پتریا قوتابیان ل وه‌رزێ دووێ ئاستێ خوه بلنددكه‌ن
ئه‌ڤرۆ، سالار محه‌مه‌د دۆسكی:
هژماره‌كا مامۆستا ئاماژه دكه‌نه وێ چه‌ندێ كو ل وه‌رزێ دووێ ئاستێ زانستیێ قوتابیان نزم دبیت، هه‌مان ده‌م به‌رۆڤاژی هه‌یه و دیاردكه‌ن كو ئاستێ زانستی بلند دبیت ب بهانا كێم بوونا پرۆگرامێن خواندنێ .
نزار سه‌لیم سه‌عید، رێڤه‌به‌رێ قوتابخانا سیریێ یا كه‌ڤن سه‌ر ب په‌روه‌ردا قه‌زا ئامێدیێ ڤه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: هه‌بوونا گه‌له‌ك بهێڤه‌دانا ل وه‌رزێ دووێ یێ خواندنێ دبیته ئه‌گه‌رێ كو قوتابی ژ خواندنێ دوور بكه‌ڤن و ئه‌ڤ بهێنڤه‌دانه هه‌می ژی فه‌رمی نه دسالناما په‌روه‌ردێ دا هاتینه و گه‌له‌ك جاران ژی حه‌فتیه‌كێ دا چه‌ند بهێنڤه‌دان هه‌نه و قوتابی رۆژێن بهێن ژی په‌رتووكا نائینن، هه‌لكه‌فتا 18 شواتێ رۆژا قوتابیان گه‌له‌ك قوتابخانا ئاهه‌نگ كربوون و هنده‌كا وانه كربوون و هنده‌ك ب جلكێن كوردی بوون و ئه‌ڤان هه‌میان مارتێكرن ل سه‌ر ئاستێ زانستی یێ قوتابی هه‌یه و ئه‌ڤ هوكاره و گه‌له‌ك هوكارێ، دی دبنه ئه‌گه‌رێ نزمبوونا ئاستێ زانستی ل ده‌ڤ قوتابی.
رێڤه‌به‌رێ قوتابخانا سیریێ یا كه‌ڤن نه‌ڤه‌شارت گۆت: هه‌یڤا ئادارێ گه‌له‌ك بهێنڤه‌دان تێدا هه‌نه و پتریا زارۆكان ل گه‌ل خێزانێن خوه دچنه سه‌یرانا و ده‌ركه‌فتنا و ل گه‌ل هاتنا وان بۆ قوتابخانێ ئێدی گه‌له‌ك زه‌وقێ قوتابی ل خواندنێ ناده‌ت و هێدی هێدی ئاستێ وی دهێـته خوارێ و تایبه‌ت ل ڤی وه‌رزی هه‌یڤا چار ره‌مه‌زانا پیرۆز دكه‌ڤیته تێدا و كارتێكرن ل سه‌ر قوتابی و مامۆستان دێ هه‌بیت.
مامۆستا محه‌مه‌د ئه‌حمه‌د مشه‌ختی، رێڤه‌به‌رێ قوتابخانا ئوناس یا بنه‌ره‌ت سه‌ر ب په‌روه‌ردا ئامێدی ڤه بۆ به‌رپه‌رێ په‌روه‌رده و زانكۆ رۆژناما ئه‌ڤرۆ گۆت: وه‌رزێ دووێ یێ هاریكاریێ یه بۆ قوتابیان و زێده‌تر ده‌لیڤه بۆ قوتابی هه‌یه بخوینت و پتر ده‌مێ هاریكاره بۆ خواندنێ هه‌یه و دیسا ل سه‌ر رێڤه‌به‌رێ قوتابخانێ پێدڤی یه زێده‌تر ئاسنكاریا بكه‌ت بۆ قوتابیان .
