پرۆژێ جوتسایدێ دھۆک بۆ بەردەرەش ھاتە ڤەکرن
شێخان، بارزان مزووری:
سەرۆکێ باژێرڤانیا کۆمەلگەھا چڕە بۆ رۆژناما ئەڤرۆ دیار کر کو جوتسایدێ سەرەکیێ د ناڤ کۆمەلگەھا چڕەی دا کو ھاتنوچوونا ھەرێمێ ھەمی ل سەر دەرباز دبیت، ب درێژاھیا دو کیلومەتر و ٦٥٠ میتران ب کۆژمێ پتر ژ ١٠ ملیۆن دولاران دھێنە دروستکرن.
مەلا ئەکرەم سەرۆکێ باژێرڤانیا کۆمەلگەھا چڕە دیار کر کو دو پرێن سەرەکی د ڤی پرۆژەی دا ھەنە و دکەڤنە د ناڤ کۆمەلگەھێ دا ژبەر ھاتنوچوونا ئاکنجیێن کۆمەلگەھێ چونکی ئەڤ رێیە قەرەبالغەکا مەزن ل سەرە، بگرە ژ ئۆڤەرپاسا کەلەکچی ھەتا ژ کۆمەلگەھێ دەرکەڤیت نھا ئێک ژ وان سایدا دھێتەڤەکرن و دێ کەڤیتە د خزمەتا شوفێران دا و گۆت “قووناغا دویێ یا پرۆژەی کو سایدێ دویێ یە دێ ب لەز کار ل سەر ھێتەکرن، دا خەلکەک بێزار نەبیت ژ ئاریشێن ھاتنوچوونێ و دپاراستی بن ژ روودانان”.
سەرۆکێ باژێرڤانیا کۆمەلگەھا چڕە خویا ژی کر کو پشتی دووماھیک ھاتنا ڤی سایدی ئاریشا قەرەبالغیێ دێ کێم بیت و ھەمی دێ مفای ژێ وەرگرن و گۆت “ھەر ژ دوریانا باعەدرێ ھەتا ناحیا رۆڤیا ئەڤ پرۆژە بوویە جوتساید و نھا کەفتیە د خزمەتا وەلاتیان دا”.
