پشتى ب ئه‌ڤينى شوو پێ كرى، حه‌ز ژ هه‌ڤالێ وى ژى كر
ئه‌ڤرۆ نيوز:
پارێزەرەکا دادگەھا زاخۆ بۆ روژناما ئەڤرۆ راگەھاند کو، کورەکێ و کچەکێ پەیوەندیەکا بھێز یا ئەڤینیێ ل گەل ئێکدو ھەبوو، لێ ل دەستپێکێ باب و برایێن رازی نە بوون وێ بدەنە وی کوری، ب بەھانەیا وێ چەندێ کو یێ ھەژارە، لێ ھەرچەوا بیت پشتی ھەولێن بەردەوام کچێ شوو پێ کر و بۆ ماوێ چاردە سالا پتر ل گەل ئێکدو مان و سێ زارۆ ھەبوون، لێ پشتی زەلامێ وێ زانی کو ھەڤژینا وی حەز ژ ھەڤالەکێ وی دکەت ھەڤژینا خوە بەردا.
پارێزەرەکا دادگەھا زاخۆ بۆ ئەڤرۆ دیار کر کو، پەیوەندیەکا عەشق و ئەڤینیێ د ناڤبەرا کچەکێ و کورەکێ دا ھەبوو، ڤی کوری چەندین جارا ئەڤ کچە خواست، لێ باب و برایێن وێ رازی نەبۆن کو کچا خوە بدەنێ، ب بھانەیا وێ چەندێ کو کوڕ یێ ھەژارە
و گوت: (لێ پشتی ھەولێن بەردەوام کوری کچ بۆ خوە خواست و بۆ ماوێ چاردە سالا پتر ل گەل ئێکدو مان و سێ زارۆ ھەبوون، پاشان زەلامێ وێ داخوازا ژێکڤە بوونێ کر ب بھانەیا خیانەتێ کو ژنا وی حەز ژ ھەڤالێ وی دکەت).
شیلان عەبدولرەحمان ئەو پارێزەرەیە گۆتژی: (دەمێ مە پسیار ژ ژنێ کری کا بۆچی خیانەت ل ھەڤژینێ خوە کریە؟ وێ ژنێ گۆت: زەلامێ من یێ ھەژار بۆ و ھەر شەڤ ھەڤالێن خوە د ئینانە د مالا مە دا و قومار ل گەل دکر و مەی ڤەدخار و زەلامێ من پشتی قومارێ ھەڤالێن خوە د ھێلانە ل مالا مە و ئەو ژ مال دەردکەفت، ژلایێ خوە ڤە زەلامی ژی گۆت: برا و ژن برایا من ئەڤ چەندە ئاشکرا کریە کو ھەڤژینا من حەز ژ ھەڤالێ من دکەت و ئێدی نەشێم ل گەل وێ ژنێ ژیانا خوە بەردەوام بکەم و ژنێ ژی ژ ھەموو مافێن خوە لێبورین کر و ھاتە بەردان و قەستا دەرڤەی وەلاتی کر ل وێرێ شوو کریە و زارۆ ژی بۆ زەلامێ خوە ھێلان).
د دەربارێ ڤێ روودانێ دا ڤەکولەرێ جڤاکی ئەحمەد سندی دبێژیت: (ھەکە بۆ ژنێ جارەکێ شەرم و شەرمزاری بیت بۆ زەلامی دەە جارکی شەرمزاریە دەمێ ھەڤالا دبەتە دناڤ پیروزیێن مالا خوە دا و قومارێ ل پێش چاڤێن زارۆ و ھەڤژینا خوە ل گەل دکەت و مەی ڤە دخۆن نە جڤاک نە ئایین و نە ژی قانوون ئەڤی تشتی قەبیل ناکەن، لەوا دووماھیا ڤان کەسان دێ یا ھوسا بیت و ئەنجامێ ڤان کریاران ھەلبەت دێ ئەڤە بیت).
