پتر ژ 250 زارۆیان ل دهۆكێ كار دكه‌ن
ئه‌ڤرۆ، نه‌وزاد هلۆری:
زێده‌باری هه‌بوونا چه‌ندین قانون و رێسایان، كاركرنا زارویان ل سه‌رانسه‌رێ جیهانێ هه‌ر یا هه‌ی و دبیته دیارده، ل كوردستانێ ژی چه‌ندین زارۆ كار دكه‌ن كو هنده‌ك ژ وان نه‌چاریه و بۆ په‌یدا كرنا ده‌بارا ژیانێ یه، هنده‌ك ژی ژلایێ كه‌سانێن دی ب ده‌لیڤه دهێنه دیتن كو كار ب وان بكه‌ن.
لدور بابه‌تی یاسین محه‌مه‌د ماموستایه دیار كر، كاركرنا زارۆیان ئێكه ژ تاوان و دیاردێن هه‌ره كرێت دناڤ جڤاكی دا و نیشانه كو ئه‌و جڤاك هه‌تا راده‌یه‌كێ یێ پاشكه‌فتی یه، له‌وا دڤێت ب هه‌ر رێیه‌كا بیت زارۆ ل جهێن كاری بهێنه دوور كرن داكو ئه‌و زارۆ بشێن خوه په‌روه‌رده بكه‌ن و بخوینن.
ماموستای زێده‌تر گۆت: (وه‌كو نه‌ریت د كه‌لتورێ كوردی دا زارۆیان كار نه‌كریه، به‌لكو زارۆ ژلایێ دایك و باب و سه‌رپه‌رشتێن وانڤه هاتینه خودان كرن، د حاله‌تێ كو دایك و باب ب هه‌ر ئه‌گه‌ره‌كا هه‌بیت شیانێن خودانكرنا وان نه‌بن دڤێت حوكمه‌ت و رێكخراو و كه‌سانێن زه‌نگین وان خودان بكه‌ن، ده‌مێ كو ئه‌وێن ل سه‌ری ئه‌ركێ خوه بجه نه‌ئینن ل وی ده‌می زارۆ ژی نه‌چاره په‌نایێ ببه‌ته به‌ر كاری و بگه‌هیته هنده‌ك گروپ و كه‌سانێن دی و دبیت ئه‌و ژی وه‌كو خوه ره‌فتارێ ل گه‌ل بكه‌ن).
شێرزاد ره‌سول، رێڤه‌به‌رێ گشتیێ چاڤدێری و گه‌شه‌پێدانا جڤاكی ل پارێزگه‌ها دهۆكێ بۆ ئه‌ڤرۆ گۆت: (د چارچوڤێ دووڤچوون ل سه‌ر وان زارۆیێن كار دكه‌ن و ل گوره‌ی به‌رنامه‌یه‌كێ رێكخستی، ئه‌م ژ نێزیك دووڤچونێ ل سه‌ر وان زارۆیان دكه‌ین یێن كو كار دكه‌ن، ئه‌ڤجا چ ل جهێن تایبه‌ت و گشتی بن یان ژی ل سه‌ر جاددا بن و ئه‌م شیاین حه‌فت كه‌سان بگرین كو زارۆیان دده‌نه كاری و ئه‌وان بخوه ب ده‌لیڤه دبینن، له‌وا ل گوره‌ی قانوونێ مه ب هه‌ڤكاریا پولیسێن پارێزگه‌ها دهۆكێ گرتینه و ره‌وانه‌یێ دادگه‌هێ كرینه).
شێرزاد زێده‌تر گۆت: (به‌رنامێ مه بۆ پاراستنا زارویان و دووركرنا وان ژ كاری و زڤراندنا وان بۆ باوه‌شا خێزانێ و قوتابخانێ دێ یا به‌رده‌وام بیت، هه‌ر كه‌سێ زارۆیان بده‌ته كاری بێگومان دێ پێرابوونێن قانوونی ل هه‌مبه‌ر وان گرینه به‌ر، ل دهۆكێ پتری 250 زارۆیان كار دكه‌ن لێ ئامارێن دروست ل به‌ر ده‌ست نینن كا ل سه‌رانسه‌رێ پارێزگه‌ها دهۆكێ چه‌ند زارۆ كار دكه‌ن).
رێڤه‌به‌رێ گشتیێ چاڤدێری و گه‌شه‌پێدانا جڤاكی دیار كر ل گوره‌ی چه‌ند مه‌رجان هنده‌ك زارۆ كار دكه‌ن و گۆت: (نابیت ب چو ئاوای زارۆیێ ل خوار ژیێ 15 سالی كار بكه‌ت، ئه‌وێن ل سه‌ر ژیێ 15 سالی و 18 سالی ژی دڤێت كاره‌ك بیت كو د شیانێن وان دا بیت، مه‌ره‌م نه كار كرنا زارۆیان ئه‌وه كو بهێنه پاراستن و په‌یوه‌ندیێن وان یێن جڤاكی بهێنه رێكخستن و ئه‌رك و مافێن وان یێن قانونی بهێنه دابینكرن).
