پشتی سه‌ركه‌فتنا (AKP) دوو پرسێن گرنك ل پێش ئه‌ردوگانی نه
دبیتن ئه‌نجامێن هه‌لبژارتنێن ئێكی مژدارێ بو هنده‌ك لایه‌ن وكه‌سان سپرایز بیت، بێ گومان پارتییا داد و گه‌شه‌پێدان ل ده‌مێ په‌سه‌ندا بریارا دووباره هه‌لبژارتنا كری، پشت راست بو كو دێ ئه‌نجامێن باشتر و پتر بده‌ست ڤه ئینێت، له‌وانێ ژی پێداگیری ل سه‌ر هندێ كر كو ئه‌نجام باشتربن، دڤی ده‌می دا چه‌ندین پێنگاڤێن مه‌زن و چاره‌نڤێسساز هاڤێتن، پشتی هه‌لبژاتنێن 7 ی خوزه‌یرانێ و پێنگاڤا هه‌ره سه‌ره‌كی و بوێری به‌ستنا كونگرێ (پێنجێ ) بو ل ئه‌نقه‌ره، چه‌ندین گهورین ئه‌ڤی گونگرێ ب خوه‌ڤه‌دیتن ل سه‌ر ئاستێ سه‌ركردایه‌تیا پارتیێ، ژ لایه‌كێ دیڤه چه‌ندین ئالوگورێن لیست و پالیوراوێن خوه كرن ل سه‌ر ئاستێ توركییا ل هنده‌ك باژێرا پالێوراوێن خو گوهارتن و كه‌سێن باشتر ل جهێ وان دانان و ژبلی ڤێ چه‌ندێ ژێ AKP)) دان وستاندن و دیدارێن به‌رفره دگه‌ل سازایێن ئابورێ و سه‌ندیكا و رێكخراوێن جڤاكێ سڤیل ئه‌نجام دان، هه‌می یان ژی كاریگه‌ریا راسته‌وخو ل سه‌ر پیڤاژوێ هه‌لبژارتنا هه‌بویه ل تركییا، بێ گۆمان دناڤ به‌را ڤان دوو هه‌لبژارتنان دا(AKP) پینگاڤێن بوێر و باش هاڤێتن، هه‌تا كو شییا ڤان ئه‌نجامان بده‌ست ڤه‌بینت.
ب مخابنی ڤه لایه‌نێ دیتر مفا ژ ده‌لیڤه‌یه‌كا مێژوویی وه‌رنه‌گرتن نه‌خاسمه پشتی كو ئه‌نجامێن باش ژ هه‌لبژارتنێن 7 ی خوزه‌یرانێ بده‌ستڤه ئیناین و ئاماده نه‌بوون به‌شداریێ د ئاڤاكرنا حكومه‌تێ دا بكه‌ن، هه‌روه‌سا بیر ل ڤان چاكسازیێن (AKP)نه‌كرن و ئه‌ڤ لایه‌نه هه‌رمان چاڤه‌رێ ئه‌نجامێن خوه یێن به‌رێ.
خویایه كو بڤان ئه‌نجامان ئانكو بده‌سته‌ڤئینانا (317)كورسیان(AKP) دێ ب سه‌رێ خوه حكومه‌تێ دروست كه‌تن، به‌لێ ژبلی گرنگی دان ب لایه‌نێ ئابوری ل توركییا و گه‌شه وپێشڤه‌چوونا، دوو پرسێن گه‌له‌ك گرنگ و كویر ل پێش حكومه‌تا نو یا(AKP) وئه‌ردوگانی نه، دراستڤه‌كرنا دستوری دا.
كێشا ئێكێ وكێشا هه‌ره سه‌ره‌كی ل توركییا پروسیسا ئاشتیێ و دانپێدان ب شێوه‌یه‌كێ فه‌رمی ب مافێن گه‌لێ كوردستانێ، هه‌ر چه‌نده ل ده‌مێ ده‌ستهه‌لاتا (AKP) پێنگاڤێن باش و ریێت به‌رفره ژی ل پێش كێشا كوردا ڤه‌بونه و زه‌مینه‌ك باش و گونجای ل پێش تورك و كوردا هه‌یه بو هندێ بشێن بێ ترس ئه‌ڤێ پرسا گرنگ و كه‌ڤنار چاره‌سه‌ر بكه‌ن، هه‌ر چه‌نده پرسه‌كا هوسا كه‌ڤنار و بێ چاره‌سه‌ری پێتڤی ب ده‌مه‌كێ درێژ هه‌یه و ب بهێن فرهه‌یه‌كا مه‌زن هه‌یه وه‌كو تورك، هه‌م كورد ژی پێتڤی ب بهێنفرهی ب و ل سه‌ر خوه وبرێكێن ئاشتیێ كێشا كوردی ل توركییا چاره‌سه‌ربكه‌ن، هه‌ر چه‌نده ناڤه‌ندا بریارا كوردی سێ كوژیه‌كێ یه(عبدالله ئوچه‌لان) رێبه‌رێ (PKK) و سه‌روكاتییا قه‌ندیل وپارتییا(HDP)ئه‌ڤ سێ ئالیه ژی هه‌ر ئێك دیتنه‌كا خوه هه‌یه ل هه‌مبه‌ر چاره‌سه‌رییا كێشا كوردان، ئه‌ڤێ چه‌ندێ ژی نه بتنێ بو كوردان به‌لكو بو توركا ژی و حكومه‌تا نوییا ئه‌ردوگانی ژی دێ كاره‌كێ پر زه‌حمه‌ت بیت.
