پرتووکا هیڤی یێن خانمەكێ هاتە ئیمزاکرن
شاكر ئەتروشی:
ناڤەندا خانی یا رەوشەنبیری و راگەهاندنێ/پشكا رەوشەنبیری، دوهی رۆژا شەمبی، رێكەفتی دەهی ئادارێ، چالاكیەكا تایبەت بۆ دانەنیاسین و ئیمزاكرنا پرتووكا (هیڤی یێن خانمەكێ) یا خانما هەلبەستڤان (هەیفا دۆسكی) ل هولا ناڤەندێ ل ئاڤاهیێ تەلەفزیۆنێ گێڕا و هژمارەكا هەلبەستڤان و نڤیسەر و رۆژنامەڤان و كارمەندێن ناڤەندێ د بەرهەڤبوون.
د پەیڤا دەستپێكرنا وێ چالاكیێ دا بەرێز (ئیحسان ئامێدی) بەرپرسێ ناڤەندا خانی یا رەوشەنبیری و راگەهاندنێ پیرۆزباهی ل خانم هەیفایێ كرن ب هەلكەفتا چاپكرنا پرتووكا وێ و دیاركر وان ل ناڤەندا خانی گەلەك مەدیاكارێن ژن یێن چالاك هەنە و ئەو دێ بەردەوام پشتەڤانیێ ل بزاڤ و چالاكی یێن وان كەن.
پشتی خواندنا چەند هەلبەستان ئەو پرتووك كو ژ وەشانێن ناڤەندا خانی یە ب دیاری ل سەر بەرهەڤبوویان هاتە بەلاڤكرن.
ل دووماهیێ خەلاتێ سەندیكا رۆژنامەڤانێن كوردستانێ/لقێ دهۆك و یێ ئەنجۆمەنێ ئێكەتیا ئافرەتێن كوردستانێ و گۆڤارا سڤۆرە و هەردو كچێن هەلبەستڤانێ پێشكێشی وێ هاتنە كرن.
پرتووكا ناڤهاتی ژ (46) هەلبەستان پێك دهێت، دیزاینا بەرگی ژلایێ (ئەحمەد بیری) و یا ناڤەرۆكێ ژلایێ (ناجی بەدەل) هاتینە بجه ئینان و ژ (103) بەرپەران پێك دهێت، ل چاپخانا خانی هاتیە چاپكرن.
