پرۆژێ برێتش كانسل ل گه‌له‌ك ده‌ڤه‌را نه‌یێ گونجایه
ئه‌ڤرۆ، سالار محه‌مه‌د دۆسكی:
رێڤه‌به‌رێن قوتابخانا بۆجوون ل سه‌ر هنده‌ك خالێن پرۆژێ برێتش كانسل هه‌نه كو بدورستی بۆ رێڤه‌به‌ران نه‌هاتیه شرۆڤه‌كرن و دیسا پرۆژه ل گه‌له‌ك ده‌ڤه‌ران نه‌یێ گونجایه.
ئاده‌م محه‌مه‌د یه‌حیا، رێڤه‌به‌رێ قوتابخانا ئاریاس ل په‌روه‌ردا دهۆك یا رۆژئاڤا بۆ به‌رپه‌رێ په‌روه‌ردا و زانكۆ ل دور پرۆژێ برێتش كانسل گۆت: ئه‌و خولێن پشكداربووین وه‌ك رێڤه‌به‌رێن قوتابخانا نه لدووڤ ئاستێ پێدڤی بوو و زانیاری تێدا گه‌له‌ك دكێم وبوون و دیسا ئه‌و راهێنه‌رێن ئه‌ڤ خوله ژی دگۆتین شاره‌زای نه ل ئاستێ پێدڤی بوو، له‌وما گرنگه ده‌مێ ئه‌ڤ خوله دهێنه‌ڤه‌كرن زێده‌تر بابه‌ت یێ گشتی بیت و پتر زانیاری ل سه‌ر بهێنه‌دان دا رێڤه‌به‌رێ، قوتابخانا ژی بشێن داهێنانێ بكه‌ن.
رێڤه‌به‌رێ قوتابخانا ئاریاس زێده‌تر ژی گۆت: دبینم پرۆژه باشی و خرابیێن خوه هه‌نه و گه‌له‌ك خال ل گه‌ل پرۆژه‌ی هه‌نه ل گه‌ل ژینگه‌ها كه‌توارێ مه ناگونجیت بۆ نموونه گه‌له‌ك جاران قوتابخانه تووشی كێشێن دارایی دبن و گه‌له‌ك ئاسته‌نگ بۆ دروست دبن، لێ بگشتی خالێن پرۆژه‌ی باشی زێده‌ترن و گه‌له‌ك رێڤه‌به‌ر شاش دپرۆه‌ی گه‌هشتینه و گه‌له‌ك گرنگیێ ده‌نه ئاڤاهیێ قوتابخانێ و دبینم ئاڤاكرنا مرۆڤان گه‌له‌ك گرنكتره ژ ئاڤاهیێ قوتابخانێ گرنگی پێ بهێته‌دان.
مامۆستا ئازاد فه‌ریق عه‌لی، ریڤه‌به‌رێ قوتابخانا شاوریكێ سه‌ر ب په‌روه‌ردا رۆژهه‌لات ڤه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: گه‌له‌ك خالێن پرۆژه‌ی ل گه‌ل كه‌توارێ مه ناگونجیت و دبینم سه‌ركه‌فتن ڤی پرۆژه‌ی دا نینه و بتنێ رێڤه‌به‌رێ قوتابخانێ ماندی دبیت و چ مفا تێدا نینه و ئاستێ مامۆستا و قوتابیان پێش ناكه‌ڤیت و زێده‌تر ته‌مبلی تێدا هه‌یه و گه‌له‌ك مامۆستا هه‌نه 10 ساله ل گه‌ل من و شه‌رم ناكه‌ت خالێن ویێن لاواز تێدا بێژم و بتنێ چه‌ند خالێن سه‌ركه‌فتی هه‌نه و گرنگه دیفچوون ل سه‌ر بهێـته‌كرن.
رێڤه‌به‌رێ قوتابخانێ ئه‌و ژی گۆت: په‌روه‌ردێ داهات نینه قوتابخانێ بویاغ بكه‌ت و پتر گرنگیێ ده‌ته سه‌میانێن قوتابیان و شولێ من نینه بێژمه خه‌لكی وه‌رن قوتابخانا من بویاغ بكه‌ن و هه‌كه پاره‌ك ژ په‌روه‌ردێ بهێت رێڤه‌به‌ر دێ نه‌چاربیت گرنگیێ بده‌ته قوتابخانێ و هه‌می رێڤه‌به‌ر شه‌رم دكه‌ن پارا یان خوستنێ ژ ده‌وله‌مه‌ندا بكه‌ن و هه‌كه هنده‌ك بكه‌ن ژی دێ ڤێجا كه‌سانێن دی دیاربن كو شول ناكه‌ن.
هه‌مان رێڤه‌به‌رێ ئه‌و ژی گۆت: قوتابخانا من ل گوندانه و رێكخرا و نه‌شێ، بهێن سمیناران بده‌ن و چونكه یا دویره ژ باژێری و دیسا ته‌قیما مامۆستا د رۆژه‌كێ دا ناهێـته‌كرن و ره‌نگه وێ مامۆستا وێ رۆژێ كاودانه‌ك هه‌بیت و گرنگه ئه‌و پرۆژه چاف خشاندنه‌ك بهێته‌كرن چونكه ڤێ هه‌یڤێ بتنێ 57 هزار دینار په‌روه‌ردێ داینه مه و بۆ كاغه‌زێن قوتابخانێ ئه‌ز پارا ژ مامۆستا دبرم و پێدڤی بوو ل گه‌ل دانانا پرۆژه‌ی داهاته‌ك بۆ هاتبا ته‌رخانكرن و ئه‌ڤه ب هیڤیا خه‌لكی ڤه یا شخو یه چونكه ل گوندایمه و خه‌لك هه‌می یێ هه‌ژاره .
