پرسێن ئاگرین هەنبەر بەرسڤێن ئارام ساردبن!
محسن عەبدلڕەحمان
(نیچێ د پەرتووكا خۆ یا ناڤداردا (ژ قەنجی و خرابیێ وێڤەتر – 1886) دبیژیت: «ئەگەر كێزەكی بكوژی تو قەهرەمانی، لێ هەكە پەلاتینكەكێ بكوژی تاوانباری، رەوشتی پیڤەرێن جوانكاری هەنە».
نیچێ ل ڤێرە نە بەحسێ «رەوشتێ مێشۆموران دكەت» ئانكو رەوشتێ سروشتی. بەلكو بەحسێ رەوشتێ مرۆڤانە، رەوشتەكی ل دۆر كاریگەرییا دیتنێ د «ستودیویێن وێنەگرتنێ»ڤە دچێكری، نە ل بێژگەهێن – منبر- هزری ب تێهزرینێن هوشمەند)
ل رۆژا 6 تەباخا 2025 ل پانزینخانەكا هەولێرێ قارەمانەكێ لەشجوانیێ، ئانكو وەرزشڤانە و وەرزش بەری هەر تشتێ (هونەر و سەلیقە و رەوشتە)، لێ دیارە ئەڤی كابرایێ مێهڤان یان گەشتیار هەر سێ نەبوونە، ئەو تنێ خودانی زەڤلەكێن بڤدایبوو، ئانكو ل كوردستانێ بیانی، سڤكاتی ب مرۆڤەكی كر و ئەرەب دبێژن (یاغریب كن ادیب) ئانكو مێهڤان ڤیابیت رێزێ ل وی جهی بگریت یێ سەرەدانا وی دكەت، لێ هوشمەندیا پتریا عەرەبا هێژ سەردەمێ بەعسییاتێ یە، دەمێ كوردستان/شیمال ئیراق و كورد /جیب عمیل/!
ئەنجامێ پالدانا كارمەندێ پانزینخانەیێ هەلبەت پشتی ئەزماندرێژیێ هاتییە، سڤكاتیپێكرنە نە ب تاكەكێ كارمەند، بەلكو سڤكاتییە ب هەر كوردەكی ژ بلندترین ئاست و ژووردا، كارمەندی ئەڤە زانییە، لەوما ڤەژەنا وی یا دژوار و ئێكسەر و راستەوخۆ بوویە، هەكە ناكوكی و شەرەدەڤ ژ سەرەدەریێن رۆژانەیە، لێ دژكارا كارمەندی بگەهیتە تڤەنگ و كوشتنێ! ئەڤە ل دویڤ وێنەیێن ڤیدیۆیێ! لێ دەنگ نەهاتبوو توماركرن دا بزانین پێش راهاڤێتن و تفەنگێ چ گۆتنە ئێكدو.
تا ڤێرە بابەت ئاساییە، جاران دو برا ب شەردچوونە و ئێكی یێ دی كوشتییە، لی یا سەیر ئەوە بابەت د راگەهاندنا ئیراقی دا» ژ مێشێ كرنە گامێش» هند مەزنكرن و ب دژایەتییا كوردان بو ئەرەبا دانەدیاركرن، ئانكو كراسەك ململانا نەتەوەیی كرنەبەر، وەسا دیارە كو پێشوەخت هندەك دەزگەهێن راگەهاندنێ خۆ ل بەر دەلیڤەكێ ڤەنابوو، دا جادا ئیراقی یا ئەو ب خۆ ژ مالا خودانی یا وێران و ژبەرئێكچووی، د دەمەكیدا گەرمییا سەقای و بێ كارەبی و وەرزێ چلییا (ئیمام حوسەینی) دا، كو خەلكێ باوەردار ب شیعەگەریێ پلەیا سەرگەرمییا وان ب چلییا ئیمامی ژ یا نەتەوەخوازەكێ كورد ل نەورۆزا پیرۆز زێدەتردبیت، چنكو بابەت گرێدای باوەریێیە و دەولەت خۆراكددەت!
لەورا داخۆیانیێن فەرمی یێن كوردان بتایبەت پارێزگارێ هەولێرێ چەند د هۆشمەند و ل سەرخۆبوون، یین هندەك كوردێن ژ ئەرەبا ئەرەبتر د سار و تەسلیمبووی بوون.
ئەڤ كریارە سەرباری ئێشانێ لی یا فەربوو، ب راست ئەرەبا و ب تایبەت ئەوێن ژ دەڤەرێن داگێركری (ماددێ 140) ب هەمی كەرب و كین و داكەفتنێن خۆڤە ب كۆم دهێن، دا هەمی گرێ و كۆلێن خۆ یێن دەروونی و شكەستنێن مێژوویی ب سەرێ مە كوردان دەركەن و ژینگەهێ پیسكەن و ئێمناهییا كوردستانی تیكدەن! شیعە ئەوان دچەوسینن و سووریا ژناڤچوو، ئیسرائیل یا كوكانێ ب ئەرەبا دكەت، تاكو خۆلیسەرییا غەززە ژبیرا ئەربا بر، د ڤێ رەشە رەوشێ دا ژبلی مە كوردان كەسێ نابیننن، ڤێ هەمی خەم و سەركوتكرنێ لێ ببارینن و ب سەری دا بداڕێژن، لەو چەند رۆژەكن و خودانێ زەڤلەكان دێ هێتە ژبیركرن.
هەر دوماهیێ دێ ڤەگەڕینە گۆتنا هزرمەند نیچەیی: «ئەگەر كێزەكی بكوژی تو قەهرەمانی، لێ هەكە پەلاتینكەكێ بكوژی تاوانباری، رەوشتی پیڤەرێن جوانكاری هەنە».
كوشتنا شیلانا كورد ب خێزان ڤە ل بەغدا و بدەهان تاوانێن كوشتنی یێ دەربازدبن، بۆچی ئەڤە ل ڤی دەمی هەلبەت یا بێ مەرەم نەبوویە (لحاجە فی نفس یعقوب)! لێ یاساێن یاریێ هاتنە گوهۆڕین چاوا هێزا زەڤلەكێن وەرزشڤانێ هەنبەر لوللییا تفەكا كارمەندی د رادەستبوون، وەسا هەنبەر گۆتارا دژوارا راگەهاندنا ئەرەبی، هێمنە بەرسڤا فەرمییا كوردی یا ئارام و ساڕكەربوو!
ب دیتنا من ئەڤە باشترین دەلیڤەیە حوكمەتا كوردستانێ هاتنا ئەرەبا یا بەرەللا رێكبێخیت، كو ب سەرەدانا هاڤینگەیان ڤە سنوورداربكەت، دا بەس زێدەگاڤییا ل سەر رەز و باخێن هەڤوەلاتییان بكەن! دیسان مفایێ ئابووری هەبیت و ئێمناهی هەرێمێ و پاكژیا ژینگەهێ بپارێزیت!
