پشتی جەژنێ دێ هژمارەكا سترانێن نوو تۆماركەت
شاكر ئەتروشی:
سترانبێژ (فەرهاد سەدیق محەمەد) كو ب (فەرهاد شاوریكی) دهێتە نیاسین، د دیدارەكێ دا بۆ رۆژنامەیا ئەڤرۆ دیاركر كو ل سالا 1995 وی دەست ب سترانگۆتنێ كریە و ل سالا 1997 بەرهەمێ خوە یێ ئێكێ و 1999 بەرهەمێ دویێ بەلاڤكرینە، هەروەسا حەفت كلیپ ژی هەنە.
شاوریكی گۆت: نوكە ئەز بەردەوام دچمە دەوات و ئاهەنگان و سترانان دبێژم، سەبارەت كێمیا بەرهەمان ژی ئەو گرێداری كاودانێن ئابووری یە و پشتەڤانی ژی گەلەكا كێمە، لەورا سترانبێژ نەشێت سالانە یان هەر چو نەبیت دو سالان جارەكێ بەرهەمەكی چێكەت، لێ من چەند ستران حازركریە و پشتی جەژنێ دێ دەست ب تۆماركرن و كلیپكرنا وان كەم، هەروەسا دێ كۆكتێلەكی ژی تۆماركەم كو ئەو ژی ژ سێ سترانێن فۆلكلۆری پێك دهێن.
ل دووماهیێ گۆت: ژبلی سترانگۆتنێ ئەز سازێ ژی دەژەنم و هەكە سترانبێژی دیت لایەنەك دێ پشتەڤانیێ لێ كەت، یان كۆمپانیەك دێ سپۆنسەریا بەرهەمێ وی كەت چو پێ نەڤێت ئەو دێ ل پەیڤ و ئاوازێن باش گەڕیێت و بەردەوام دێ ستران و كلیپێن نوو چێكەت، بۆ زانین د دوەختێ خوە دا كەنالێ كوردستان تیڤی دو كلیپ و كەنالێ ڤین كلیپەك بۆ من چێكربوون و هیڤیا من ئەوە رۆژەك بهێت سترانبێژ بشێن ب بەرهەمێن خوە نانێ ژیارێ بۆ زارۆكیێن خوە پەیدا بكەن.
