پتریا ئاخفتنێن خه‌لكێ ل سه‌ر ئەڤان هه‌ردو كه‌سانه
ئه‌ڤرۆ نیوز ، نه‌وزاد هلورى:
د جڤاكێ مه دا ب تایبه‌تى ئافره‌ت ژ ئاخفتنێن كولان و ته‌خێن جودایێن جڤاكى نابورن بێى كو روژه‌كێ ژ روژان ئه‌و كه‌س ئاخفتنه‌كا خوش بو وان كه‌سان بێژن ، دهێته گوتن كچێن كو ژیه‌كێ مه‌زن بوراندى و شوو نه‌كرى ، و كچه‌كێ كو شوو كرى و چوو زاروك نه‌بوى ، به‌رده‌وام به‌حس و خه‌به‌رێن جڤاكى نه ، هه‌ڤده‌م هه‌مان ئاخفتن ئاراسته‌یێ وان هه‌ردوو جورێن نێرینه‌یان ژى دهێنه‌كرن.
دێژین عه‌بدولخالق كچه قوتابیه‌كا رێزا دوازدێ یه ل سنوورێ ناحیا شێلادزێ یا سه‌ر ب قه‌زا ئامێدیێ یه دیاركر كو چو كه‌س نكاریت ژ گوتنێن خه‌لكى ده‌رباز بیت خوه ئه‌گه‌ر چوو كێماسى نه‌بن و گۆت : ( هه‌موو مرۆڤان كێماسى هه‌نه و ئه‌ڤ كێماسیه ژى ب ئیرادا مرۆڤان نینه ، به‌لكو خودایێ مه‌زن ب مه‌ره‌م ئه‌و كێماسى ل ده‌ڤ مرۆڤان په‌یداكرینه داكو جوداهیه‌كا هزرى و فكرى و هه‌تا خوه‌یا جه‌سته‌یى ژى ل گه‌ل كه‌سه‌كێ دن هه‌بیت ، وژلایه‌كێ دنڤه داكو هه‌ڤسه‌نگیه‌كا دناڤبه‌را وى و مرۆڤێن دن درۆست بكه‌ت ، بێگومانه ده‌ما كو مرۆڤ دگه‌هیته ژیه‌كێ گونجاى بو نموونه وه‌كو شووكرن و ژنئینان دڤێت هه‌ڤژینیى بهێته پێكئینان ، به‌لێ دیسان ژى ئه‌ڤ یه‌ك رامان نینه كو دێ ب هه‌ڤژینیێ ل ئاخفتنێن خه‌لكى ب دوماهیك هێت)
زێده‌تر گۆت: ( ئه‌گه‌ر ، سه‌ده‌مێن ئاخفتنێن خه‌لكى ژ مرۆڤى بخوه بیت ، پێدڤى یه مرۆڤ خوه بگوهریت ، به‌لێ ئه‌گه‌ر ئه‌و سده‌م نه ب مرۆڤى بن و خودایێ مه‌زن هوسا بو مرۆڤى حه‌سكربیت ، بو نموونه شووكرنا كچان گرێداى رزقى یه و دیسان ئینانا زاروكان ب ده‌ستێ خودێ ، ل ڤێره پێدڤى یه مرۆڤ چوو پوته‌یان ب ئاخفتنێن خه‌لكى نه‌كه‌ت ، به‌لێ ئه‌گه‌ر مرۆڤ خوه بلند بدانیت و شوو نه‌كه‌ت و ده‌ما كو شوو دكه‌ت ژى ب چاره‌سه‌ریێن سرۆشتى و نودارى نه‌هێلیت زاروك هه‌بن ل وى ده‌مى خه‌لك ژى مافداره كو به‌حسا مرۆڤى بكه‌ن)
یاسین محه‌مه‌د وه‌كو ڤه‌كوله‌ره‌كێ جڤاكى ل ده‌ڤه‌را بارزان دیاركر كو ژ موسته‌حیلاتایه مرۆڤ ژ ئاخفتنێن ده‌وروبه‌ر و جڤاكى ده‌رباز بیت و بۆ ئه‌ڤرۆ گۆت: ( د هه‌ر جڤاكه‌كێ دنیایێ دا هنده‌ك داب و نه‌ریت و ئاسته‌نگێن نه‌رێنى هه‌نه كو دكه‌ڤنه د رێیا مرۆڤان دا و مرۆڤى ل كارێن خێرێ دویر بكه‌ت و بێخیته د ره‌وشه‌كا ده‌رونى یا كارتێكه‌ر دا ، بو نموونه ئه‌و كچا دجڤاكى دا هێشتا رزقێ وێ نه‌هاتى بو شووكرى ، و ئه‌و كچا شووكرى و هێشتا زاروك نه‌بوین ، و زور جاران ژى ئه‌ڤ یه‌ك بویه سه‌ده‌م كو كچ و كور هه‌ڤژینێ پێكنه‌ئینن و دویر بكه‌ڤن و ل خوه گومان دبن و دئه‌نجام دا زیانێن مه‌زن ل په‌ى درۆست بن)
زێده‌تر گۆت: ( پێدڤى یه كچ و كور ل دوڤ هه‌موو سه‌ده‌مێن چاره‌سه‌ركرنا ئاریشه‌یێن هه‌ڤژینیێ بگه‌رن و بلا ئه‌گه‌ر ژلایێ وان نه‌بیت ، نه گرنگ جڤاك چه‌وا هزر دكه‌ت ، دیسان ئه‌و كچێن كو هه‌ڤژینیى پێكئینایى و خودایێ مه‌زن زویكا زاروك ب رزقێ وان نه‌كرى بلا ئه‌و ژى خوه ئارام بكه‌ن و لدوڤ چاره‌سه‌ریێن نوژدارى بگه‌رن و پوته ب ئاخفتنێن جڤاكى نه‌كه‌ن ، به‌لێ ئه‌گه‌ر سه‌ده‌مێن شوونه‌كرنا وان و زارۆ نه‌بوون ژ خه‌تایێن وان بن ل وى ده‌مى جڤاك مافداره كو گله‌یێ ژ وان بكه‌ت ، به‌لێ دڤێت جڤاكێ مه ب گشتى وێ یه‌كێ بزانن كو هه‌موو مرۆڤ وه‌كو ئێك نینن و شووكرن و زاروكبوون ب ده‌ستێ خودێ یه و هاتنا وان ژى گرێداى رزقى و ئیرادا خودێ یه ، ژبه‌رڤێ نابیت مایتێكرن تێدا بهێنه‌كرن ژ به‌ركو كارتێكرنێن ده‌رونیێن زور ل سه‌ر وان كه‌سان هه‌یه یێن كو دبنه ئارمانجا وان ، دبه‌رامبه‌ر دا هزر ل وێ یه‌كێ بكه‌ن كو هه‌مو مرۆڤان كێماسى هه‌نه و ئه‌گه‌ر وان كچان ئاریشا شوونه‌كرنێ و زاروك نه‌بوونى َهه‌بیت مه‌ژى هنده‌كێن دن هه‌نه ، ژبه‌رڤێ گرنگه و پێدڤى یه هه‌ر ئێك ژ مه كێماسیێن كه‌سێ به‌رامبه‌ر ڤه‌شێریت داكو كێماسیێن مه‌ژى بهێنه ڤه‌شارتن).
