پایسكلڤانێن یانەیا دهۆك كۆنترۆلا قارەمانیا كوردستانێ كر
یاریزانێن یانەیا دهۆك ل سەر ئاستێ كوڕان و یێن كۆیە ل سەر ئاستێ كچان كۆنترۆلا رێزێن ئێكێ یا قۆناغا ئێكی ژ قارەمانیا كوردستانێ یا پایسكلان ب دەستڤە ئینان، د هەڤڕكیێن واندا ئەوا ل ئەینیا بۆری ب پشكداریا دەه یانەیان ل سەر رێیا خنسی بۆ بەریكانێن جودا هاتیە كرن.
ل سەر ئاستێ تازەپێگەهشتیان بۆ بەریكانەیا 20 كم یاریزانێن دهۆكێ هەر چار رێزێن پێشیێ كۆنترۆلكربوون ئەو ژی ئاریوس سلێمان بۆ 32 خولەك و حەفت چرك ژ خولەكێ، محەمەد سادق نوری 32خولەك و 12چركە ژ خولەكێ، یوسف جیهاد 32خولەك و 15چركە و یوسف عەرفان 32خولەك و23 چركە ژ خولەكێ رێزێن ئێكێ هەتا چارێ هاتن.
ل سەر ئاستێ پێشكەفتیان بۆ بەریكانەیا 60كم یاریزانێ دهۆكێ وەهبی سلێمان ب ئێك دەمژمێر، 38 خولەك رێزا ئێكێ، هەردو یاریزانێن كویە محەمەد عەلی ب زێدەتری دو چركە بتنێ رێزا دویێ هات، سەربەست عەبدوللا زێدەتری 20 چركە رێزا سێیێ هات.
ل سەر ئاستێ كچان بۆ بەریكانەیا 20كم داهات قادر ژ یانەیا كۆیە رێزا ئێكێ، لەنیا هادی و ئاڤان عەدنان ژ یانەیا پێشمەرگە رێزێن دویێ و سێیێ هاتن.
ل دۆر ڤێ قارەمانیێ هشیار فەریق سەرۆكێ ئێگەتیا پایسكلان ل هەرێما كوردستانێ بۆ رۆژناما ئەڤرۆ گۆت: پێخوەشحالین پشتی ڤەقەتیانەكا درێژی ژ چالاكیان ئەم شیاین قۆناغا ئێكێ ب سەركەفتیانە دەربازبكەین، شێوازێ قارەمانیێ بتنێ دیاركرنا ئەنجامێن ل سەر ئاستێ تاكە هەتا ب دووماهی هاتنا قۆناغا سێیێ دێ قارەمان ل سەر ئاستێ یانەیان دیاربیت پشتی كۆمكرنا هەمی ئەنجامان، بڕیارە ل دەستپێكا مەها ئەیلۆنا بهێت قۆناغا دویێ ل باژێرێ سلێمانیێ بهێتە دانان.
هەروەسان ناڤهاتی گۆت: لژنەكا تایبەت هاتیە پێكئینان د ماوێ هەر سێ قۆناغێن قارەمانیێ دا دووڤچوونا یاریزانێن باش بكەن پێخەمەت درۆستكرنا هەلبژارتیێ كوردستانێ و بەرهەڤی بۆ هەر قارەمانیەكا داهاتی یا نێڤدەولەتی و ڤەكری بیت ئەڤە ژی پێنگاڤەكا باشە یاریزانێن هەرێمێ زێدەتر ئاستێ خوە پێشبێخن و هەڤڕكی پەیدابیت و سۆپاسیا لژنەیا ئۆلمپیا كوردستانێ دكەین ژبەر كو پشتەڤانیا كار و پلانێن مە ل دووڤ شیانێن خوە كرینە.
