پتر ژ ٢٠ پڕۆژەیێن خزمەتگوزاری بۆ دەڤەرداریا سێمێلێ هاتنە راگەهاندن
ب مەرەما گەهاندنا پڕۆژەیێن خزمەتگوزاری ل سنوورێ دەڤەرداریا سێمێلێ دوهی 27/8/2023 د. عەلی تەتەر، پارێزگارێ دهۆكێ سەرا دەڤەرداریا سێمێلێ دا و ژ لایێ خەلیل مەحمود، دەڤەردارێ سێمێلێ پێشوازی لێ هاتە كرن.
پاشی پارێزگارێ دهۆكێ ب بەرهەڤبوونا د. ئیبراهیم شەرەفانی، نوونەرێ جڤاتا وەزیران كۆمبوونەك ل گەل دەڤەردار و رێڤەبەرێن ناوچەداریان و رێڤەبەرێن پەیوەندیدار ئەنجام دا.
د كۆمبوونێ دا پارێزگارێ دهۆكێ تەكەز كر كو ل دووڤ راسپاردێن مەسرور بارزانی، سەرۆكێ حوكمەتا هەرێما كوردستانێ گوژمەكێ پارەی، كو پتر ژ 18 ملیار و 580 ملیۆن دیناران بۆ دەڤەرداریا سێمێلێ هاتینە تەرخانكرن و گۆت: «هەژمارەكا پڕۆژەیێن خزمەتگوزاری یێن فەر و گرێدای ب ژین و ژیارا خەلكێ دەڤەرێ دێ هێنە بجهئینان، خواست كو پڕۆژەیێن فەر و گرنگ ل هەموو باژێر و كۆمەلگەه و گوندان بهێنە دەستنیشانكرن و ب یەكسانی ل هەموو جهان بهێنە بجهئینان».
هەروەسا پارێزگاری دیار كر كو د دەمەكێ نێزیك دا هەژمارەكا دی یا پڕۆژەیان ل دەڤەرێ دێ هێنە دەستنیشاكرن و بجهئینان.
پارێزگارێ دهۆكێ د كۆنگرەكێ رۆژنامەڤانی دا گۆت: «ئەو پڕۆژەیێن خزمەتگوزاری ل دووڤ راسپاردێن سەرۆكێ حوكمەتێ ل سنوورێ دەڤەرداریا سێمێلێ دێ هێنە بجهئینان و د هەمی بیاڤان دانە، وەكو: جاددەیێن ناڤخوەیی و ئاڤ و كارەب و رێكا سەرەكی یا كۆمەلگەها شاریا و باخچە و پارك و …هتد».
