پرۆسەیا خواندنێ
مهاباد تاجەدین
ئەڤا من دەربارەی قوتابخانەیێن مە تێبینی كری، سال بۆ سالێ رێژا سەركەفتنێ د دابەزینێ دایە، ئەرێ بۆچی؟ رەنگە ئەم هەموو ڤێ پرسیارێ ژخوە دكەین و مانە پێدڤییە ئەم ل رێگەچارەیان ژی بگەڕین، ژبەركو ئەڤ دابەزینە هەموو بۆ ماموستایی ناڤەگەڕن، بەلكو بۆ قوتابی ژی و بۆ دەیبابان و ئەڤ خالێن ئەز دێ ژێ بەحسكەم، ئەون یێن من تێبینی كرین، لێ یا دروست جهێن پەیوەندیدار ل سەر راوەستن و ب رێكا راگەهاندنێ و كومبوونێن ل گەل دەیبابان و ئێكەتییا ماموستایان دویڤچوونێن زێدەتر ل سەر بكەن ژ وان ئەگەرێن دەیباب گرنگیێ پێ نادەن، ئەنترنێتە و ئەڤ ئامیرێن زیرەك چ مۆبایل بن چ ئایپات و د دەستێ زارۆكان دا و ئەڤ موژیلاهیێن هەنێ ژی ب چەندین رێكان كارتێكرنێ ل سەر ئاستێ قوتابی دكەن، وەك لایەنێ وی یێ دەروونی و دیسان هەكە دەمەكێ دەستنیاشنكری بۆ ڤی قوتابی نەهێت دانان و بۆ نموونە دەیباب بێژنێ بتنێ دڤی ماوەی دا تە مافێ هەی ئەنترنێتێ بكار بینی و بتنێ هندەك سایتێن دەستنیشانكری، داكو چ كارتێكرنێن نەرێنی لسەر وان نەبن، بەلكو بكارئینانا وان ئامیران لبن چاڤدێریێ دێ هاریكاریەكا باش بۆ قوتابی هەبیت، خالەكا دی ژی دەما دەیباب ل دەف زارۆكێن خوە ب خرابی بەحسێ سیستەمێ پەروەردێ و ماموستایان دكەن و ئەڤە دبیتە ئەگەر كو قوتابی حەز و ڤیان بۆ خواندنێ نەمینیت.
دا كو جارەكا دی، حەز و ڤیانا خواندنێ بۆ قوتابی بزڤڕیت، لسەر هەر تاكەكی دكومەلگەهێ دا هندەك بەرپرساتیێ هەلگریت، ژ دایك و بابان و ماموستا و قوتابی ب خوە ژی. ئەگەر دایك رۆژانە دووڤچوونا زارۆكێن خو نەكەت، بێگومان دێ بەرەف خرابیێ چیت و پێدڤییە رۆژانە بیرا ل وانێن وان بینن و وان شیرەت بكەن و ل سەر ماموستا ژی پێدڤییە رۆژانە دەمەكی ژ وانا خوە تەرخان بكەت بۆ شیرەتان و پێشكێشكرنا سمیناران و بەشداریكرنا قوتابی دڤان بابەتان دا و قوتابی ب خوە ژی پێدڤیە یێ گوهدار بیت و هەر گاڤا مە شییا رۆلێ دەیك و بابان و ماموستای و قوتابی پێكڤە كارا بكەین، ئاستێ خواندنێ ژی ب خوە دێ یێ باش بیت.
