پتر ژ 500 سەلكێن خوارنێ ل سەر قوتابیێن زانكۆیا زاخۆ هاتنە بەلاڤكرن
زاخۆ، دلۆڤان هالۆ:
د چارچوڤێ كارێن خێرخوازی و هەڤكارییا جڤاكی دا، ب هەلكەفتا هاتنا مەها ڕەمەزانا پیرۆز، ل ژێر چاڤدێری و ئامادەبوونا پ. د. دیار عەبدولكەریم سەعید، سەرۆكێ زانكۆیا زاخۆ و هاریكارێن سەرۆكێ زانكۆیێ، پتر ژ 500 سەلکێن خوارنێ ل سەر قوتابیێن پشكێن نافخۆیی یێن زانكۆیا زاخۆ هاتنە بەلاڤكرن.
ئەڤ كارێ خێرخوازی ژ لایێ گروپێ جیهان پشكا كەرەستێن خوارنێ و نەخوارنێ یا خودانێ وێ حەجی سەباح یەحیا سەعید هاتە ئەنجامدان.
سەرۆكێ زانكۆیا زاخۆ دەستخوەشی ل ڤێ پێنگاڤا مرۆڤی یا گروپێ جیهان كر و گۆت: «ئەڤ جۆرە هەڤكاریە نیشانا هەستێ بەرپرسایەتیێ یە بەرامبەر چینا قوتابیان، ب تایبەت د ڤێ مەها پیرۆز دا».
ژ لایێ خوەڤە قوتابیێن پشكێن ناڤخۆیی دلخوەشیا خوە ب ڤێ دەسپێشخەریێ دیار كر و سوپاسیا گروپێ جیهان كر بۆ خەمخۆریا وان یا بەردەوام د خزمەتا خەلكی دا.
