پشتی رێكخستنا مە ئاشكرا بووی محمـود غلبیشی هاتە دەستەسەركرن و پاشی سێـدارەدان
دیدار، سالار محەمەد دۆسكی:
حەمید شیكەیی ئەو ژی دیاركر، كو چ جاران شەهید (محمود غلبیشی) كومبوون ب مە نەدكرن، چونكە ئەو بەرپرسێ (ئلیاس پیرۆمەری) بوو و (ئلیاس پیرۆمەری) كومبوون ب مە دكرن، و هەر تشتەكێ هاتبا شور دبوو دگەهشتە مە و تشتێ نهێنی بیرا من دهێت نە هەر كارێ من بوو ل بنگەهێ پۆلیسان من دكر، بەلكو هەر كومبوونەك و تشتەكێ گرێدایی دەڤەرێ بیت و گرێدایی خەلكێ مە بیت و مللەتێ مە ل بنگەهێ پولیسان من دگەهاندە بەرپرسێ خوە، و ئەوی ب رێكا خوە دگەهاندە (محمود غلبیشی) و بڤی رەنگی دهاتە بلندكرن بۆ سەركردایەتی یا مە.
هێشتا گۆت: پشتی سێدارەدانا (محمود غلبیشی) و چوونا (ئلیساس پیرۆمەری) بۆ ناڤ پێشمەرگەی، ئێدی شانا مە چ بزاڤ نەمان و كارێ مە وەك رێكخستن هەتا رادەكی هاتە راوستاندن، و ئێدی مە كارێ خوە یێ فەرمانبەریێ و پولیسێ بەردەوامی دایێ و پلەبەرزكرنا من هات، و ئەوان سالان خەلكێ دهۆكێ هەمی باش دزانیت ئەمنا دهۆكێ گەلەك هار ب بوو، و گەلەكا ب هێز بوو و كەسەك نەشیا هەر چ بكەت، لێ هەمان دەم هەر هزر و ڤیانا مللەت و وەلاتێ مە د سینگێ مە دا هەبوو، و ئەم د بەرهەڤ بووین بۆ هەر كارەكێ ب مە بهێتە راسپاردن، و خزمەتا گەل و وەلاتێ خوە بكەین، وی دەمی ل پێنوسێ نهێنی بووم و ئاگەهداری هەر تشتەكی بووم، و هەمی گاڤا ترس بوو و بەردەوام دەنگۆباسێن شورەشێ من زانین ومە كرنە نڤیسار و من دخواندن و ترس هەمی گاڤا دلێ بەعسیان دا هەبوون، سالێن هەشتێیان شەرەك ل گوندێ (ئەلندكێ) دروست بوو و پێشمەرگەی گەلەك ژ چەتان و لەشكەرێ ئیراقێ كوشتن و پشتەڤانیەكا جەماوەری ژ دهۆكێ و گوندان بۆ پێشمەرگەی چوو و خەلكێ دل سوتی بوو چونكە سالێن هەشتێیان بۆ خەلكی گەلەك نەخوش بوون و گەلەك زولم و تەعدا ل خەلكێ مە دهاتەكرن وی شەری دا مورالا خەلكێ مە و مللەتێ كورد گەلەك بلند بوون و كەسەكێ هزر و پێشبینی یا ئەوان مورالێ نەدكر، وی شەری نە بتنێ ل پارێزگەها دهۆكێ بەلكو ل سەر ئاستێ ئیراقێ ژی گەلەك دەنگڤەدا و ترسەكا مەزن بۆ ئەمنێ و حوكمەتا ئیراقێ دروست بوو.
