پشتی سەرەدانا سەرۆك بارزانی گوهۆڕین ل ئاكرێ دێ هێنە كرن
هەولێر، قائید میرۆ:
دەڤەردارێ ئاكرێ ب وەكالەت ئاشكرا كر، د دەمێ سەرەدانا خوە دا ژ بۆی ئاكرێ، وەلاتیان چەندین داخوازی پێشكێشی سەرۆك بارزانی كرن، ژ وان ژی: لێدانا تۆنێلەكێ ل چیایێ پیرس و ئیدارەیا سەربخوە یا ئاكرێ و دبێژیت: ئەم پشتڕاستین پشتی سەرەدانا سەرۆك بارزانی گوهۆڕین دێ هێنە كرن و ئەڤا د شیان دا بیت بۆ ئاكرێ دێ هێتە كرن.
شەعبان بەرواری، دەڤەردارێ ئاكرێ ب وەكالەت دیار كر، دەمێ سەرۆك بارزانی سەرەدانا دەڤەرداریا ئاكرێ كری، چەندین كۆمبوون ل گەل تەخ و چینێن ئاكرێ ئەنجامدان و تێدا خەلكێ ئاكرێ داخوازیێن خوە پێشكێشی سەرۆك بارزانی كرن و گۆت: «سەرۆك بارزانی سۆز دایە ئەڤان داخوازیان بدەتە حوكمەتا هەرێما كوردستانێ و ئەڤا د شیان دا بیت بۆ ئاكرێ بهێتە كرن، ئەم پشتڕاستین پشتی سەرەدانا سەرۆك بارزانی گوهۆڕین ل ئاكرێ دێ هێنە كرن و ئەو داخوازیێن ژ سەرۆك بارزانی هاتینە كرن، پێداچوون دێ بۆ هێتە كرن».
ل دۆر وان داخوازیێن ئاكرێ شەعبان بەرواری گۆت: «خەلكێ ئاكرێ داخواز كریە پێداچوونێ ب رێك و پرێن ئاكرێ بهێتە كرن، ژ وان ژی: رێیا گەلیێ زنتا و كانیتۆزێ و دۆڕیانا ئالەیێ و چەندین پڕۆژەیێن دی یێن خزمەتگوزاری، هەروەسا لێدانا تۆنێلەكێ ل چیایێ پیرس بۆ دەڤەرا بارزان، داخوازیەكا دیا خەلك و نوونەرێن ئاكرێ ژ سەرۆك بارزانی ئەو بوو ئاكرێ ببیتە ئیدارەیا سەربخوە».
