پرۆژەقانوونەک بۆ پاراستنا گیانێ ب کارئینەرێن رێیێن گشتی دھێتە بەرھەڤکرن
ئەڤرۆ، حەمۆ محەمەد:
وەزارەتا ئاڤەدانکرن و ئاکنجیکرنێ ل حوکمەتا ھەرێما کوردستانێ کار ل سەر بەرھەڤکرنا پرۆژەقانوونا رێ و رێبارێن گشتی دکەت و بریکارێ وەزارەتا ئاڤەدانکرن و ئاکنجیکرنێ ژی دبێژیت: ئەڤ قانوونە دێ جھێ قانوونا رێیێن گشتی یا ھژمار ٣ یا سالا ٢٠١٢ گریت کو ل پەرلەمانێ کوردستانێ ھاتبوو دەکرن.
وەزارەتێ خویا کریە کو مەرەم ژ بەرھەڤکرنا ڤێ پرۆژەقانوونێ، رێکخستنا کارێن وەزارەتێ یە د بیاڤێ پاراستنا رێ و رێبارێن گشتی و پاراستنا گیانێ ب کارئینەرێن رێیێن گشتی یە، ھەر د ڤی چارچوڤەی ژی دا لژنا تایبەتا وەزارەتا ئاڤەدانکرن و ئاکنجیکرنێ ل دۆر بەرھەڤکرنا پرۆژە قانوونا رێ و رێبارێن گشتی ل ھەرێما کوردستانێ کۆمبوویە.
دیسا ب مەرەما پتر زەنگینکرنا پرۆژە قانوونێ، شیرەتکارێن دیوانا وەزارەتێ و رێڤەبەرێن گشتی یێن رێ و رێبار و ئاڤەدانکرن و ئاکنجیکرنێ، دیسا رێڤەبەرێن دووڤچوون و قانوونی و نوونەرێن قانوونی ل رێڤەبەریێن ناڤھاتی ل پارێزگەھێن دھۆک و ھەولێر و سلێمانیێ، پشکداری کۆمبوونێ بوون و تێبینی و دیتنێن خوە ل دۆر پرۆژەقانوونێ دیارکرن.
ئەڤە ژی د دەمەکی دایە کو وەزارەتا ئاڤەدانکرن و ئاکنجیکرنێ، د پلانا خوە یا چار سالی دا، پێداچوونێ د قانوونێن تایبەت ب وەزارەتێ ڤە دکەت، ژ وان ژی قانوونا رێ و رێبارێن گشتی.