به‌لێ دڤییا ڤێ جارێ ئاشتی و چاره‌سه‌رییا ئاشتیێ بژاردا ئێكێ بیت ل ده‌ڤ حكومه‌تا نو یا توركییا ودرێژه ب وان پێنگاڤێن ئاشتیێ بده‌تن، ڤێ جارێ راسته‌وخو توركییا دگه‌ل (عبدالله ئوجه‌لانی) سه‌روكێ (PKK) ب جڤیت، بو هندێ نه‌خشه‌رێیه‌كا چاره‌سه‌ریا پرسا كوردان دانن، ئه‌ڤه ژی پێنگاڤه‌كا دیروكی یا مه‌زنه بهێته هاڤێتن ژ لایێ حكومه‌تا نویا توركیا وسه‌روكێ توركییا (ره‌جه‌ب ته‌یب ئه‌ردوگان) ڤه، ل سه‌ر ده‌مێ ده‌ستهه‌لات دارییا وان دا ئه‌ڤ كێشا كه‌ڤنار و هه‌ستیار بهێته چاره‌سه‌ركرن، ئانكو پێتڤی یه ل سه‌ر توركییا چاره‌سه‌ریا كێشا كوردی بكه‌تن نه‌ك چاره‌سه‌رییا دیتنا لایه‌نه‌كێ سیاسی بكه‌ن ل سه‌ر پرسا كوردی، ڤێ جارێ وه‌كو كورد ئانكو هه‌می ئالیێن كوردی هه‌می حزب و هێزێن سیاسیێن كوردی ل توركیا دان وستاندن و روینشتنا ل سه‌ر كێشا كوردی بكه‌تن، چ لایه‌نا بتنێ نه‌كه‌تن نوێنه‌رێ كێشا كوردی.
خالا دووێ و هه‌ره گرنك ئه‌و ژی چاره‌نڤێسێ شێوێ حوكمرانی یه ل توركیا و چاره‌نڤیسێ دیموكراتییه ل ڤی وه‌لاتی، كو هیڤی و خه‌ونه‌كا كوێرا(AKP) و ئه‌ردوگانی بویه ل درێژاهییا سالێن ده‌ستهه‌لات داریا وێ دا، سیسته‌مێ ده‌ستهه‌لات داریێ ژ سیسته‌مێ په‌رله‌مانی بكه‌تن سیسته‌مێ سه‌روكاتیێ بو ڤێ چه‌ندێ (AKP) ڤێ جارێ ژی ب(317) كورسیكێن په‌رله‌مانێ نه‌شێت ڤی سیسته‌مێ ده‌ستهه‌لات داریێ بگوهوریت، به‌لكو پێتڤی ب هه‌ڤپه‌مانیا سیاسی هه‌بیت دگه‌ل ئێك ژ پارتێن سه‌ركه‌فتی، یان ژی ده‌نگێن په‌رله‌مانتارێن دێ كو هه‌مان بیركرن ددیتنا سیاسی دا هه‌بن بو شێوێ ده‌ستهه‌لات داریێ ل توركییا، هه‌ر چه‌نده گوهارتنا ده‌ستهه‌لات داریێ ژ سیسته‌مێ په‌رله‌مانی بو سیسته‌مێ سه‌روكاتیێ دوو دلی و نه‌ره‌حه‌تی ل ئالیه‌كێ هه‌یه، ل ئالیه‌كێ دیڤه ژی پێنگاڤه‌كا باشه بو پتر چه‌سپاندنا دیموكراتیه‌تێ و هێز و ڤه‌ژه‌نا ده‌وله‌تێ ل توركییا، دبیت ژی ئه‌و لایه‌نێن دوو دل و بترس ژ ڤێ پێنگاڤێ دیتنه‌كا ره‌وا بیت به‌لێ ب چ ره‌نگان ئه‌ڤ چه‌نده د خزمه‌تا توركیا نوی و رۆل و پێگه‌هێ وێ ناكه‌تن، ل جیهانێ ژی ل چه‌ندین وه‌لاتێن پێشكه‌فتیێن دونیایا دیموكراتی سیسته‌مێ سه‌روكاتی یه. له‌وانێ دبینن ئه‌ڤه پێنگاڤه‌ك بیت بو هندێ حكومه‌تا(AKP) ل داهاتیێ توركییا گه‌له‌ك پرسێن چاره‌نڤێساز و گرنك ئێك لایێ بكه‌تن.
پێشبینێ دكه‌ین ئه‌گه‌ر (AKP) ڤان دوو خالان چاره‌سه‌ر بكه‌تن ئاسویێن گه‌له‌ك مه‌زن ل پێش ڤی وه‌لاتی یه، ب تایبه‌تی چاره‌سه‌ركرنا پرسا كوردی، هه‌روه‌سا ته‌ڤگه‌را كوردستانێ و (HDP)، ده‌لیڤه‌یه‌كا باش دگه‌ل(AKP)هه‌یه كو بكه‌ڤیته د بازاری دا ل گوهارتنا دستوری دا و ل سیسته‌مێ حوكمرانییا توركیا دا، ( HDP) ماف و داخوازیێن كوردان وه‌كو مه‌رج بو وێ هه‌ڤكاریێ بكاربینیت دگه‌ل (AKP)دا كو دانپێدانێ ب شێوه‌یه‌كێ فه‌رمی و دستوری ب كێشا ره‌وایا گه‌لێ كوردستانێ بینیت.
