پشتی ب گرانی بریندار بوویم 18نشتەرگەری بـۆ من هاتینەكـرن
سالار محەمەد دۆسكی:
3 – 3
سەلمان شێخ مەمی ئەو ژی گۆت: ئەم چار سالان ماینە ل كەمپا مێردینێ ڤە ژ سالا 1988 هەتا 1992 بەلێ سالا 1991 ئەم هندەك هاتینە كوردستانێ و بتنێ خودێ دزانیت مە چ رەزالەت ل كەمپا دا دیتی یەوبن چادرا و بەر سرو سارمایێ و برسی و نانێ ژەهركری، ل كەمپا مێردینێ ژیانەكا گەلەك نەخوش بوو، پشتی سەرهلدانێ ئەم هاتینە كوردستانێ و ئەم وەك پێشمەرگە چووینە بارەگایێ لقێ ئێك وی دەمی (قادر قاچاخ) بەرپرسێ لقێ بوویە و بابێ من ئامر هێز بوو و ئەز ژی بوو مە جێگرێ هێزێ رێكەفتی 3/10/1992ێ دەمژمێر 11 و 55 خولەك و رۆژا شەمبی نەخوشترین رۆژا ژیانا من بوو ل دەڤەرا گولیا و گوندێ(سووریا) دشەڕەكێ چەسپاندنا قانوونێ دا و فرۆكێن توركیا هاتن و هاڤێتە مە و pkk و فرۆكێن توركیا ساروخ هاڤێـنە بارەگایێن مە هەشت هەڤالێن مە شەهید بوون، و ئەز ژی ب گرانی بریندار بووم و چ لەشێ من نەمایە برینە تێدانە و پشتی بورینا سێ رۆژان هشیار بووم من دیت یێ ل نەخوشخانا دهۆكێ و نشتەگەری بوومن هاتیەكرن و هەر ئێكسەر گۆتن دڤێت ببنە توركیا و ب فرۆكێ برمە (ئەنقرە) پتر ژ چار هەیڤان ل سەر پشتێ بوویمە و چ بزاڤ من نەبوویە نە ب دەستی نەب پیان و بتنێ شیام باخڤم و پشتی چەند نشتەگەریان دوی ماوەی دا من زانی من چاڤەكی خوە ژ دەست دا، دەستێ منێ چەپێ بریندار بوویە و پێ راستێ لاواز بوویە و گوهێ چەپێ كەربوویە، نەخوشترین تشت ئەوە وەكی ئەندامەكێ لەشێ خوە ژ دەست بدەی من هەمی لاوینیا خوە ژ دەست دا و بڤی رەنگی مایمە و سوپاس بۆ خودێ نوكە ب زارۆكم و زارۆكێن من مەزن بووینە و خودان خانی و ترۆمبێلم و ژیانا خوە ب خوشی دەربازدكەم.
سەلمان شێخ مەمی، بەحسێ سەربورا خوە ل گەل نڤێسینا هوزانێ كر و گۆت: دەمێ ل سالا 1988 ئەنفال ب سەرێ مللەتێ مە هاتین و مە چەكێ خوە دانا و ئەم چووینە وەلاتێ توركیان و ل كەمپان ئاكنجی بووین، ئەم بووینە پەنابەر ل (ئەرتوش) من هزرا نڤێسینا هەلبەستێ كرو من دەفتەرەكا (30) كاغەزی كری و پێنوس وی دەمی هەتا قوناغا پێنجێ سەرەتایی من خواند بوو و ڤیانا من بۆ هەلبەستێ هێدی هێدی فێربووم و من دەست ب نڤێسینێ كر، ئێكەم هەلبەستا من ل سالا 1989 ێ ل گوڤارا (كوچەر) ژهەژمارە (6) لاپەرە (18) ل وەلاتێ (سوید) ڤێسی و بەلاڤەكر، هەلبەستا من یا دووێ پشتی سەرهلدانێ ڤەگەریاینە كوردستانێ ل سالا 1992ێ بوویە ل گوڤارا (مەتین) بەلاڤ بوویە و بناڤێ (هوخەلكینو) پتریا هەلبەستێن من ل رۆژنامە و گوڤار و سازیێن راگەهاندنێ بەلاڤ بووینە و گەلەك فیستەڤالا پشكدار بوویمە، دیسا پتر ژ (40) هونەرمەندان من هوزان داینی وەك (بلند ئیبراهیم، هەڤال ئیبراهیم، سەمیر عەبدوللا، دیار حەسەن، سەربەست مالتایی، جەمال ئێغبال، شورەش ئیبراهیم، سەمیر زاخویی، عەمەر گوندی، عەبدوالقهار زاخویی، كەریم ل گەڤەرێ) گەلەكێن هونەرمەندێن ژی، زێدەباری من هەشت پەرتووكێن چاپكری هەنە و پتر ژ (15) پەرتووكا ماینە و هێشتا نەهاتینە چاپكرن.
هەمان پێشمەرگەیێ شۆڕەشا گولانا پێشكەفتنخواز ئەو ژی گۆت: ل سالا 1995 ئەو برایێ هەمی گاڤا ل گەل من و تایبەت دەمێ بریندار و چاڤێ خوە دامن وەك هەڤالا بوو ل گەل من و دو سێ سالان ژ من بچوویكتر بوو، 28/5/1995 دكەڤیتە كەمینەكا پەكەكێ و دهێتە شەهیدكرن و ئەڤە ژی قەدەرا خودێ بوویە، ل سالا 2015 برایێ منێ ژ هەمیان بچوویكتر قەستا دەرڤەی وەلاتی دكەت و مە هەمیان هاریكاریا وی كر ل وەلاتێ (بولغاری) یا ژ سارمادا وەغەردكر و دیارە قاچاخچیا هێلایە هەتا دگەهینە نەخوشخانێ ل 15/2/2015 وەغەردكر و پشتی دەربازبوونا هەیڤەەكێ تەرمێ وی دهێتە كوردستانێ ول گورستانا شێخ مەما دهێتە ڤەشارتن و ئانكو ئەم حەفت برا بووین و سێ خویشك نوكە ئەم پێنچ برا و سێ خویشكین.
پێشمەرگەیێ شۆڕەشا گولانا پێشكەفتنخواز، زێدەتر گۆت: ب هەژمار و پشتی من دەست ب چارەسەریا خوە كری من (18) نشتەگەری ل توركیا مویسل و بەغدا ئەنجامداینە، هێشتا یێ بریندار 13/12/1997 من شەهیانا خوە ئەنجامدا و هەڤژینا من كچ خالا من بوویە و مامۆستا بوویە و ب من رازی بوو كو مایمە ب چاڤەكی و پەككەفتی بوویمە وەك شەهیدەكی زندی و سوپاس بۆ خودێ دێ بنە 26 سال ئەم پێكڤە دژین ب خوشی و ژیانەكا شاد و بەختەوەر دەرباز دكەین.
پێشمەرگەیێ شۆڕەشا گولانێ، سەلمان شێخ مەمی بەحسێ بەردەوامی یا خوە دكەت ب خواندنێ و گۆت: ل سالا 2004 من قوناغا شەشێ سەرەتایی ب ل قوتابخانا دهۆك یا ئێڤاران ب دووماهی ئینا و ناڤنجی مللەتی ئێڤاران و ئامادەیی سیمەرخ و من نەشیا ب دووماهی بینم و من دەست ژ خواندنێ بەردا و 2019 چوومە پەیمانگەها رەند نوكە قوتابیێ قوناغا چارێ مە پشكا كارگێری كار و سالا داهاتی دێ بمە خودان باوەرناما دبلومێ.
