ رێزا دویێ و سۆلا رێزا سێیێ هات.
هشیار فەریق سەرۆكێ فیدراسیۆنا پایسكلڤانێن كوردستانێ بۆ ئەڤرۆ گۆت: ئەڤ قارەمانییە ل دووڤ بەرنامەیێ سالانە یێ فیدراسیۆنا كوردستانێ ب هەڤكارییا لژنەیا ئۆلمپی یا كوردستانێ هاتییە رێكخستن، هەڤڕكییەكا بهێز دهاتە كرن و تێدا دیاربوو یاریزانێن پارێزگەها دهۆك و یانەیا دهۆك كۆنترلەكا باش ل سەر رێزێن ئێكێ كرینە ئەڤەژی جهێ دەستخووشیێ یە، بۆ سالا نوو دێ بەرنامەكێ رێكخستی و دارشتی چالاكیێن خوە ئەنجامدەین.
