پتری 50% کانیێن ھشکبوویێن دەڤەرا بارزان زاینە ڤە
ئەڤرۆ نیوز، نەوزاد ھلۆری:
دەڤەرا بارزان ئێکە ژ وان دەڤەرێن کوردستانێ کو زوورترین کانیێن ئاڤێ تێدا ھەنە، بەلێ ژبەر کێم بارینا بارانێ ل چەند سالێن بوری ھژمارەکا زور یا وان کانیان ھشک ببوون یان ئاڤا وان کێم ببوو، بەلێ ئەڤ سالە ژ بەر بارینا بارانێن زۆر پتری ٥٠% ژ کانیێن ھشک بووی جارەکا دی زاینەڤە.
عەبدولعەزیز بازی، وەلاتیەکێ گوندێ بازێ یە یێ سەر ب دەڤەرا بارزان ڤە بۆ ئەڤرۆ نیوز دیار کر کو گوندێ بازێ نێزیکێ ١٠ کانیێن ئاڤێ ھەنە و ب تنێ دو ژ وان خەلک مفای ژێ وەردگرن و گۆت: “نەبارینا بارانێ بوویە ئەگەر کو ھژمارەک ژ وان کانیان ھشک بن، بەلێ نوکە جارەکا دی ھەموو ئەو کانی زاینەڤە و ئاڤەکا بوش ژێ دھێتەدەر و ئاڤەکا ساخلەم و زۆرە، ئەگەر بڤی رەنگی بەردەوام بن دێ رەوشا دەرامەت و چاندنێ ل دەڤەرێ بەر ب باشترڤە چیت”.
زێدەتر گۆت: “ھندەک ژ وان کانیان ئەڤە چەندین سالە ئاڤ تێدا نەزایی و خەلک ژ وان بێ ئومێدبوونە، پشکەکا دی ژی زۆر کێم ئاڤ تێدا ھەبوو، بەلێ نوکە سوپاس بو خودێ ژبەر ھاتنا بارانێن زور ئاڤێن کانیان ژی دووبارە زانەڤە و کەیفا خەلکی و جوتیاران بڤێ یەکێ زور دھێت”.
عەبدوللا محەمەد سەدیق ئەو ژی دانعەمرەکێ دەڤەرێ یە دیار کر کو ھندەک کانی ل گوند و دەڤەرا بارزان پشتی ھاتنا بارانان زانیە، ئەڤە پتری ٢٠ سالایە ئەو کانی نەزانیە و زێدەتر گۆت: (کانیێن ئاڤێ ل دەڤەرا بارزان د وەختێ خودا ژێدەرێ سەرەکی یێ ژیانا خەلکی بوو ب تایبەتی بو خەلکێ گوندان، بەلێ پشتی کو حوکمەتێ چەند پرۆژەکێن ئاڤێ لسەر رووباری دانایی، خەلک ژ کانیان و پاراستن و سەخبێریکرنا وان دوور بوو، ژلایەکێ دی ڤە ل ڤان چەند سالێن دووماھیێ باران بارین وەکو پێدڤی ل دەڤەرێ نەدباری، ئەڤ یەک بوویە ئەگەر کو کانی ژی ھشک بن بەلێ سوپاس بۆ خودێ ئەڤ سالە رێژەیەکا زور یا بارانێ باری و بوویە ئەگەر کو پتری ٥٠% ژ کانیێن دەڤەرێ دووبارە ب زێنەڤە”.
ھەژی گۆتنێ یە کول دەڤەرا بارزان پتری ھزار و ٢٠٠ ملم باران بارینە، پار سال ل ڤی دەمی نێزیکێ ٣٥٠ملم باران باریبوون، بڤێ یەکێ ژبلی زێدەبوون و زانا کانیێن ئاڤێ، ھەڤدەم دێ چاندن و دەرامەت ژی بەر ب باشتر ڤە چیت.
