پرۆژه‌یێن خودانكرنا گۆلكان به‌ر ب زێده‌بوونێ نه
دهۆك، له‌زگین جوقی:
رێڤه‌به‌رێ سامانێ ئاژه‌لی ل پارێزگه‌ها دهۆكێ دیار كر كو ئه‌ڤ ساله رێژا ئه‌نجامدانا پرۆژه‌یێن خودانكرنا گۆلكان بۆ ڤه‌كوشتنێ زێده‌بووینه و دبێژیت: د سالا 2021ێ دا ل دهۆكێ 13 پرۆژه هه‌بوون، لێ نوكه 28 پرۆژه‌یێن خودانكرنا گۆلكان هه‌نه.
رێدیر سدقی، رێڤه‌به‌رێ سامانێ ئاژه‌لی ل پارێزگه‌ها دهۆكێ بۆ رۆژناما ئه‌ڤرۆ گۆت: “هه‌ر كه‌سه‌كێ بخوازیت پرۆژه‌كێ خودانكرنا گۆلكان ل پارێزگه‌ها دهۆكێ دانیت، گه‌له‌ك ئاسانكارێ بۆ دهێنه كرن، به‌ری نوكه بازرگانان گۆلك ژ ده‌رڤه‌ی وه‌لاتی دئینان، ب تایبه‌تی ژی ل به‌رازیلێ و ئێكسه‌ر ڤه‌دكوشتن و گوشتێ وان ل بازاری دهاته فرۆتن، پشتی مه‌رج هاتینه دانان و ئاسانكاری بۆ بازرگانان و ئه‌و كه‌سێن گۆلكان ب خودان دكه‌ن هاتینه كرن، رێژا ئه‌نجامدانا پرۆژه‌یێن خودانكرنا گۆلكان ل پارێزگه‌ها دهۆكێ گه‌له‌ك زێده‌بوویه”.
رێڤه‌به‌رێ سامانێ ئاژه‌لی ل پارێزگه‌ها دهۆكێ ئاشكرا ژی كر كو پرۆژه‌یێن خودانكرنا گۆلكان گه‌له‌ك زێده‌بووینه و ئه‌ڤه ژی بوویه ئه‌گه‌ر پارێزگه‌ها دهۆكێ هه‌تا 60% گوشتێ گۆلكان بۆ وه‌لاتیان دابین بكه‌ت.
رێدیرسدقی ئاماژه دا وێ چه‌ندێ ژی كو هه‌ر كه‌سه‌كی د سالێ دا پێدڤی ب پتر ژ 14 كیلۆیێن كوشتی هه‌یه و گۆت: “نوكه كار یێ دهێته كرن، پارێزگه‌ها دهۆكێ بۆ دابینكرنا گوشتێ گۆلكان پشتبه‌ستنێ ل سه‌ر خوه بكه‌ت، ئه‌و ژی ب رێیا پرۆژه‌یێن خودانكرنا گۆلكان”.
ناڤهاتی گۆتژی: “به‌ری نوكه ده‌مێ گۆلك دهاتنه د ناڤ پارێزگه‌ها دهۆكێ دا ئێكسه‌ر بۆ ڤه‌كوشتنێ دهاتنه بكارئینان، لێ نوكه نابیت گۆلك بهێته ڤه‌كوشتن و پێدڤیه هه‌ر گۆلكه‌كێ هه‌بیت د ناڤ پرۆژه‌كی دا بۆ ده‌مه‌كی بهێته ب خودانكرن و پاشی بهێته ڤه‌كوشتن”.
