پتر ژ ساله‌كێ یه په‌رده ل سه‌ر په‌كه‌رێ هونه‌رمه‌ند ته‌حسین تاهای نه هاتیه لادان
ئامێدیێ، مه‌حمود نهێلی:
په‌یكه‌رێ هونه‌رمه‌ندێ مه‌زن (ته‌حسین تاها) ی ل سیلاڤێ ئێكبوویه ژ هێمایێن باژێرێ ئامێدیێ، لێ ئه‌ڤه ده‌مه‌كه یێ ژ ناڤ دچیت و خراب دبیت، ئه‌ڤ یه‌كه ژی بوویه ئه‌گه‌رێ دلگرانیا ره‌وشنبیر و هونه‌رمه‌ند و هونه‌ر دوست و حه‌زژێكه‌رێن ڤی هونه‌رمه‌ندێ مه‌زن.
نایف چه‌لكی، رێڤه‌به‌رێ ره‌وشه‌نبیری و هونه‌ری ل ئامێدیێ بۆ رۆژناما ئه‌ڤرۆ دیاركر، كو راسته ئه‌وان ئاگه‌ه ژ بابه‌تی هه‌یه و دووڤچوونه‌كا ته‌مام یا بابه‌تی كریه و گۆت: پشتی مه سه‌را په‌یكه‌ری دای بۆ وێ چه‌ندێ ڤه‌كولینێ ل سه‌ر بكه‌ین و بزانین چاره‌سه‌ری چیه؟ بوومه دیار بوو كو ئه‌و جهێ نوكه په‌یكه‌ر لێ هاتیه دانان نه جهه‌كێ گونجایه ژ به‌ر وێ چه‌ندێ به‌رده‌وام خراب دبیت، له‌ورا ئه‌وان ب فه‌ر دیت په‌رده ل سه‌ر ڤی په‌یكه‌ری بهێته دانان هه‌تا كو دهێته نووژه‌نكرن.
ناڤهاتی دیاركر، كو وان ڤه‌دیتنه‌ك بۆ نووژه‌نكرنا ڤی په‌یكه‌ری چێكریه و بۆ لایه‌نێن په‌یوه‌ندیدار بلند كریه داكو دوباره بهێته نووژه‌نكرن، هه‌روه‌سا ل جهێ وێ ژی بهێته ڤه‌گوهاستن بو لۆفا دیكلۆكێ و ناڤێ وێ لوفێ ژی بهێـته گوهۆرین بۆ لۆفا ته‌حسین تاهای و ئه‌ڤه پتر ژ ساله‌كێ یه مه داخوازا خوه گه‌هاندنی، به‌لێ مخابن هه‌تا نوكه چ به‌رسڤ نه هاتینه، و ڤێ جارێ دێ ب ره‌نگه‌كی باشتر و ل جهه‌كی باشتر ئه‌ڤ په‌یكه‌ره هێـته دانان چونكو هندی بۆ ڤی هونه‌رمه‌ندێ مه‌زن بهێته كرن به‌رامبه‌ر وێ خزمه‌تا وی بۆ هونه‌رێ كوردی كری هێشتا یا كێمه.
