پشتی فشارێن ئەمریکا هەلوەستێ شامێ ژی هاتیە گوهۆڕین
ب، سه‌رجان مەحمود:
بەرپرسەکێ ئەمریکی دیار دکەت شاندەکێ وان بەری دو رۆژان ل شامێ ل گەل ئەحمەد شەرعی و مەزلوم عەبدی کۆمبووینە و شاندێ ئەمریکی داخواز ژ شامێ کریە هەلوەستێ خوە ل هەمبەر کوردان و دورزیان بگوهۆڕن و نها شام ژی رازیە سیستەمێ بهێت یێ سووریێ نە ناڤەندی بیت.
جۆ ویلسۆن ئێک ژ بەرپرسێن ئەمریکا و ئەندامێ شاندێ ئەمریکا کو بەری چەند رۆژان سەرەدانا شامێ کربوو بۆ رۆژنامەیا واشنتۆن پۆست یا وی وەلاتی دیار کریە، وەکو شاندەکێ سێ کەسی کو تۆم باراک ژی پشکدار بوویە ل گەل ئەحمەد شەرع سەرۆک کۆمارێ سووریێ کۆمبووینە و د کۆمبوونێ دا شاندێ ئەمریکا ب رەنگەکێ ئاشکرا ژ بۆ ئەحمەد شەرعی دیار کرینە، ئەمریکا پشتەڤانیێ ل سیستەمەک ناڤەندی ژ بۆ سووریێ ناکەت، چونکی پشتی روودانێن ل سوەیدا و کوشتنا پتر ژ هزار وەلاتیێن سڤیل نها رایا گشتی وەکو جاران پشتەڤانیێ ل دەستهەلاتا شامێ ناکەت و ژ بەر ڤێ یەکێ ژی دڤێت شام ل گەل کوردان و دورزیان دانوستاندنان بکەت و هەموو پرسێن هەی ژی چارەسەر بکەت، هەکە شام تشتەک وەسا نەکەت دبیت ل سووریێ شەڕەک ناڤخوەیی روو بدەت و ئەو یەک دێ بیتە ئەگەرێ روودانا کارەساتێن مەزن.
هەمان بەرپرسی ئەو یەک ژی دیار کریە، نها هەلوەستێ شامێ ژی ژ بۆ سیستەمێ نوو یێ سووریێ هاتیە گوهۆڕین، شام بەرهەڤە گوهداریا داخوازیێن کوردان و دورزیان بکەت، لێ ئەحمەد شەرعی دیار کریە ئەو ب چو رەنگەکێ رێ نادەن کار بۆ پارچەبوونا سووریێ بهێتە کرن، دڤێت سووریا نوو یا ئێکگرتی بیت، لێ د هەمان دەمی دا ئەو وەکو دەستهەلاتا نوو یا سووریێ بەرهەڤن ل گەل کوردان و دورزیان دانوستاندنان بکەن و گوهداریا داخوازیێن وان بکەن.
بەرپرسێ ئەمریکی ئاماژە ب ڤێ یەکێ ژی کریە، شاندێ ئەمریکی ل گەل مەزلوم عەبدی ژی کۆمبووینە و تێدا عەبدی دیار کریە ئەو ل دژی پارچەکرنا سووریێ نە، لێ دڤێت کورد ل سووریێ بگەهنە مافێن خوە، هەروەسا ئەمریکا د چەند رۆژێن بۆری دا چەکێن نوو و مۆدێرن داینە هەسەدێ و ئەمریکا دێ بەردەوام پشتەڤانیێ ل هەسەدێ کەت، نها ئەمریکا هژمارەک ژ هێزێن خوە ژ ئیراقێ ڤەکێشاینە و ل باکورێ سووریێ ئانکو ل دەڤەرێن ل ژێر دەستهەلاتا هەسەدێ بجه کرینە و ئەمریکا دڤێت زێدەتر ژ جاران هاریکاریا هەسەدێ بکەت.
ل ئالیێ دی شێخ حیکمەت هەجەری سەرۆکی رۆحانی یێ دورزیان ژی د داخویانیەکێ دا داخواز ژ وەلاتێن جیهانێ کر، کو پشتەڤانیێ ل هەرێمەکا دورزیان ل سووریێ بکەن، چونکی دەستهەلاتا نوو یا شامێ دڤێت ب هەر رەنگێ هەی دورزیان ژناڤ ببەت، ژ بەر ڤێ یەکێ ژی وان لەشکرێ خوە ئاڤا کرینە و داخواز ژ وەلاتێن جیهانێ دکەن پشتەڤانیێ ل دورزیان بکەن و رێ نەدەن جارەکا دی شام ئێرشی سوەیدا بکەت، گرنگە وەلاتێن جیهانێ پشتەڤانیێ ل دورزیان بکەن، ئاڤاکرنا هەرێمەکێ بۆ دورزیان بۆ پاراستنا وان ل هەمبەر هەر ئێرشەکێ گەلەک یا گرنگە.