هه‌مان رێڤه‌به‌ر قوتابخانێ گۆت: سه‌ره‌دانێن به‌رده‌وام و هشیاری ل سه‌ر زاوكان دڤێت خێزانێ هه‌بیت، چونكه ل قوناغا سنێله‌یی دڤێت گه‌له‌ك هشیاری هه‌بیت و مخابنی ڤه چاڤدێری نینه و گه‌له‌ك قوتابی هه‌تا دره‌نگ شه‌ڤ ل سه‌ر جادانه ل گه‌ل هه‌ڤالانه و ئه‌ڤێ چه‌ندێ كارتێكرنه‌كا راسته‌وخو ل سه‌ر مێشكێ قوتابی و ئاستێ زانستی هه‌یه.
رێڤه‌به‌رێ قوتابخانا ئوناس ئه‌و ژی گۆت: پشته‌ڤانیا قوتابیان یا شاشه ژلایێ دایك و بابا ڤه گه‌له‌ك كارتێكرن ل سه‌ر دهێته‌كرن و گه‌له‌ك قوتابی ناهێنه پولێ دا و دیسا رێنمایێن نوو ژی كارتێكرن ل سه‌ر ئاستێ زانستی هه‌یه و گرنگه بنیاته‌كێ باش بۆ ئاڤاكرنا مرۆڤه‌كێ‌َ ساخله‌م بهێته ئاڤاكرن و دانان و تایبه‌ت ل قوناغا سه‌ره‌تایی و گه‌له‌ك قوتابی هه‌نه ل پولێن نه‌هێ هێشتا خشته‌ی نوزانن و باشتره گرنگی ب بنیاتی بهێته‌دان و 60% یا گرنگیدانێ دڤێـت ل پولێن ئێك و دو بیت و گه‌له‌ك وه‌لاتان مامۆستایه‌كێ خزمه‌تا 15 سالان نه‌بیت نابیت پولا ئێك و دووێ بێژیت .
میدیا عه‌زیز فه‌تح والله، مامۆستا ل قوتابخانا یارمه‌ند یا ئێڤاران سه‌ر ب په‌روه‌ردا دهۆك یا رۆژئاڤا ڤه بۆ به‌رپه‌رێ په‌روه‌رده و زانكۆ گۆت: ئاستێ قوتابی زێده‌تر ل وه‌رزێ دووێ بلند بیت چونكه پرۆگرامێ خواندنێ ل وه‌رزێ ئێكێ گه‌له‌كێ مه‌زنه و ل وه‌رزێ دووێ پرۆگرامێ خواندنێ ب ساناهتره و كێمتره و پرۆرگرام سڤك تره و زه‌ووقێ قوتابیان زێده‌تر ل خواندنێ ده‌ت ل وه‌رزێ دووێ و دبینم ئاستێ زانستی ل وه‌رزێ دووێ باشتره و زێده‌تر قوتابیان ده‌لیڤه هه‌یه نمرێن خوه بلند بكه‌ن.
هه‌مان مامۆستا ئه‌و ژی گۆت: هه‌یڤا شواتێ هه‌میێ چ بهێنڤه‌دان نه‌بوون و هه‌تا دگه‌هیته هه‌یڤا ئادارێ و ئه‌ڤ ساله ژی بهێنڤه‌دان كێم بووینه ل دووڤ سالناما په‌روه‌ردێ.
هه‌مان مامۆستا گۆتژی: گرنگه موبایل و ئایپه‌ت كێم د ده‌ستێ قوتابیان دابن و كێشا كێم بوونا ئاستێ زانستی زێده‌تر دایك و بابن پتریا خێزانا ده‌لیڤێ ده‌نه قوتابیان، دیسا گه‌له‌ك زارۆكان ژی نازدار دكه‌ن و دایك و بابێن نوكه نه وه‌ك دایك و بابێن به‌رێ نه و گه‌له‌ك زارۆكان نازدار دكه‌ن و ناهێلن نه مامۆستا و نه ئه‌و بخوه ژی گرنگیێ و دیفچوونه‌كا زێده‌تر ل سه‌ر قوتابی هه‌بیت.
