پرتووكێن ئەلكترۆنی خواندەڤانێن پرتووكێن چاپكری كێم كرینە
رەمەزان زەكەریا
عەزیز میكائیل، بەرپرسێ پەرتووكخانەیا گشتیا بلێ، د دیدارەكێ دا بۆ رۆژنامەیا ئەڤرۆ گۆت: پەرتووكخانەیا گشتی یا بلێ ل سالا ٢٠٠٠ ب هەڤكاریا ڕێكخراوا لاڤ بریجی یا ئەلمانی هاتیە ڤەكرن و هەتا نوكە نێزیكی (15000) پەرتووكێن جۆرا وجۆر و (7000) گۆڤارێن زانستی و ئەدەبی و (3000) ڕۆژنامە تێدا هەنە و ل دووڤ دەهـ پشكێن سەرەكی یێن سیستەمێ جیهانی هاتییە ڕێكخستن.
ناڤبری گۆت: بەری نوكە هەیڤانە ڕێژەیەكا باش نێزیكی (50) هەتا (80) پەرتووكان ژلایێ ڕێڤەبەریێن مە ڤە بۆ مە دهاتن، ب رەنگەكێ گشتی ڕێژەیا خواندەڤانان بەرامبەر سالێن بۆرێ كێم بوویە، نوكە پتریا كەسێن سەرەدانا پەرتووكخانەیێ دكەن قوتابیێن قۆناغێن بنەرەتی و ئامادەیی نە، كو پتریا جاران ب گرۆپ سەرەدانا پەرتووكخانەیێ دكەن، هەر چەندە خواندەڤانێن پێگەهشتی ژی هەنە، بەلێ گرانیا كارێ مە نوكە ل سەر چینا قوتابیانە، پلەیا ئێكێ ئەدەبیات تایبەت ڕۆمان، پلەیا دویێ دیرۆك، ب تایبەت دیرۆكا دەڤەرا بارزان دهێنە خواندن و نوكە ڕێژەیا خواندنا پەرتووكێن چاپكری كێم بوویە، هۆكارێ سەرەكی سۆشیاڵ میدیا و هەبوونا پەرتووكێن ئەلكترۆنی PDF یە كو ب ساناهی ب دەست دكەڤن.