پا وه كوڕێن خه‌لكی ژ بۆ چ دانه شه‌هیدكرن ؟
نوكه ب دروستی سه‌د ساڵ ده‌ربازدبن ل سه‌ر پارچه‌كرنا كوردستانێ بۆ چار پارچان و لێكڤه‌كرنا وێ ل سه‌ر چار ده‌وله‌تێن داگیركه‌ر ل گۆره‌ی به‌ندێن په‌یمانا سایك-پیكۆ ل ساڵا 1916.
هه‌لبه‌ت چ به‌ری ڤێ پارچه‌كرنا كوردستانێ و چ ژی پشتی هینگێ هه‌موو ده‌مان كورد ب حه‌سره‌تا ئازادی و ڕزگاریێ بوون كو ئه‌و ژی وه‌كی هه‌موو گه‌لێن جیهانێ ببنه خوَدانێن وه‌ڵات و سامان و ناسناما خوه. هه‌لبه‌ستڤانێن مه ب هه‌زاران هه‌لبه‌ست چێكرن و سترانبێژان ل سه‌ر ستراند و ب هه‌زاران گه‌نج و خوه‌شمێرێن مه ل زیندانان هاتنه سێداره‌دان و ل چه‌په‌رێن شه‌ڕی هاتنه شه‌هیدكرن، مال وێران بوون، گوند كاڤل بوون، زارۆك سێوی بوون، هه‌موو ژی بۆ هندێ كو رۆژه‌ك بهێت ئه‌م ژی وه‌كی هه‌موو گه‌لێن جیهانێ ژ بن پۆستالێن داگیركه‌ران رزگار ببین و ببینه خوَدانێن وه‌ڵاتێ خوه و ب ئازادی بژین.
دبیت كو گه‌له‌ك جاران د دیروَكێ دا هنده‌ك ده‌لیڤه هاتبن لێ كورد بخوه یان نه هند شاره‌زا و زیره‌ك بن یان ژی نه دئاماده بن كو ڤێ ده‌لیڤێ بۆ خوه بكاربینن ژ بۆ ڕزگاریا خوه، مه ژی چ د ده‌ڤێ مه ڕا هاتیه ژ گل و گازنده و ڕه‌خنان مه گۆتنه پێشیێن خوه ژ به‌ر نه زیره‌كیا وان.
هه‌لبه‌ت هه‌ر ژ بۆ ڤێ ئارمانجێ ل هه‌ر چار پارچێن كوردستانێ د ده‌مێن ده‌رباز بوویی دا ب ده‌هان پارتی و ڕێكخستن و كۆمه‌له ژی هاتنه ئاڤاكرن كو ب ملیۆنان خه‌لك ل وان كۆمبوونه و بوونه ئه‌ندام و خه‌باتكه‌ر د ناڤ ڤان ڕێكخستنان دا و ب سه‌د هه‌زاران ژی گیانێ خوه كرینه قوَربان د ڤێ ڕێ دا.
هنده‌ك ژ ڤان پارتی و ڕێكخستنان درووشمێن گونجای و به‌رئاقل بلند كرنه و ل گۆڕه‌ی ده‌م و ڕه‌وشا هه‌یی دروشمێن خوه بلندكرنه و قۆناغ بۆ قۆناغێ ئه‌ڤ درووشم و ئارمانجه ل گۆڕه‌ی ڕه‌وش و پێشهاتێن نوو گوهۆڕینه، لێ هنده‌كا ژی هه‌ر ژ رۆژا ئێكێ درووشمێن گه‌له‌ك مه‌زن و ڕه‌ونه‌قدار بلندكرنه وه‌ك كوردستانا مه‌زن و سه‌رخوه‌بوونا هه‌موو كوردستانێ و ڕاكرنا هه‌موو سنوورێن د ناڤ پارچێن كوردستانێ دا هاتینه كێشان و مافێ چاره‌نڤیسی، هه‌ر ژبۆ خاترا ڤان درووشمان ژی ب سه‌د هه‌زاران خه‌لك ل وان كۆمبوویه و هه‌ژماره‌كا مه‌زن ژی ژ وان خوه دایه شه‌هیدكرن ژ بۆ ڤان درووشمان.
لێ گه‌له‌ك مخابن ئیرۆكه ئه‌م دبینن ده‌ما كوئه‌نجامێ ڤێ خه‌باتا دوور و درێژا گه‌لێ مه و خوونا وان ب سه‌د هه‌زاران شه‌هیدان و به‌رده‌ست بوونا كاودانێن گونجای و ب ده‌ستڤه هاتنا پشته‌ڤانیا نێڤنه‌ته‌وه‌یی ژبۆ دۆزا سه‌رخوه‌بوونا كوردستانێ، پڕانیا وان پارتی و ڕێكخستنێن خوَدانێن درووشمێن مه‌زن و ڕه‌ونه‌قدار ئیرۆكه 180 پله‌یان زڤڕینه و ته‌مام دروشم و هه‌لوێستێن وان به‌رۆڤاژی بوونه و ژبۆ دلخوه‌شكرنا داگیركه‌رێن كوردستانێ رۆژانه هه‌لوێستێن خوه ل دژی سه‌رخوه‌بوون و ده‌وله‌تا كوردستانێ ڕادگه‌هینن و ب كریار ژی بوونه چه‌كۆچێ ده‌ستێ دوژمنێن كوردان و ئاسته‌نگان ژ بۆ سه‌رخوه‌بوونا كوردستانێ چێدكه‌ن. ئه‌ڤه ژی وێ چه‌ندێ بۆ مه دیاردكه‌ت كو درووشمێن وان ته‌نێ ژ بۆ خاپاندنا خه‌لكێ كوردستانێ و ژ بۆ به‌رژه‌وه‌ندیا داگیركه‌ران بووینه، ئه‌گه‌ر نه ئه‌و بخوه هه‌ر كۆلێن دوژمنانه و ناخوازن خه‌لكێ كوردستانێ ژ پۆستالێن داگیركه‌ران ڕزگار ببن. ئه‌ڤه ژی ئاخفتنا زانایه‌كی دئینه بیرا مرۆڤی ده‌ما دبێژیت: ئه‌گه‌ر بارانا ئازادیێ بباریت دێ هنده‌ك كۆله سیوانا ل سه‌ر سه‌رێن خوه هه‌لدن دا كو ئه‌و باران ژ وان نه‌گریت.
وه‌ك مه به‌ری نوها ژی دیاركری ڤان بازرگانێن سیاسه‌تێ ب سه‌د هه‌زاران كوڕ و كه‌چێن كوردان بناڤێ سه‌رخوه‌بوونا كوردستانێ دانه شه‌هیدكرن و ئیرۆ ژی بوونه ڕێگرێن سه‌رخوه‌بوونا كوردستانێ. لێ پرس ئه‌وه گه‌لۆ چما خوَدانێن ڤان شه‌هیدان وان سزا ناده‌ن و داخوازا خوونا زارۆكێن خوه ژ وان ناكه‌ن و نابێژنه وان: مه زارۆكێن خوه ژ بۆ ڕزگاربوون و سه‌رخوه‌بوونا كوردستانێ دانه شه‌هیدكرن نه ژ بۆ دژایه‌تیا كوردستانێ ؟!
