پتر ژ سێ هزار خێزانێن كێمدەرامەت ل دهۆكێ دێ بنە خـودان مووچـە
دهۆك، لەزگین و دلۆڤان:
دوهی 12/4/2026 تۆمارا بایۆمەتری ل پارێزگەها دهۆكێ دەست ب چێكرنا UPNی بۆ خێزانێن كێمدەرامەت ل دهۆكێ كر، ل هەردو بنگەهێن رێڤەبەریا پاراستنا تۆرا جڤاكی ل ئێتیتێ و بەنكا مالتایێ وەلاتی دشێن خۆ تۆمار بكەن.
رەزا نایف، رێڤەبەرێ گشتیێ چاڤدێری و گەشەپێدانا جڤاكی ل پارێزگەها دهۆكێ بۆ ئەڤرۆ گۆت: «سیستەمێ تۆرا پاراستنا جڤاكی هاتە دانان، ئەڤ پڕۆژە یێ بانكا نێڤدەولەتییە، سێ هزار و 200 خێزانێن كێمدەرامەت ب رێكا ڤی پڕۆژەیێ نوو دێ هاریكاریێن دارایی وەرگرن و بنە خودان مووچە ل پڕۆژەیێ پێشڤەبرنا تۆرێن جڤاكی».
ئەندازیار فەرسەت حسێن، رێڤەبەرێ تۆمارا بایۆمەتری ل پارێزگەها دهۆكێ بۆ رۆژناما ئەڤرۆ گۆت: «پڕۆژەیێ تۆماركرنا نوو بۆ ئەو كەسێن كێمدەرامەت یێن هاریكاریا حكومەتێ وەردگرن دەستپێكریە و ئەڤ پڕۆژە د ڤێ قووناغێ دا ب تنێ سەنتەرێ پارێزگەها دهۆكێ بخوە ڤە دگریت و ئارمانجا سەرەكی ئەوە، هەمی ئەو وەلاتیێن مفادار ژ ڤان هاریكاریان، بشێن د ناڤ ڤی پڕۆژەی دا بهێنە تۆماركرن و مفای ژێ وەربگرن».
