پتریا دەمێ خوە بۆ خزمەتكرنا بەرهەمێن (جگەرخوین) ی تەرخانكریە
عەیشان عەجیب . زاخۆ:
سەگڤان عومەر سندی، نڤیسەرەكێ باژێڕێ زاخۆیە، د ژیێ چاردە سالیێ عاشقێ بەرهەمێن هوزانڤانێ مەزن (جگەرخوین) ی، لەورا پتریا دەمێ خوە ژبۆ كۆمكرن بەرهەمێن وی و ڤەگوهاستنا وان ژ پیتێن لاتینی بۆ پیتێن ئارامی تەرخان كرییە.
ناڤهاتی دبێژیت: جگەرخوینی (42) پەرتووك نڤیسیبوون و (10) ژ وان دیوانێن هوزانان بوون، سالا (1984) دیوانا جگەرخوینی (ڕۆناك) ب دەست من كەفتن، لێ ژبەر كو وی دەمی نڤیسینێن جگەرخوینی ژ لایێ ڕژێما عێڕاقێ ڤە د قەدەغەكری بوون، من ب ڤەشارتی دخواندن، ژ سالا (1996) هەتا (2002) من هەموو دیوانێن وی یێن هوزانان پەیدا كرن و من دخواست بەرهەمێن جگەرخوینی پتر بۆ خەلكێ دەڤەرا بەهدینان بدەمە نیاسین و خەلكێ مە ب تایبەتی قوتابییێن زانكۆیان مفایی ژێ ببینن و وەسا ناڤێ جگەرخوینی ژی ناهێتە ژبیركرن، لەورا من گەلەك بزاڤ كرن بەرهەمێن وی ژ پیتێن لاتینی بۆ پیتێن ئارامی بهێنە ڤەگوهاستن، لێ كەسێ خوە لێ نەكریە خودان، لەورا من بڕیار دا ئەز ب وی كاری ڕابم و ل سالێن (2019) و (2023) من هەردو دیوانێن (سەورا ئازادی، هیڤی چاپكرن، من دیوانا (ئاگر و پرۆسك) ژی یا ب دووماهی ئینایی و دێ هێتە چاپكرن و نوكە ژی ئەز یێ كاری ل سەر دیوانا (كیمە ئەز) دكەم، بۆ زانین گەلەك ڕێز ل كارێ من دهێتە گرتن و ل ڤێ دووماهیێ سوپاسنامەیەك ژلایێ سەرۆكێ هەرێمێ نێچیرڤان بارزانی ژی یا بۆ من هاتی.
