پتریا تاکێن جڤاکی ساخکرنا ڤالینتاینێ باش نابینن
دھۆک، نەوزاد ھلۆری:
شارەزایەکێ جڤاکی: پەیوەندیێن خێزانی بەر ب ساردبوونێ دچن و پێدڤی یە بھێنە گەرمکرن
رۆژا ئەڤینداران یان ژی جەژنا ئەڤنیداران کو زێدەتر ب رۆژا ڤالنتاین Valentine’s Day ل جیھانێ دھێتە نیاسین، ئێکە ژ ھەلکەفتنێن کریستیانان، دڤێ رۆژێ دا ئەڤیندار ل ھەموو جیھانێ گولێن سوور و دیاریان پێشکێشی ھەڤژین و ئەڤیندارێن خوە دکەن، لڤان چەند سالێن دوماھیێ ئەڤ یەک گەھشتیە کوردستانێ و دھێتە ساخکرن.
روناک عەبدولخالق، کچە قوتابیەکا زانکۆیێ یە بۆ ئەڤرۆ گۆت: (رەنگە وەکو ناڤەرۆک گەلەک ھزر و بوچۆن ل سەر رۆژا ئەڤینداران یان ڤالینتاینێ ھاتبنە گوتن و ھندەک جڤاک ب تشتەکێ باش ببینن و ھندەک ژی خراپ، بەلێ ب گشتی ھەر تشتەکێ کو ببیتە ئەگەر دناڤبەرا ژن و مێرا یان ئەڤینداران باش ببیت تشتەکێ باشە و خراپ نینە، ژبەرکو چەندە ناڤبەرا ئەڤینداران بھێز و خوش بیت، دێ زێدەتر بەختەوەری کەڤیتە د ناڤبەرا ھەڤژینان دا، دجڤاکێ مە دا ژن و مێر یان بێژین ئەڤیندار ھەیە سال ب سال ژی دیاریەکێ بۆ ھەڤژینا خوە یان ئەڤینداران خوە نائینن، بەلکو ب تمام پشت گوە ھاڤێتنە).
بێوار ھەمزە، ئەو ژی گەنجەکێ باژێرێ دھۆکێ یە، ئەو دبێژیت: (ڤالینتاین سالانە ل وەلاتێن رۆژئاڤا ب چەندین چالاکیێن جودا دھێتە ساخکرن و جھێ گرنگیدانێ یە و دڤێ رۆژێ دا دوو کەس کو پرانیا وان ھەڤژینن یان ژی ئەڤیندارن سووز و پەیمانێن ئەڤینا خوە بۆ ھەڤدوو نوو دکەن ب دانا گولەکێ یان ژی دیاریەکێ، ئەز ساخکرنا ئەڤێ رۆژێ ژلایێ ھەڤژینان ب تشتەکێ دروست دبینم، ژبەرکو د جڤاکێ مەدا بویە چاڤلێکرن و ب جوان نابینم ژلایێ سێنگلا بھێتە ساخکرن و ل گەل داب و نەریت و جڤاکێ مە ناگونجین ھەموو کەس ساخ بکەن، مرۆڤ دشێن دھەموو روژێن سالێ دا سووز و پەیمان و دیاریان پێشکێشی ھەڤژین و ئەڤیندار یان خێزانا خوە بکەت).
ب گورەی راپرسیەکێ کو ل سەر تورێن جڤاکی ھاتیە ئەنجامدان و ٢٦٥ کەسان پشکداری تێدا کریە، ٧٧،٧% ژ تاکێن جڤاکی ساخکرنا رۆژا ئەڤینداران و ڤالینتاینێ ب تشتەکێ باش نابینن خوە ئەگەر دیاریەکا نورمال ژی مرۆڤ پێشکێشی ھەڤژین یان ئەڤینداران خوە بکەت، د بەرامبەر دا ٢٢،٣% کەس ساخکرنا رۆژا ئەڤینداران ب تشتەکێ باش دبینن، ئەگەر خوە دیاریەکا نورمال پێشکێشی ھەڤژین و ئەڤینداران خوە کریە.
جیھاد موستەفا، شارەزایەکێ جڤاکی یە ل سەر بابەتی گۆت: (ڤالینتاین ئێکە ژ رۆژێن جیھانی و زێدەتر گرێدای ملەتێن رۆژئاڤایی یە، ئیسلامێ چوو پەیوەندی ب ڤێ یەکێ ڤە نینە، نوکە کو خواندنێن جودا بۆ ڤالینتاین ھێنەکرن و بویە چاڤلێکرن و کەلتورەکێ نە جوان و زێدەتر ل سەر بنەمایێ دەم بوراندن دھێتەکرن، پێدڤی یە جڤاکێ موسلمان خوە ژ ڤێ یەکێ ب پارێزیت، بەلێ ھەر رۆژەکا کو مرۆڤ ببینیت تێدا کەسێ/کەسا بەرامبەر دێ دلخوش بیت زۆر گرنگە ئەو رۆژ ب پێشکێشکرنا گولەکێ یان دیاریەکێ یان ھەر رێیەکا دی یا بھێزکرنا پەیوەندیێن دناڤبەرا وان دا گرنگە ژبەرکو مەرەم ل ڤێرە ئەوە کو خێَزان زێدەتر بەختەوەر بیت و پەیوەندیێن وان بھێز بن).
زێدەتر گۆت: (ل ڤان سالێن دوماھیێ تایبەتی پشتی تەکنولوجیا پێشکەفتی و تورێن جڤاکی دەرکەفتی، جڤاک ب گشتی ژ پەیوەندیێن جڤاکی و خێزانی دویرکەفتی، جورە ساربوون کەفتیە د پەیوەندیێن جڤاکی و خێزانی دا، لەوا دڤێت ب ھەر بزاڤەکێ بیت جارەکا دی گەرماتیەک بکەڤیتە د وان پەیوەندیان دا و بھێزە بھێزکرن ڤە).
جیھاد رێکانی، خودانێ گولخانا نازک کو تایبەتە ب فروتنا گولا و دیاریێن ھەڤژین و بووک و زاڤا ل دەڤەرا شێلادزێ، دیارکر ئەو سالانە ب ھەلکەفتا رۆژا ئەڤینداران بەرھەڤیێن باش بۆ فروتنا دیاریان دکەن و گۆت ژی: (نوزانم کا ژێدەر و دیرۆکا رۆژا ئەڤینداران ژ کیڤە ھاتیە و مەرەم پێ چیە؟، بەلێ ب دیتنا من تشتەکێ خراپ نینە کو دڤێ رۆژێ دا یان ھەر رۆژەکا دی بیت، ھەڤژین یان ئەڤیندار دیاریەکێ پێشکێشی بەرامبەرێ خوە بکەن ئەگەر حەلالێن ھەڤدوو بن، ژبەرکو ئەڤ یەک دێ نوو بوونەکێ ئێخیتە د پەیوەندیێن وان دا، پرانیا ئەو کەسێن کو دیاریان ژی ل دڤان رۆژان دا دکرن گولن، ژ گولان ژی گولا سوور ژبەرکو نیشانا ئەڤینیێ یە، دیسان پشکەک ژ وان کەسێن کو گول و دیاریان ل دەڤ من بدەن ب ھەلکەفتێن سەر سال و جەژنە بون و داوەت و شەھیان و دایکبوون و ھەتا دوماھیێ یە).
