پاییزا هه‌لبه‌ستان
هه‌لبه‌ست: عه‌بدالكه‌ریم گه‌یلانی
وه‌رگێران ژ عه‌ره‌بی: رۆندك بامه‌رنی
1
هه‌موو شه‌ڤان
شه‌ڤبێریا د گه‌ل بێهوده‌بوونا خوه دكه‌م
داكو ئاهه‌نگا ژ بۆ داكه‌تنێن خوه بگێڕم
دناڤ په‌نچه‌را خوڤه‌ده‌ریێ دا ل سه‌ر باژێرێن سبێده‌هیا دهه‌لم
ب تلێن بێده‌نگیا خوه پسته‌پستێ دكه‌م
نه‌مرن ژ بۆ برینانه
2
ئه‌ی خه‌م
پێته‌یێن وه‌ستیایین
پیچه‌كێ ل سه‌ر ته‌ختێ چه‌ژنێ ب رونه‌خوار
ب چاڤێن خوه یێن تژی رۆندك ته‌ماشه‌ی كه‌رنه‌ڤالا خوه‌شیێ بكه
پاشی به‌رده‌وامبه ل سه‌ر رێبازا خوه
رێك یا درێژه
ئه‌ی كه‌سێ به‌ر ب جادێن دلیڤه دمه‌شی
3
ئه‌ز ژنه‌كێ ناس دكه‌م وه‌ك جادویه‌كێ یه
ده‌مێ ل نێزیكی رووباری په‌یاسا دكه‌ت
هه‌كو ده‌ستێ خوه دكه‌ته گه‌رده‌نا ئاڤێ
پێلێن وی سه‌رخوه‌ش دبن
دین و هار دبن
وه‌كی دیناتیا نه‌وره‌سێن خوه
و په‌راڤین وی بخریقێن دچن و ژێ دبارن هه‌لبه‌ست
4
ل بن مژوولانكێن په‌یڤێ
رۆندكه‌ك دژیت
ئارام دبم
ئارام دبیت
توره دبم
دكه‌ڤیت
هنده‌ك جارا ده‌ستێن خوه ب سه‌رێ ملێن خه‌مێن ڤه‌شارتی دا دئینته خوار
وه‌كی شه‌ماله‌كێ دسۆژیت
هنده‌ك جارا ژی دگرنژیت بۆ دێمێ رۆناهیا درژیته سه‌ر شاپه‌ڕێن به‌لاتینكه‌كا ماقوول
وه‌كی ستێره‌كێ
پاشی به‌رزه‌دبیت
5
رێكا حه‌زا
پێگه‌هێن وێ د ره‌پ و رووتن
پیێن من یێن هه‌لاویستی ب ته‌قنا بێ هۆده‌بوونێ ڤه دووڤ خوه رادكێشیت
ئاخ ژ ڤێ دیناتی
……..
دێ مینم
دێ مینی
دێ مینین
د ناڤ كه‌رنه‌ڤالا سۆز و په‌یمانا دا
تاكو دوماهیك دیناتی
……….
دێمێ ته
ئه‌خته‌ره‌كێ
بێ ژیانه
ئه‌ی دلێ منێ جوان
……..
هیڤی
شاشیا رێڤه‌چوویێن ل سه‌ر لێڤێن برسێ یه
خه‌ونه‌كه
رۆناهی یا وێ یا نزمه د مالبچیكێ گه‌شبوونێ دا
ئه‌شقه‌كه وه‌كی دیناتیێ
6
د ناڤ خوه‌شیا بێده‌نگیێ دا
ئه‌زێ خه‌ندقیم
ل دۆر میلێن ده‌مێ خوه یێ ده‌ركه‌فتی ژ لێڤا ڤالاتیێ دزڤڕم
ئه‌ی ده‌م براوه‌سته
له‌زێ د پێنگاڤێن خوه دا نه‌كه
بهێله بێده‌نگیێ بهه‌لكێشم
7
هێشتا ئه‌زێ ب رێكێ ڤه دچم و گورگێن رێڤه‌چوونێ یێ ترسا من ژێك دبژیكینن ژێك دئینه‌ده‌ر
نه چ كه‌س ل وێرێ یه
و نه چ جه
8
دێ خه‌ما خوه بخوه ڤه گرێده‌م
دێ نهێنیا حه‌زا دلا بۆ بێژم و زێره‌ڤانیێ ل دێمێ ڕۆژئاڤابوونێ كه‌م
پسته پستێن خوه دێ بێده‌نگ كه‌م
دێ گوهداریا بێده‌نگیێ كه‌م تاكو توبه بكه
دێ خه‌ریبیێن خوه ته‌ڤلی ده‌ستێن بێهوده‌بوونێ كه‌م
ناخێ خوه دێ پالده‌مه دارا هه‌لبه‌ستێ
ژیێ من ئاشۆپه‌یه
داستانه‌كه ژ چیرۆكان و ب تنێ دهێت
دێ هێت
هه‌لبه‌ت په‌ناگه‌ها منه
ئه‌و ب تنێ زیاره‌تێ منه
9
ئه‌زێ كراسێ ڤالاتیا سه‌روچاڤا ل به‌ر خوه دكه‌م
د ناڤ كێلبێن به‌نده‌مانێ دا
ئه‌ز خه‌یاله‌كا بكه‌نی و بێزارم
دێمێ منێ سۆتی ل بن پێلدانێن ده‌می
ئه‌زێ ژ كاڤلۆژانكێ ناڤێ خوه‌یێ ئالگۆر ده‌ردكه‌ڤم
داكو ده‌ربڕینێ ژ ڤێ مرنێ بكه‌م
سه‌مایێ ب قوربانیێن ئێشانێ دكه‌م
هنده دێ سه‌ر و چاڤێن دلێ منێ پرتكی خوت
ئه‌گه‌ر د دیتنا وی دا ئه‌ز نه‌فڕم
ئه‌ز رۆناهیا دره‌وێ مه
و بێنگاڤێن من ناگه‌هنه دووراتیێن جراكێ كوریشكێن خاترخواستنێ
ئه‌ڤ جیهانه یا ژ گێژبوونێ دهێته كێشان و
ئه‌زێ ل ل دووڤ پێنگاڤێن وی دبه‌زم
10
ناخێ من دبیته نێرگز ده‌مێ د سه‌رڕا دبۆری
وه‌كی تاوسه‌كی…
ئه‌ڤێ شه‌ڤ كریه د دلێ خوه دا دۆرپێچ دكه‌ی ناڤ گڤاندێ به‌رپه‌ڕێن من..
هه‌موو ئێڤاریان
ئه‌ز گولێن خوه ل دۆر سیبه‌را ته به‌لاڤه دكه‌م و شه‌مه‌نده‌فڕا ژیێ من به‌ریكانێ د گه‌ل بایی دكه‌ت..
و تو یا ل ڤێرێ..
د ناڤ نه دلی دا…
تو خوه ب ترسا خوه ڤه دكه‌یه تلۆڤه
و ترس هه‌لبه‌سته‌كه د ڤی ده‌مێ ئالۆز دا
