پرەكا بهێزە دناڤبەرا گەنج و دانعەمران دا
ئەڤرۆ
د وەرزێ بهارێ دا پرانیا خەلكی سەیرانا گوندیان دگێرن و ئەڤ سەیرانە بووینە ئەگەرێ پتر ب هێزكرنا پەیوەندیێن جڤاكی و هەڤنیاسینێ دناڤبەرا خەلكێ گوندی دا و ب رێیا ڤان سەیرانان كەلتۆر و دابونەریتێن گوندان ژی دهێنە ساخكرن.
دەربارەی سەیرانا گوندێ چەلكێ ل دەڤەرا بەرواری بالا، مستەفا ئەحمەد، بۆ رۆژناما ئەڤرۆ دیار كر كو گرنگیا سەیرانا گوندی یا سالانە ئەوە خەلكێ گوندی هەموو ل سەر ئاخ و جهـ و وارێ خوە كۆمڤە دبن و پتر ڤیان و ئێكگرتن دناڤبەرا خەلكێ گوندی دا پەیدا دبیت، دیسان ئەو كەسێن دلێ وان ژ ئێك مای دچنە دەف ئێكدو پێك دهێن.
مستەفا ئەو چەندە ژی دیار كر كو نوكە پرانیا خەلكێ گوندی چووینە باژێران و گەلەك ژ وان ژی چووینە دەرڤەی وەلاتی و گوت: (دبیت ئەم زارۆكێن هندەك ژ وان نە نیاسین، بەلێ دەمێ دبیتە سەیرانا گوندی، خەلكێ گوندی ئەوێن چووینە باژێران هەموو دهێن و گەلەك ژ وان ئەوێن چووینە دەرڤەی وەلاتی ژی دهێنە سەیرانا گوندی، لەوما تاكە رێیا دیتن و هەڤنیاسینا گوندیان بوویە سەیرانا گوندی و ڤیان پتر دناڤبەرا خەلكێ گوندی دا پەیدا دبیت، چونكی چو جاران هوسا خەلكێ مە كۆمڤە نابیت).
مستەفای د بەردەوامیا ئاخفتنێن خوەدا گۆت: (ل رۆژا سەیرانا گوندی، ئەم تەكەزییێ ل سەر هندێ دكەین كو خوارنێن كوردی بهێنە دروست كرن و گوندیێن مە جلكێن كوردی بكەنە بەرخۆ، گەلەك خێزان ژی پێكڤە خورانێ دخۆن، هەروەسا ئەڤە چەندین سالە ئەم ڤێ جۆرە سەیرانێ ل وەرزێ بهارێ دگێرین و گەلەك یا گرنگە سالانە ئەڤ سەیرانە بهێنە گێران، هەورەسا دناڤا سەیرانا گوندی كەلتۆر و دابونەریتێن گوندی دهێنە ساخكرن).
د. شێرزاد هرۆری، دناڤا سەیرانا گوندێ هرۆرێ دا، بۆ رۆژناما ئەڤرۆ دیار كر كو گرنگیا ڤان سەیرانان ئەوە نفشەكێ نوو دناڤا گوندی دا رابوویە و گەنج و دانعەمر زوو ب زوو ئێكدو نانیاسن و یێن بەربەلاڤ بووین ل پرانیا باژێران، ئەڤ سەیرانە بوویە ئەگەر كو خەلكێ گوندی دشێن ئێكدو ببینن و پتر هەڤدو بنیاسن و گۆت: (دیسان ئەو دابونەریتێن دناڤا گوندی ژی دا هەین، دناڤا سەیرانێ دا دهێنە ساخكرن، ب مەرەما وێ چەندێ كو ئەو دابونەریتە نەهێنە ژبیر كرن، دیسان گۆڤەند و یاریێن كوردەواری دهێنە كرن و خەلكێ گوندی خوارنێن كوردی بۆ ڤێ رۆژێ بەرهەڤ دكەن).
د. شێرزاد د بەردەوامیا ئاخفتنێن خوەدا دیار كر كە نەمانا ڤان سەیرانان، ئانكو نەمانا دابونەریت و كەلتۆرێ گوندان، هەروەسا ژن و زەلام و كور و كچ و زارۆك ژی جلێن كوردی دكەنە بەرخۆ، ئەڤە ژی رەوشەكا دیتر ددەتە سەیرانا گوندی، هەروەسا پشتی سەرهەلدانا پیرۆز، مە دەست سەیرانا گوندی كریە و گۆت: (ئەڤ چەندە یا بوویە نەریتەك و دڤێت سالانە سەیرانا گوندی بهێتە كرن، دیسان ب رێیا ڤێ سەیرانێ گوندی هەموو ئێكدو دبینن و پتر هەڤنیاسینی و پەیوەندیێن ب هێز دناڤبەرا گوندیان پەیدا دبن)
هروری گۆتژی: (خالا ژ هەموویان گرنگتر كو ئەم وەكو خەلكێ گوندی تەكەزییێ ل سەر دكەین پاراستنا ژینگەهێ و پاقژ راگرتنا وێ یە و مە لژنەكا تایبەت هەیە بۆ پاراستنا ژینگەهێ و رێنمای ل سەر سەیرانیان دهێنە بەلاڤ كرن، پشتی ب دووماهی هاتنا سەیرانێ، هەموو بەرمایكێن خەلكێ گوندی دهێنە راكرن و ئەم جهێ خۆ پاقژ دكەین، دیسان سەیران بوویە پرەكا بهێز دناڤبەرا گەنج و دانعەمران دا.
