پرۆفایلی وه‌به‌رهێنانێ بۆ هه‌موو قه‌زا و ناحیێن پارێزگه‌ها دهۆكێ هاته به‌رهه‌ڤكرن
دهۆك، له‌زگین جوقی:
رێڤه‌به‌رێ گشتی یێ وه‌به‌رهێنانێ ل پارێزگه‌ها دهۆكێ دیار كر، پرۆفایلێ وه‌به‌رهێنانێ بۆ هه‌موو قه‌زا و ناحیێن سه‌ر ب پارێزگه‌ها دهۆكێ ڤه هاته به‌رهه‌ڤكرن و دێ ده‌لیڤێن وه‌به‌رهێنانێ ل قه‌زا و ناحیان هێنه دابینكرن.
كۆردو ئێحسان، رێڤه‌به‌رێ گشتی یێ وه‌به‌رهێنانێ ل پارێزگه‌ها دهۆكێ بۆ رۆژناما ئه‌ڤرۆ راگه‌هاند: “حوكمه‌تا هه‌رێما كوردستانێ گرنگیه‌كا مه‌زن دایه كه‌رتێ وه‌به‌رهێنانێ و بزاڤ هاتینه كرن كه‌رتێ وه‌به‌رهێنانێ ببیته ته‌مامكه‌رێ حوكمه‌تێ، بشێت ئه‌و پرۆژه‌یێن ل سه‌ر بۆدجه‌یا گشتی حوكمه‌ت نه‌شیای ئه‌نجام بده‌ت، ب رێیا كه‌رتێ وه‌ه‌رهێنانێ بهێنه ئه‌نجامدان، نه‌خاسمه ل سه‌ر ده‌مێ كابینا نه‌هێ یا حوكمه‌تا هه‌رێما كوردستانێ كار هاتیه كرن پرۆژه‌یێن وه‌به‌رهێنانێ ئه‌و پرۆژه بن یێن پێدڤیاتیا وه‌لاتیان پێ هه‌ی”.
گۆتژی: “ئه‌م بزاڤێ دكه‌ین وه‌به‌رهێنان ژ ناڤه‌ندا سه‌نته‌رێ پارێزگه‌ها دهۆكێ بهێته ده‌رئێخستن و ل هه‌موو قه‌زا و ناحیێن سه‌ر ب پارێزگه‌ها دهۆكێ ڤه ژی پرۆژه‌یێن وه‌به‌رهێنانێ بهێنه ئه‌نجامدان”.
ئاشكرا ژی كر، رێڤه‌به‌ریا گشتی یا وه‌به‌رهێنانێ ل پارێزگه‌ها دهۆكێ هه‌موو بزاڤ كرینه مۆله‌ت بۆ وان پرۆژان بهێته دان یێن كه‌رتێ وه‌به‌رهێنانێ، نوكه ل دهۆكێ پتریا پرۆژه‌یێن وه‌به‌رهێنانێ د بیاڤێ كه‌رتێ چاندن و گه‌شت و گوزاری و پیشه‌سازی دا دهێنه ئه‌نجامدان.
كۆردو ئێحسان زێده‌تر گۆت: “د ڤێ قووناغێ دا كار یێ دهێته كرن، ئه‌ردێ پێدڤی بۆ ئه‌نجامدانا پرۆژان بهێته دابینكرن، ل سه‌رده‌مێ كابینا نه‌هێ، ل دهۆكێ هه‌تا نوكه ب گوژمێ زێده‌تر ژ 565 ملیۆن دۆلاران سه‌رمایێ وه‌به‌رهێنانێ هاتیه كرن و 42 پرۆژه هاتینه ئه‌نجامدان، ژ وانا ژی پرۆژه‌یێن ئاكنجیبوونێ و بازرگانی و پیشه‌سازی و ساخله‌می و چاندن و گه‌شتیاری نه”.
