پتاتێن هەرێما كوردستانێ بۆ ئیماراتێ هاتنە هنارتن
ئاكرێ، رەمەزان زەكەریا:
هەرێما كوردستانێ یا زەنگینە ب بەرهەمێ ناڤخوە و سالا بۆری ب بڕیارا مەسرور بارزانی، سەرۆكێ حوكمەتا هەرێما كوردستانێ بەرهەمێ هەناران بۆ دەرڤەی كوردستانێ هاتە هنارتن و ئاشكرا كر، دێ بەرهەمێ ناڤخوەیی بۆ دەرڤە هەمەجۆر كەین و زێدەكەین و دوهی 7/8/2023 بەرهەمێ ناڤخوەیێ پتاتان بۆ دەرڤەی كوردستانێ هاتە هنارتن.
هیوا عەلی، پەیڤدارێ وەزارەتا چاندن و ژێدەرێن ئاڤێ ل حوكمەتا هەرێما كوردستانێ ئاشكرا كر، ب پشتەڤانیا حوكمەتا هەرێما كوردستانێ 120 تەنێن پتاتان بۆ دەرڤەی كوردستانێ هاتنە هنارتن و گۆت: «پێشبینی دهێتە كرن بەرهەمێ پتاتێن ئەڤ سالە بگەهیتە 750 هزار تەنان و بڕیارە 500 تەنێن دی ژی بۆ دەرڤەی كوردستانێ بهێنە هنارتن».
ناڤهاتی گۆتژی: «پشتەڤانیا حوكمەتا هەرێما كوردستانێ بۆ جۆتیاران د پێشڤەبرنا كەرتێ چاندنێ و ب تایبەت چاندنا پتاتان دا گرنگیا خوە هەبوو، ئەم پێشبینی دكەین ئەڤ سالە هەرێما كوردستانێ بگەهیتە بلندترین ئاستێ بەرهەمئینانا پتاتان، كو زێدەتری 600 هزار تەنان بۆ خوارنێ و 150 هزار تەنان بۆ پیشەسازییان بەرهەمبینیت».
هیوا عەلی ئاشكرا كر، دوهی د رێورەسمەكی دا گرێبەستا هنارتنا پێنج هزار تەنێن پتاتان د ناڤبەرا بازرگانێن هەرێما كوردستانێ و بازرگانێن وەلاتێ ئیماراتێ دا هاتە ئیمزا كرن.
