پرسا سه‌رۆكاتیێ و دیتنه‌ك
پرسا سه‌رۆكاتیا هه‌رێما كوردستانێ، ئێك ژوان پرسانه یێن كو رۆژانه ل پرانیا كه‌نالێن راگه‌هاندنێ، هه‌تا ل مال و جهێن كاری ژی دهێته به‌حسكرن و هه‌ر كه‌سه‌ك ل دووڤ زانینا خوه شرۆڤه‌كێ دده‌تێ، لێ تشتێ دلخۆشكه‌ر ئه‌وه پرانیا خه‌لكێ كوردستانێ ل سه‌ر وێ چه‌ندێ دكۆكن كو مانا مه‌سعود بارزانی وه‌كو سه‌رۆكێ هه‌رێمێ د ڤێ قووناغێ دا ب تایبه‌ت ژی ل ڤی ده‌می ئێك ژ پێدڤیێن هه‌ره گرنگه و هه‌موو ل وێ باوه‌ریێ نه كو ب تنێ بارزانی دێ شێت ڤان قه‌یرانان ده‌ربازكه‌ت و پرسا كوردی به‌ر ب ئاسۆیه‌كێ گه‌شتر و بلندتر به‌ت.
بێگۆمانه ئه‌ڤ پرسا هاتیه د رۆژه‌ڤێ دا كو ب دیتنا من جارێ نه ده‌مێ وێ چه‌ندێ بوو، ژبه‌ركو مه ئاریشێن مه‌زنتر یێن هه‌ین، ژوانا شه‌ڕێ داعش و كێشه‌یێن مه یێن هه‌لاویستی ل گه‌ل به‌غدا، له‌ورا دڤێت ته‌ڤ حزبێن كوردستانی هه‌موو شیانێن خوه بۆ وێ چه‌ندێ دابانه كار كا دێ چاوان وان پرسان چاره‌كه‌ن؟ دووڤدا هه‌كه وان ڤیابا تشته‌كێ هۆسا بكه‌ن ئه‌و رێیێن قانوونی یێن هه‌ین، له‌ورا نه‌دبوو نوكه ئه‌ڤ بابه‌ته هاتبا ئازراندن، چونكو هه‌موو دزانن مه‌سعود بارزانی ب خوه ژی حه‌زژ پۆست و پله‌یان ناكه‌ت و گه‌له‌ك جاران وی خوه ب ده‌ڤێ خوه گۆتیه (ئه‌ز خوه سه‌رفه‌راز دبینم كو ب تنێ پێشمه‌رگه‌بم) ئانكو ئه‌و ب خوه حه‌زدكه‌ت به‌س پێشمه‌رگه بیت و بۆ وی پێشمه‌رگایه‌تی ژ هه‌موو پۆسته‌كی بلندتره، له‌ورا ئه‌ڤ بابه‌تێ هاتیه ئازراندن نه ژڤالاتیه‌كێ هاتیه، به‌لكو هنده‌ك ده‌ستێن ده‌ره‌كی و ناڤخوه‌یی د ناڤدا هه‌نه و كار ل بن سه‌رپه‌رشتیا ته‌ڤگه‌را گۆڕان و كه‌سایه‌تیا نه‌وشێروانی ب خوه دهێته برێڤه‌برن، ئانكو هزرمه‌ند و بجهئینه‌رێ وی پرۆژه‌ی هه‌ر ئه‌و ب خوه‌یه و نه‌وشێروان ب خوه ژی ژ هه‌موویان باشتر دزانین كو ل ڤی سه‌رده‌می و بۆ ڤێ قووناغێ كه‌س جهێ مه‌سعود بارزانی ناگریت و پرۆژێ سه‌رخه‌بوونا كوردان ژی دێ هه‌ر ل سه‌ر ده‌ستێن بارزانی بیت، لێ ژ ئه‌نجامێ نه‌ڤیان و چاڤ پێ نه‌رابوونی وان ئه‌ڤ بابه‌ته ئینا د گۆره‌پانێ دا و ئه‌و كه‌سێن ل دووڤ وان كه‌فتێن وه‌سا یێن فێركرین كو ب هه‌موو شێوه‌كی دژایه‌تیا بارزانی بكه‌ن، له‌ورا یێ ب رێیا كه‌نالێن خوه یێن سیبه‌ر به‌رنامێن جودا جودا چێدكه‌ن و هنده‌ك كه‌سێن چو ژ سیاسه‌تێ نه‌زانن یێ مێڤان دكه‌ن و هه‌ر ئێك یێ ته‌ڤره‌كی ل ئه‌رده‌كی دده‌ت، لێ سوپاس بۆ خودێ ملله‌تێ مه ژ هه‌موو پیلانێن وان مه‌زنتره و باش دزانن كو مه‌ره‌مێن وان كه‌سان د خرابن و ئارمانجا وان تێكدانه ڤێ ره‌وشێ یه یا كو ب سه‌دان سالان خوین بۆ هاتیه رێتن. هه‌كه ئه‌و راست دبێژن بلا ئه‌و ژی بتنێ چار چه‌كدارێن خوه بینه به‌رۆكێن شه‌ڕی و شه‌ڕێ داعش بكه‌ن، ئه‌و هه‌موو دزانن ل رۆژا ئێكێ یا شه‌ڕی هه‌تا نوكه سه‌رۆك مه‌سعود بارزانی ب كۆڕ و برا و برازا و پسمام و هه‌موو كه‌س و كارێن خوه یێن ل به‌رۆكێن شه‌ڕی و مل ب ملێ پێشمه‌رگه‌ی ڤه یێ شه‌ڕێ دوژمنان دكه‌ن ژپێخه‌مه‌ت وێ چه‌ندێ خه‌لكێ كوردستانێ ب ته‌ناهی و ئارامی بژیت.
