پتری چار هزار تەرمان ماینە ل ژێر ئاڤاهیێن هەرفتی دا ل مۆسلێ
ئەڤرۆ نیۆز ، زنار تۆڤی:
دۆخێ ناڤا باژێرێ کەڤن یێ مۆسلێ ل رەخێ راستێ یێ وا باژێری،هەتا نوکە وەك خۆیە و هیچ نەهاتیە گوهۆرین،هەکە تۆ تەماشەی هەر لایەكێ بكەی،دێ وێرانیێ و ئاڤاهیێن هەرفتی بینی،د هەمان دەمدا هەلمەتێن لێگەریانێ بۆ تەرمێن مری ل ژێر داروبەرێن ئاڤاهیێن هەرفتی دا بەردەوامی هەیە و بێهنا تەرمێن مریان ژی ئەو دەڤەرە ب تەمامی گرتیە.
ئەبو موزەفەر ئێکە ژ وەلاتیێن باژێرێ مۆسلا کەڤن و گوتیە، مۆسل وەك خۆ مایە، ئەو سۆز و گوتنێن حوکمەتێ ل دەزگەهێن راگەهاندنێ گوتین بۆ ڤەگەراندنا ئاواران و بوژاندنا وی باژێری دوورن ژ راستیێ،ئەز تا نوکە نەشێم جهێ مالا خۆ و شەقامێ نێزیك مالا خۆ ب بینم، چونكی ئەڤ دەڤەرە هندە وێران بوویە و ب سەر ئێکدا رووخیایە،مرۆڤ نەشێت چو تشتان لێ بنیاسیت. هەروەسا ئاڤەدانكرن و دروستكرنا ڤان هەموو خانی و ئاڤاهیێن هەرفتی گەلەک دڤێت، بەلێ پاڤژکرنا ڤان دەڤەران کارەکێ گران نینە و پێدڤیە حوکمەت بگریتە ستوویێ خۆ،دیسا دبێژیت، تا نوکە ئەم دناڤ كەمپاندا ماینە و چو جهێن دیتر مە نینن بچینێ، ژیانا مە د دۆخەکێ كارەساتباری دایە و ئەم بێتاقەت و نیگەران بووینە و ئەم ب تەمامی بێ ئومێد بووینه.
فەرەح سەراج پەرلەمانتارێ عێراقێ و نوونەرێ باژێرێ مۆسلێ ئاشكرا كریە،پتر ژ چار هزار تەرمێن خەلکێ ل ژێر ئاڤاهی و خانیێن هەرفتی دا ماینە ل مۆسلا کەڤن و تا نوکە ئێک ژی نە ئینایە دەر،حوکمەت ژی بێدەنگ یا مەی و هێشتا ئێک پێنگاڤ نەهاڤێتیە.
هەروەسا مەحمود بجاری ئەندامێ جڤاتا پارێزگەها مۆسل بۆ عەرەبی ئەلجەدید گوتیە، خەلکێ باژێرێ مۆسل بێ هیڤی و نیگەرانن ژ ڤەگەریانا وان بۆ ودەڤەرێن وان، حوکمەتێ ژی تا نوکە دینارەک ژی تەرخان نەكریە بۆ ئاڤەدانكرنا وی شاری و هاڤێتنا پاشماوێن جەنگی ل وی شاریدا.
مۆسل ل خزیرانا 2014 پشتی رەڤینا 60 هزار چەكدار و سوپا و هێزێن نافخۆ یێن عێراقێ كەفتە دەستێ تیرۆریستێن داعش،پشتی زێدەتر ژ سێ سالان مایە ل ژێر دەستێ داعش،ل هەیڤا ئۆكتۆبەرا 2016 هەلمەتا رزگاركرنا مۆسلێ دەست پێكر و ل ئادارا 2017 مۆسل ژ تیرۆریستان هاتە پاقژکرن.
