پتری 40 هزار شتلێن داران گەهشتنە دهۆكێ و هەوەكا دارچاندنـێ دەستپێـكر
ب ئامادەبوونا د. عەلی تەتەر، پارێزگارێ دهۆكێ و ئەنیل بورا ئینان، بالیۆزێ توركیا ل بەغدا و ئیرمان تویجۆ، قونسلێ توركیا ل هەرێما كوردستانێ و چەندین رێڤەبەرێن پەیوەندیدار هەوەكا دارچاندنێ ل پاركەكا گشتی ل تاخێ گرێ سوور ل سەنتەرێ دهۆكێ هاتە ئەنجامدان.
د وێ هەوا دارچاندنێ دا هژمارەكا وان شتلێن داران هاتنە چاندن، یێن ژباژێرێ دیاربەكر ل وەلاتێ توركیا ب هاریكاریا بالیۆزێ توركیا ل ئیراقێ و قونسلێ توركیا ل هەرێما كوردستانێ هاتینە دابینكرن كو هژمارا وان 40 هزار و 600 شتلێن دارێن كاژ و گویز و دارێن دی یێن جۆراوجۆر بوون.
پارێزگارێ دهۆكێ سوپاسیا حكومەت و بالیۆز و قونسلێ توركیا كر، هەمبەر دابینكرنا وان شتلێن داران و دووپاتی ل سەر پەیوەندیێن خۆرت و مێژوویی و بازرگانی و كلتۆری و جڤاكی د ناڤبەرا هەدو وەلاتان دا كر.
پاشی ل كوچكا مێڤانداریان پارێزگارێ دهۆكێ هەڤدیتنەك ل گەل بالیۆز و قونسلێ توركیا و شاندێ د گەل دا سازكر و د هەڤدیتنێ دا بەحسێ رەوشا دەڤەرێ و نوونترین پێشهاتێن رۆژهەلاتا ناڤین و پەیوەندیێن هەرێما كوردستانێ ل گەل حكومەتا توركیا ژ روویێ سیاسی و ئابووری و بازرگانی و كلتۆری و جڤاكی و چاوانیا پێشئێخستنا وان پەیوەندیان ب گشتی هاتە كرن.
