پشتی بورینا نهـ سالان رێو ره‌سمێن تاووسگێرانێ دێ هێنه ئه‌نجامدان
خانكێ، دلڤین ره‌شید:
پشتی بورینا نه‌ه سالا جڤاكێ ئێزدی ڤه‌قه‌تیان ژ گه‌را تاووسێ كو ژ ئه‌گه‌رێ تیرۆرستێن داعش و هه‌ر بارودۆخه‌كی ل سه‌ر كوردستانێ دا هاتی رێو ره‌سمێن تاووسی نه‌دهاتنه گێران، به‌لێ ئه‌ڤ ساله بابا شێخ و جڤاتا روحانی و میرێ ئێزدیان بریار دا بهێته گێران.
غه‌زال سلێمان وه‌ك مجێوره‌ك بۆ ئه‌ڤرۆ دیار كر، تاووس گێران رێو ره‌سمه‌كه د كه‌ڤندا دناڤ جڤاكێ ئێزدیان دا وه‌ك داب و نه‌ریته‌كی كه‌ڤنار دهاته گێران و گۆت: سالێ دو جارا دناڤ گوندێن ئێزدیان دا، ژلایێ جڤاتا رۆحانی و میرێ ئێزدیان ڤه، بۆ جارا ئێكێ ده‌مێ گه‌ریانا تاووسێ دهاته دیار كرن هه‌ر سال ئه‌ینیا پشتی جه‌ژنا سه‌رێ سالێ و جارا دووێ دووماهیا جه‌ما یا شێخادی گه‌را تاووسێ ده‌ستپێ دكه‌ته ڤه.
غه‌زالێ گوتژی: میرێ ئێزدیان و ئختیارێ مه‌رگه‌هێ هه‌ر سال هنده‌ك قه‌وال و دیندارا ده‌ست نیشان دكه‌ن داكۆ ل گه‌ل گه‌را تاووسێ بن دا رێو ره‌سمێن تاووسێ ل هه‌ر قوناغه‌كێ بگێرن.
مجێورێ‌َ ئه‌و چه‌ندی ژی گوت: بۆ زانین پێش وه‌خت هه‌ر گونده‌كێ تاووس ب چیتێ و ل گه‌را تاووسی یا سالا بوری مه‌له‌ك یا ده‌ستنیشانكری و به‌رانه‌ك ژخۆدانێ مالێ دهێته وه‌رگرتن دا قوناغا تاووسێ یا سالا بهێت ل مالا وی بیت و تاووسێن ئێزدیان گه‌له‌ك كه‌فنارن و هه‌ر ژ كه‌ڤندا تاووس دناڤ ئێزدیاندا دهاتنه گێران، ژبه‌ركو ئێزدی خان یا به‌رفره‌ه بوو.
دای غه‌زالێ دا دیاركرن ژی كو حه‌فت تاووس دناڤ ئێزدیان دگه‌ریان هه‌ر تاووسه‌ك بۆ ده‌ڤه‌ره‌كا ئێزدی خانێ بوو و گۆت: تاووسا عه‌نزه‌ل یا ده‌ڤه‌را مه‌رگه‌ها شێخان بوو، تاووسا شنگالێ یا ده‌ڤه‌را شنگالێ بۆ دبێژنێ تاووسا ئێزی، تاووسا حه‌له‌بێ یا ده‌ڤه‌را حه‌له‌بێ بوو، تاووسا خالتیا یا ده‌ڤه‌را خالتیا بوو، تاووسا زوزان یا ده‌ڤه‌را هه‌كاریا بوو، تاووسا مسكۆفیا یا ده‌ڤه‌را ئه‌رمه‌نستانێ و جورجیا بوو، تاووسا ته‌ورێزێ یا ده‌ڤه‌را ته‌ورێزێ بوو.
غه‌زالێ د ئاخفتنێن خوه یێن دووماهیێ دا دیار كر كو پشتی بورینا نه‌ه سالا جڤاكێ ئێزدی ڤه‌قه‌تیان ژ گه‌را تاووسێ كو ژ ئه‌گه‌رێ تیرۆرستێن داعش و هه‌ر بارودۆخه‌كی ل سه‌ر كوردستانێ دا هاتی ئه‌ڤ رێو ره‌سمه نه‌دهاتنه گێران و گۆت: به‌لێ ئه‌ڤ ساله بابا شێخ و جڤاتا روحانی و میرێ ئێزدیان بریار دا تنێ رێو ره‌سمێن تاووسا عه‌نزه‌ل ل میرگه‌ها شێَخان و بنكه‌ندی و قائیدیا و خانكێ بهێنه گێران، چونكێ ره‌وشا ڤان ده‌ڤه‌را نوكه یا ئارامه و ئێزدی لژیرَ سایا حوكمه‌تا هه‌رێما كوردستانێ رێو ره‌سمێن خوه یێن ئۆلی و جڤاكی دگێرن له‌ورا ئه‌ڤ ساله بریار هاته دان تاووس بهێته گێران.
