پتر ژ حەفت هزار مریشكان ژ بەر هڕۆبای ل بارزان ژناڤچوون
ئامێدیێ، مەحمود نهێلی:
ژ ئەنجامێ هڕۆبایەكێ ب هێز پڕۆژەیەكێ خودانكرنا مریشكان ل گوندێ هەسنا ل دەڤەرا بارزان ژناڤچوو و پتر ژ حەفت هزار مریشكان مرار بوون.
خودانێ پرۆژێ ناڤهاتی دیار كر، شەڤا بۆری بایەكێ بهێز دەڤەر ڤەگرت و بوو ئەگەر بانێ پڕۆژەی نەمینیت و مریشك ژ سەرما دا و ژ بەر بایێ تەزی مرار ببن و گۆت: «دوهی سپێدێ زێرەڤانێ پڕۆژەی ئەم ئاگەهداركرینە ل سەر روودانێ، پشتی ئەم چووینە وێرێ دیار بوویە، كو بانێ پرۆژەی ل سەر رابوویە و مریشك ماینە بەر وی هرۆبای و ژناڤچووینە».
گۆتژی: «نێزیك دەهـ هزار مریشك د ناڤ پڕۆژەی دا بوون، ژ وانا حەفت هزار مرار بووینە و سێ هزار یێن ماین، ئەوێن مایی ژی ژ بەر سەرمایێ یێن نەساخ بووین، دیسا ب گوژمێ چاردە دەفتەرێن دۆلاری زیان گەهشتیە مە».
