پتر ژ 800 هزار كەسان د ناڤ ئیراقێ دا ئاوارە نە
لەزگین جوقی
ئەندامەكێ لیژنا كۆچ و كۆچبەران ل جڤاتا نوونەرێن ئیراقێ دیار كر، پتر ژ 800 هزار كەسان د ناڤ ئیراقێ دا ئاوارە نە و پتریا ئاواران ل هەرێما كوردستانێ دناڤ پتری 30 كەمپان دا د ئاكنجی نە، ژ وانا ژی پتریا كەمپان ل دهۆكێ نە و رێژا هەرە مەزنا ئاواران خەلكێ شنگالێ نە».
شەریف سلێمان، ئەندامێ لیژنا كۆچ و كۆچبەران ل جڤاتا نوونەرێن ئیراقێ بۆ رۆژنامەیا ئەڤرۆ راگەهاند، ب تنێ ئێزدی هەتا 300 هزار كەسان ئاوارە نە و هەموو ژی خەلكێ شنگالێ نە دناڤ كەمپان و ژدەرڤەی كەمپان ئاكنجیی نە و ل نێزیك مووسلێ ژی كەمپێن ئاواران هەنە، هیڤدارین حوكمەتا ئیراقێ بریارا خۆ یا زڤرینا ئاواران بجه بینیت و پێنگاڤێن باش ب هاڤێژیت بۆ ئاڤەدانیا دەڤەرێن ئاواران، ب تایبەتی ژی شنگال گەلەك خەلكێ زەرەرمەندبووینە و پێدڤیە حوكمەت خەلكی قەرەبوو بكەت».
خۆیا كر، زڤرینا ئاواران ب نەچاری نابیت و پێدڤیە بریار د دەستێ ئاواران دابیت، یێ بڤێت ڤەگەریت یێ نەڤێت بمینیت و حوكمەتا ئیراقێ ب رژدی كاربكەت بۆ بجهئینانا بریارا زڤرینا ئاواران بۆ سەر جه و مالێن وان ل هەموو دەڤەران، حوكمەتا ئیراقێ گەلەك گیروبویە د بریارا زڤرینا ئاواران دا بۆ سەر جه و مالێن وان و چارەسەریا هەرە باش بۆ دوسەیا ئاواران ئەوە ئاوارە ڤەگەرنە سەر جهێن خۆ.
شەریف سلێمان، گۆتژی: ئێك ژ بەرنامێن سەرەكیێن حوكمەتا سوودانی ئەوە ئاوارە ڤەگەرنە سەر جه و مالێن خۆ و حوكمەتا سوودانی پێدڤیە ب فەرمی كار بكەت بۆ زڤرینا ئاواران، ژ سالا 2014ێ وەرە خەلك ئاوارە بووینە و هێشتا نەشیاینە ڤەگەرن، ئەڤە پتر ژ نەه سالانە خەلك یێ ئاوارە.
ئەندامێ لیژنا كۆچ و كۆچبەران ل جڤاتا نوونەرێن ئیراقێ ئاشكرا كر، گەلەك جاران حوكمەتا ئیراقێ بریارا بۆ ئاواران ددەت، لێ بجهنائینیت و بریارا ڤێ دووماهیێ یا زڤرینا ئاواران بۆ سەر جهێن وان بریارەكا باشە هەكە حوكمەتا ئیراقێ رەوشا دەڤەرێن ئاواران خۆش كەت و پرۆژەیان بجهبینیت و دەلیڤێن كاركرنێ بۆ خەلكی دابین بكەت و نابیت دوسەیا ئاوارەیان وەسا بمینیت و پێدڤیە دوسەیا ئاواران چارەسەربیت، چونكو بۆ ناڤودەنگیا ئیراقێ باش نینە و جهێ شەرمەزاری یە خەلكێ وێ دناڤ سنۆرێن دەولەتا خۆ دا ئاوارە بن، نوكە فشارەكا مەزن ل ئیراقێ یە بۆ زڤرینا ئاواران و ئەم داخوازێ دكەین حوكمەتا ئیراقێ ب ئەركێ خۆ رابیت و خزمەتا ئاواران بكەت».
