پتریا سكرێن دهۆكێ پڕی ئاڤ بووینە و ئاڤا ژێر ئەرد پڕ بوویە
هەرهین:
رێڤەبەرێ ئاڤدێریێ ل پارێزگەها دهۆكێ دیاردكەت، بارانێن ڤێ دووماهیێ گەلەك مفایێن خوە هەبووینە ژ بۆ بلنكرنا ئاستێ ئاڤا ژێر ئەرد و پربوونا سكران ل سەرانسەری پارێزگەها دهۆكێ نێزیكی 58 سكر هەنە و 90% پڕی بووینە و د پلان دایە ئەڤ سالە و ل سالێن بهێت ژی سكران دروستبكەین، چونكو توبۆگرافیا پارێزگەها مە گەلەك یا گونجای یە ئەڤ سكرە لێ هەبن.
ئەندازیار هێژا عەبدولواحد، رێڤەبەرێ ئاڤدێری ل پارێزگەها دهۆكێ بۆ رۆژنامەیا ئەڤرۆ دیار كر، د دەمەكێ كێم دا رێژەكا مەزن یا بارانێ باری و ئەڤە ژی ئێك ژ سالۆخەتێن دیاردەیا مەترسیدارە، وەكو گوهۆرینێن كەش و هەوای نە و لەهیان چێدكەت د 24 دەمژمێران دا نێزیكی 200 ملیمێن بارانێ ل دهۆكێ و دەوروبەرێن وێ بارینە و ئەڤە چەندین سالە ئەڤ رێژا مەزن یا بارانێ نەهاتیە و نە یا چاڤەرێ كری بوو و د پێشبینیا كەسێ دا نە بوو.
زێدەتر گۆت: ئەم وەكو ئاڤدێریا دهۆكێ ل رۆژا لەهی چێبووی ئەم ل گەل هەر سێ هۆبێن ئامێدیێ و شێخان و ئاكرێ ل سەر خەت بووین و مە زانیبا ل هەر جهەكێ سكرەكێ مە، مەترسی هەبوویە، یان ئاڤرێژەك چێبوویە ب رێكا تیمێن مە و و ل دووڤ پێچبوونا بەردەستێن مە و وەكو هەماهەنگیەكا باش ل گەل رێڤەبەرێن مە یێن پارێزگەها دهۆكێ و پارێزگاری و قایمقام و رێڤەبەرێ ناحیێ ئەم هەموو ل سەر خەت بووین و شیاین ك‌ونترولا وێ لەهیێ بكەین.
خویاژی كر، بەردەوام تیمێن مە سەرەدانا وان سكران دكەن یێن مەترسی ل سەر هەی دكەن و ڤان بارانان باشیا خوە هەبوویە و نێزیكی 58 سكر ل پارێزگەها دهۆكێ هەنە و 90% سكرێن مە ژ ئاڤێ پر بووینە و دەمێ خەزنا سكران زێدەدبیت ئێكسەر ئاڤا ژێر ئەرد ژی زێدە دبیت و ئێك ژ مفایێن سكران ژی ئەوە ئاڤا ژێر ئەرد زێدە دبیت و پشتی هاتنا ڤان بارانان مە هزر د چێكرنا هندەك سكران كریە و خوشبەختانە نوكە هەشت سكر د وارێ جێبەجێكرنێ دانە، دوو ل ئاكرنێ نە و ئێك ل شێخان و ئێك ل سێمێلێ و سێ ل ئامێدیێ و ئەڤە ژی ئەو جهن دێ بنە جهێ مفای و بەری نوكە ژی وەكو نهالەكێ بوون و ئاڤ رێژەك هەبوو چو مفا ژی نەدهاتە وەرگرتن و د پلان دایە ئەڤ سالە و ل سالێن بهێت ژی سكران دروستبكەین، چونكو توبۆگرافیا پارێزگەها مە گەلەك یا گونجایە ئەڤ سكرە لێ هەبن.
ئەندازیار هێژای ئەو چەندە ژی گۆت: نوكە رێڤەبەریا مە مژوولی هندێ یە جویێن كونكریتی چێكەین، چونكو گەلەك جو هەنە هێشتا ئاخن و یێن گوندانن و گەلەك داخوازی بۆ مە دهێن ب رێكا هوبێن كارگێری و هوبێن چاندنێ ناحیا و قەزا و د پلان دایە و ب ئانەهیا خودێ چەندین جو ب چەندەها كیلومەتران و ئەو جویێن ئاخێ ببنە یێن كونكریتی و ئاڤ ب دروستی بگەهیتە بیسان و رەزێن وان و ل گەل وان بركان ئەوێن مفا ژێ دهێتە وەەرگرتن بۆ چاندنێ و نوكە چەندین برك ل بەر دەستێ مە هەنە و د پلان دایە بهێنە چێكرن و بیرێن سەر ئەرد بهێنە پاقژكرن و مفا ژ وێ ئاڤێ بهێتە وەرگرتن.
ئەو یەك ژی نە ڤەشارت، ئەم ڤێ چەندێ هەموویێ دكەین ئاڤا سەر ئەرد ب كاربینین نەكو ئاڤا ژێر ئەرد، چونكو ئاڤا ژێر ئەرد سامانێ نفشێ ل دووڤ مەیە و دڤێت ئەم پارێزین و ل سالا 2014 هەتا 2020 گەلەك داخازی و ئاریشێن جوتیاران كەفتبوونە سەرئێك و یا دیارە ژی ژ بەر نەهاتنا بودجەی ب رێیا حكومەتا عیراقێ و ئەو شەرێن سەپاندی ب سەر مە دا هاتین و شەرێ داعشێ و حەشدا شەعبی و ئەو قەیرانێن ب سەر مە داهاتین و بەردەوام حكومەتا عیراقێ ڤی شەری ل گەل مە دكەت و كابینەیا نەهێ ژ سالا 2020 ئەم شیاینە گەلەك كارێن باش بكەین، بەلێ نابیتە پێگۆهورەك د چەند سالان دا چ بۆ نەكەی و بهێی سێ چوار سالان بكەی.
