پایسكلڤانێن دهۆك و گارە رێزێن ئێكێ و دویێ ب دەستڤە ئینان
هەردو نوونەرێن پارێزگەهێ تیما تازەپێگەهشتیێن یانەیا دهۆك و یانەیا گارە رێزێن ئێكێ و دویێ یێن قۆناغا دویێ یا قارەمانییا هەرێما كوردستانێ بۆ بەریكانەیا پایسكلان ب دەستڤە ئینان، د هەڤركیێن واندا ئەوا ل ئەینییا بۆری ب پشكدارییا 10 یانەیێن هەرێمێ ل سەر ڕێیا بەحركێ ل هەولیرا پایتەخت هاتبوو ئەنجامدان.
ل سەر ئاستێ تازەپێگەهشتییان تیما یانەیا دهۆك رێزا ئێكێ هات، تیما گارە رێزا دویێ و هەولێر رێزا سێیێ هات، ل سەر ئاستێ پێشكەفتییان كۆیە رێزا ئێكێ هات، دهۆك رێزا دویێ و چوارقۆرنە رێزا سێیێ هاتن، ل سەر ئاستێ كچان پێشمەرگەیا هەولێر بوو قارەمان و كۆیە رێزا دویێ ب دەستڤە ئینا.
هشیار فەریق سەرۆكێ فیدراسیۆنا پایسكلان ل هەرێما كوردستانێ بۆ رۆژناما ئەڤرۆ گۆت: پێخوەشحالین بۆ قۆناغا دویێ ل دووڤ ئێك ئەم شیاین هەڤڕكیێن قارەمانییا هەرێما كوردستانێ ب سەركەفتییانە دەربازبكەین ب پشكدارییا زێدەتری 50 یاریزانێن كوڕ و كچ ل سەر ئاستێ دەهـ یانەیێن هەرێمێ ل دووڤ بەرنامێ سالانە یێ فیدراسیۆنا پایسكلڤانێن كوردستانێ، دیاربوو ژی ئاستێ یاریزانێن هەمی یانەیان باشتر لێهاتییە و هەڤڕكێن ب هێز دهاتنە كرن.
هەروەسا ناڤهاتی گۆت: پشتی سەركەفتنا قۆناغا ئێكێ ئەوا ل خزیرانا بۆری پارێزگەها دهۆكێ مێڤاندارییا وێ كری ئەڤ قۆناغە ژی ب سەركەفتیانە دەربازبوو، ئەڤ قارەمانییە ب شێوازێ دیاركرنا ئەنجامان ل سەر ئاستێ تاك بوو هەتا ب دووماهی هاتنا قۆناغا سێیێ دێ قارەمان ل سەر ئاستێ یانەیان دیاربیت پشتی كۆمكرنا هەمی ئەنجامان، دیسان لژنەكا تایبەت هاتیە پێكئینان د ماوێ هەر سێ قۆناغێن قارەمانیێ دا دۆڤچوونا یاریزانێن باش بكەن پێخەمەت درۆستكرنا هەلبژارتیێ كوردستانێ و بەرهەڤی بۆ هەر قارەمانیەكا داهاتی یا نێڤدەولەتی و ڤەكری بیت ئەڤە ژی پێنگاڤەكا باشە یاریزانێن هەرێمێ زێدەتر ئاستێ خوە پێشبێخن و هەڤڕكی پەیدابیت.
بۆ زانین تیما تازەپێگەهشتیێن یانەیا دهۆك ب هەرچار یاریزانێن خوەڤە ل سەر ئاستێ تازەپێگەهشتیان بۆ بەریكانەیا 20 كم رێزێن پێشیێ كۆنترۆلكربوون ئەو ژی ، محەمەد سادق نوری، بیرهات نەبی، ئاریوس سلێمان و یوسف جیهاد، ژلایێ خوەڤە یاریزانێن تیما یانەیا گار ئەوێن رێزێن پێنجێ هەتا هەشتێ ئیناین ئەو ژی عیسام عەلی، ئارام سەباح حسێن، ئاڤەند هشیار فەریق، ئەحمەد مەجید محەمەدو ئەمیر ئەڤێن شیایین تیما گارە بەر ب رێزا دویێ بینن.
