پتری800 کەلوپەلێن فۆلکلۆری ل مۆزەخانا سەنتەرێ عەشتار ل زاخۆ هەنە
زاخۆ، دلۆڤان هالۆ:
ئەمین عیسا، بەرپڕسێ سەنتەرێ عەشتار یێ ڕەوشەنبیری و هونەری ل زاخۆ د دیدارەکێ دا بۆ ڕۆژناما ئەڤرۆ دیار کر کو پتری 800 کەلوپەلێن فلکلوری یێن هەمە جۆر ل مۆزەخانا فلکلوری یا سەنتەرێ مە یێ عەشتار هەنە کو مێژوویا وان بۆ 50 هەتا 300 سالان ڤەدگەریت، و ئەڤ کەلوپەلە گرێدایی کەلتوورێ مەسیحیان و جووهی و ئاینێن دی یە، و هندەك ژ ڤان کەلوپەلان خەلکێ د مال دا هەبوون و بۆ مە ئیناینە چونکی دزانن دێ ل دەڤ مە هێنە پاراستن، و هندەك ژی مە ب خوە پەیداکرینە.
ناڤهاتی ئاماژە ب وێ چەندێ ژی کر کو ئارمانج ژ ڤەکرنا ڤێ مۆزەخانێ ئەوە دا کو فلکلورێ مە ژ ناڤچوونێ بهێتە پاراستن، و نڤشێ مە یێ نوو بزانیت کا باب و باپیرێن مە د ژیانا خوە یا ڕۆژانە دا ئەڤ کەلۆپەلە بۆ چ بکاردئینان.
گۆت ژی:»ژ هەمی ئاین و تەخ و چینێن جڤاکی ژ ناڤخوە و ژ دەرڤەیی وەلاتی سەرەدانا مۆزەخانا مە دکەن و وێنە و ڤیدیۆیان بۆ خوە ل بەر دگرن، و کەیفا وان گەلەك ب کارێ مە دهێت، ئەم ژی د خزمەتا وان دانین و ناڤ و کارێ وان کەلوپەلێن فلکلۆری بۆ وان بەحس دکەین».
زێدەتر گۆت ژی:»کەلوپەلێن مە گەلەكن و مۆزەخانا مە ژی یا بچووکە، ژبەر هندێ هندەك کەلوپەل یێن هەین هندەك هەڤال و برادەران یا گۆتی دێ بۆ وە ئینین لێ مە جهـ نینە لێ ب دانین، لەوما ئەم داخوازێ ژ ئیدارەیا سەربخوە یا زاخۆ دکەین کو هاریکاریا مە بکەن و جهەکێ مەزنتر بۆ مە تەرخان بکەن، دا کو ئەم ڤان کەلوپەلان دانینە د جامخانەیان دا و ناڤێن وان و مێژوویا وان و کا ژ کیڤە هاتینە و کێ بۆ مە ئیناینە ئەم ل بەر بنڤێسین».
