پرۆژەیێن خزمه‌تگوزاری يێن گرنگ ل مسێريكێ و خانكێ دهێنه ڤه‌كـرن
سێمێل، موسا خالد:
ئيدارا پارێزگه‌ها دهۆك ب گۆژمێ نێزيكى دو مليار ديناران پرۆژه ل هه‌ردو ناوچه‌داريێن خانكێ و مسيريكێ ڤه‌كرن و راگه‌هاند كو دێ ب ره‌نگه‌كێ به‌رفره‌هتر خزمه‌تا ڤان هه‌ردو ده‌ڤه‌ران هێته كرن.
دوهى رۆژا دوشه‌مبى رێكه‌فتى 16ى خزيرانا 2025ێ، ب ئاماده‌بووما د. عه‌لى ته‌ته‌ر پارێزگارێ دهۆكێ و خه‌ليل مه‌حمود ده‌ڤه‌ردارێ سێمێلێ، هژماره‌كا جاددا ل خانكێ و مسيريكێ ب درێژاهيا پێنج كيلۆمه‌تران و هۆلێن هه‌لكه‌فتان ل گۆندێن گرێ گه‌ورێ و كه‌مونا و ياريگه‌ها وه‌رزشى يا دايخستى ل خانكێ و چه‌ندين پرۆژێن دى ب گۆژمێ نێزيكى دو مليار ديناران ل سه‌ر بودجا پارێزگه‌ها دهۆكێ هاتينه چێكرن.
د داخۆيانيه‌كێ دا ل ده‌مێ ڤه‌گرنا پرۆژه‌يى، پارێزگارێ دهۆكێ دياركر كو ب گۆژمێ دو مليار ديناران پرۆژه ل هه‌ردو ده‌ڤه‌رێن خانكێ و مسيريكێ هاتينه ڤه‌كرن و گۆت: ئه‌ڤ هه‌ردو ده‌ڤه‌ره د مه‌زنن و پێدڤى يه به‌رده‌ام خزمه‌تا ڤان هه‌ردو ده‌ڤه‌ران بهێته كرن.
ژ لايێ خوه ڤه ده‌ڤه‌ردارێ سێمێلێ دياركر كو ل سێ چار سالێن بورى پتر ژ (376) پرۆژان ب گوژمێ 266 ملیار دیناران هاتینه چێكرن و نها (51) پرۆژه ل ژێر بجهئینانێ نه و گۆت: مه بۆ ساڵا 2025 پێشنیاز كریه(٥٨) پرۆژه ب كوژمێ (38) ملیار دینارا بهێنه دابینكرن.