هەمان رێكخستیێ نهێنی ئەو ژی گۆت: بەردەوام ئەم عاجز بووین چونكە تەعدایەكا مەزن ل مللەتی دهاتەكرن و هەر دەم ئەم برسیێن ئازادیێ بووین و مە دڤیا مە هەوایێ ئازادیێ هەلكێشابا یان ئازاد ئاخفت باین و كەس هەبووین ل ئەمنێ دا ب ناف باژێری كەڤیت یان كەسەك ل زالگەهێ هەبوویە دا ب ئازادنە تشتێ ڤیابا دا بێژیتە خەلكی و كەسەكێ نەشیا چ بێژیتێ ئەڤە هەمی عاجزی بوون و زولمەكا مەزن ل خەلكی دهاتەكرن.
هێشتا گۆت: دەمێ ل بنگەهێ پولیسان شەڤەكێ دورێن دەمژمێر سێی شەڤێ بوو و دەوری بووم و ب پیان دگەریاین و هەمان دەم من بدەستێ خوە هەر ل ئەوێ شەڤێ من بەلاڤووك ل دیوارێ قوتابخانا شورەش دان و چوومە مالا خوە و سپێدێ خەلكێ مە رابوون و دەنگڤەدا و گۆتن پارتی هاتینە و بەلاڤووك ل سیكا دهۆكێ ڤە كرینە و بوو قیامەت و هندی خەلك بوو یێ كەیف خوش بوو ب ئەڤی دەنگو باسی و هندی ئەمن بوو گەلەك یا پێ نەخوش بوو و گەلەك ترسیان و هزر كرن پێشمەرگە ل ناڤ باژێری نە وی دەمی زەوقێ مە گەلەكێ خوش بوو و هەر مە هزرا ترسێ نەدكر، سالێت هەشتێیان حوكمەتا بەعسا ب قوت بوو و ئەم نەشیاین چ بكەین لێ هەر دەم مە بەرەڤانی ژ مللەتێ خوە كریە و یا شیانێن مەدا بوویە مە یا كری.
هێشتا گۆت: دەمێ پولیس ل بنگەهێ پولیسان گەلەك رێڤەبەر بۆ بنگەهێ پولیسان هاتن وبیرا من دهێت دەمێ چوویمە بنگەهی ئێك هەبوو بناڤێ(بهائەدین) خەلكێ هەولێرێ بوو و دووڤ دا گەلەكێن دی هاتن و بگشتی پولیس نە دژوار بوو و بتنێ ئەمنا دهۆكێ یا دژوار بوو ودیفچوونێن هویر ل سەر خەلكێ مە دكرن و مە پێزانین ل سەر ئەمنێ نەبوو و بەلێ بنگەهێ پولیسان تەسیق ل گەل ئەمنێ هەبوو، بگشتی باوەری ب كوردان نەبوو بەلێ باژێرێ كوردان بوو و رێیا مەزن یا پولیسان كورد بوون و پولیسان چ دەستێ دا نەبوو و كورد نەدهاتنە وەرگرتن لدیف ڤیانا خوە ل ئەمنێ بهێتە دامەزراندن، بتنێ كوردەكێ مویسل نەبا هەتا ل ئەمنێ هاتبانە وەرگرتن و ڤێ دووماهیێ هندەك كورد ل ئەمنێ وەرگرتن وەك مەفراز ل بەر پێشمەرگەی یان خەلك نیشا ئەمنێ دان ئەما بۆ جهێن هەستیار چ كورد قەبوول نەدكرن.
حەمید شیكەیی ئەو ژی دیاركر كو ل هەوا ئەنفان خەلكێ دهۆكێ و كوردستانێ بگشتی ئاگەهـ ژ بابەتی هەبوو و دەمێ ئیناین مە گەلك صەمون و خارن هاڤێتینە ترۆمبێلان دا و ئەڤە یا مە پێ چێبوو.
