پاییز.. كەڤالەكێ كلاسیكە
عارف حیتۆ
هەیڤ یا دوورە..
سیناهییا وێ.. ب جێ دیدارا من ناكەڤیت
سنسلەكا هەڤسۆزیێ و گومتلەكێ خەریبیێ
من داردەستی هەستێ كرن…
پەستا وان سالێن دەگری، ژ جهی دڕەڤیت
لێ پاییزا چاڤ ل دەر خوە د بای وەردكەت و
دەرێ دیدارەك دی ڤەدكەت.
*
دیدارا من.. ئەوا سالێن پیر ڤەشارتی و
ل سەر دلەكێ هشك نكراندی
ب كەزی یێن پاییزێڤە گولە و
بلبل دێ هێنە سەمایێ..
ئێدی نەما راز بمیننە د قۆقلان ڕا
هەمی هزرەت، دێ رویس بنە روویێ بەڕكێ.
*
هەر رازەكا د دلێ زەڤیاندا مای هزرەت
ب تیشكێن رۆژێ دوجان دبیت و
د مالبچویكێ وێدا گەشەدكەتن شوبهەت
سوارێن فیراقەتێ حێنجن..
ب دانگا چیایڤە كەسیرە و گەلەك دویرە
وەرزێ چنینا مشت ئولفەت!
*
وەرزەكێ زەر ب رازهلدانێ..
حەزێ ژ خەو رادكەت و دانپێدانێ فڕاكە دكەت
هەر چ بێژم، خوها عەشقێ.. ب ئەنیا منڤە دیارە
من چاڤێ خوە كرە د دەستێ گەمراندیێ پاییزێدا و
ژڤانەكێ نیڤ هەپارە، دێ ژ دایكبیت دوبارە!
*
پاییزە و پاییز دحیزن..
هەر ژڤانێ گیرۆكری و هەر سۆزەكا دوتاكری
دكەتە كولەك، ژبۆ وەغەرێن دوور و خەلەك.
*
چقەكێ رویس دگۆتە بەلگان
هەكو وە ل بەر پیا دبینم رێزكری
باوەر بكەن..
كرمێن ئاخێ ژی ژبۆ من.. دكەنە گری.
*
بەلگێن وەریایی و گەلگەلە
كەفتن سەمایێ ب هەلهەلە
خوە د ئاخا شهگرتی دچكلاند
ل سەر رێكا دارێن خەریب و چاڤەڕێ
ببوونە فند و بەوصەلە.
*
ئاخا نەرم.. خوە ل بەر زەراتیێ كر تەرم
وەلێ ژبەر قێژی یێن برووسییا، ڤەدجنقی و
كەڤر ژ سینگێ خوە ددانە پاش
كەوان خوە د باوەشێ وەركر، هەبلەتراش.
*
كەوەكێ ژ خەفكێ ڤەڕستی، ب مەستی
قەبینەك بەردا ئاقاری و
ڤەجەماندن تەیروتەوالێن خر واری
داكو ل پێشوازییا پاییزێ
گوڤەندا بیری یێن بۆری بشارینیت و
كانی یێن تێهنی ژبۆ بارانێ بخەملینیت.
*
كانیكەكا هێشتا ئاڤا وێ نەشێلی
ئەو چیرۆكێن ژبەر عەشقا زینێ ڤەماین
ب ئەنیا عەردیڤە رادان و كرنە كێلی
هەلامەتی دگۆتە تریێ مایە ب مێوانڤە ژبیركری
ما دل دهێلی، من ب تنێ ل ڤێرە بهێلی؟
*
هەلامەتەكێ هەلوەریای
ما بوو ب ستوویێ قورمەكیڤە و
ژێ دخواست كو هەكو با دهێت
ب پشتا وێڤە ببیتە سەخمە و
تەقن و زێلاق وی نەشكێنیت و نەهاڤێت.
*
تەقنێ ب مەبەست
جزمە ب گلیزێ خوەڤە بەست
ئەز هێلامە ل بەندەمانا یارا چاڤكەسك
وەلێ یار یا نڤستی بوو
بەژنا هەدارێ ب منڤە شكەست.
*
ما ئەگەر یار ما نڤستی
كی دێ پەیڤان ژ گەورییا من دەرئێخیت
كی دێ شعرێن كەل بۆ پاییزێ خوینیت و
من ژ بیرا تەمەنێ بۆری ب سەرئێخیت.
*
عەشق.. ڤایروسەكە
مێلاكێن من بۆ دبنە لیس
هەلچوونەكە.. هەستێن نەپەن پێڤە وەریس
هەكو پاییز ب ژووركەفتی، ئەزەك بێ عەشق
ل بەر رەشەبای، ما بوومە رویس.
*
ئەی ترێنا لەزگینا دێمێ پاییزێ
دێ ب كوورەیی، مە كیڤە بەی؟
نێ من دلەكێ پیككری ب گولەكێڤە.. یێ ژبیركری!
چەندین سالن شەڤێ یێ مشتانە كری
زەڤی یێن ئێچە و هەر دەگری، دگۆتە ستێران
پا دێ كەنگی سلاڤكەی و دەرێ سیناهیێ ڤەكەی!
*