حەمید شیكەیی ئەو ژی دیاركر كو ل سەرهلدانا پیرۆز ل بنگەهێ پولیسان بووم و دەمێ بوویە دورا ئازادكرنا باژێرێ دهۆك هەتا بانگێ مەغرب ل دەوامێ بووم و رێڤەبەر چوو لیوایێ جهێ سوپرماركێتا مازی یا نوكە و ئەم ماین و (كاوە فەیسەل) نزاركی ژی ئەفسەر بوو ل گەل مە و (كەمال كێستەی) هات و گۆت رەنگە ئەم بشێن بزاڤەكێ ئەف شەڤە بكەین و ئەم هاریكار بووین ل گەل وێ شەڤێ نەهاتەكرن و چوو شەڤا دووڤ دا بۆ مەغرب و مە ژی دەرگەه گرتن و هاتینە گرێ باسێ و زیندانی هەبوون بەلێ نە زیندانیێن سیاسی بوون و زیندانیێن سیاسی ل ئەمنێ بوون و بەلێ زیندانیێن بنگەهێ پولیسان من پێزانین ل سەر نەبوون وەك پێشتر من ئامژە پێكری ئەز ل پێنوسێ نهێنی بووم و سەرهلدانێ ژی دا پشكداربووم و سوپاس بۆ خودێ.
حەمید شیكەیی ئەو ژی ئاشكراكر كو پشتی كوچكا ملیونی یا سالا 1991 و خەلكێ مە دەربەدەر بووی و دووڤ دا زڤرینە مالێن خوە وی دەمی بارەگایێ لقا ئێك یا پارتی دیموكراتی كوردستان ل ناحیا (زاویتە) هاتەدانان وی دەمی (نێچیرڤان ئەحمەد) ل لقێ ئێك بوو و من گۆتێ دێ زڤرمە دەواما خوە بنگەهێ پولیسان وی دەمی حوكمەتا بەعس ل دهۆكێ بوو و (نێچیرڤان ئەحمەد) گۆت هەرە دەواما خوە و هەر تشتەكێ هەبیت مە ئاگەهدار بكە و دەنگوباسا بگەهینە مە و زڤریمە دەواما خوە و هەر تشتەكێ هەبا من كوپی دكر و كوپیەك بۆ لقێ ئێكا پارتی دیموكراتی كوردستان من رەوانەدكر.
حەمید شیكەیی ئەو ژی گۆت: دەمێ باژێر كەفتیە دەستێ كوردان دا (قادر قاچاخ) بەرپرسێ لقێ ئێك بوو و (فەتەح گولی) و (نێچیرڤان ئەحمەد) گۆتنە من ئەو ئێخسیرێن كەفتینە دەستێ مە رێكخستنەكێ بكە و دەرباز بكە و هەمی جندی بوون و ی دەمی مە دو مەنشە ئە هەبوون ل بنگەهێ پولیسان و مە نەهێلا بكەڤنە دەستێ كەسەكێ و مە ئەو ئێخسیر ب رێكا سوریێ دەربازكرن و دووڤ دا مە رێڤەبەریا پولیسان ڤەكر و مە رێكخەری ل گەل لقێ ئێك هەبوو و بەردەوام (نێچیرڤان ئەحمەدی) ئەو جیهات دانە مە وەك سەرپەرشت.
هێشتا گۆت: دەمێ فەرمانگەهێن بەعسیان خوە ڤەكێشاین بۆ دیرۆك پارتی دیموكراتی كوردستان رۆلەكێ مەزن دامن و بەرپرسایەتیێن مەزن دانە من و بوومە بەرپرسێ تەنگاڤیا پولیسان چەند سالان و رێزدار (فازل میرانی) وەك دیاری پارەك دامن گۆت بخوە ترۆمبێلەكێ پێ بكر و (دەمانجەك) دیاری دامن وبەردەوام هەتا 1996 خانەنشین بووم و نوكە كارێ جوتیاریێ ل گوندێ خوە دكەم.
ل دووماهیێ گۆت: ئەم چ جارا نەپەشێمانین ژ ئەڤا مە كری و هەر كارەكێ مرۆڤ بۆ مللەتێ خوە بكەت جهێ سەرفرازیێ یە و خودێ جهێ كەسێن وەغەركری بكەتە بەهشت و یێ دژیانێ دا ژیێ وان درێژ بكەت.
