پشتی كارابوونا په‌رله‌مانی دێ لێبۆرینا گشتی هێته ئێكلا كرن
هەولێر، قائید میرۆ:
ڕێڤه‌به‌را گشتییا قانوونا ل ده‌سته‌یا سه‌ربخۆیا مافێ مرۆڤی دیار کر، بابه‌تێ لێبۆرینا گشتی ئه‌ركێ په‌رله‌مانێ كوردستانێ یه و گۆت: ئه‌م چاڤه‌ڕێی ده‌ست بكاربوونا په‌رله‌مانی دكه‌ین بۆ ده‌ركرنا قانوونه‌كێ، ل خۆلا بۆری یا په‌رله‌مانێ كوردستانێ پڕۆژه‌یه‌ك هاتیه به‌رهه‌ڤكرن و دانوستاندن ژی لسه‌ر هاتینه كرن.
تاڤگه عومه‌ر، رێڤه‌به‌را گشتی یا مافێ مرۆڤی بۆ رۆژناما ئه‌ڤرۆ دیار كر، بابه‌تێ لێبۆرینا گشتی پێدڤیه ب قانوونێ بهێته رێكخستن و ده‌ركرن، ده‌ركرنا قانوونان ژی ئه‌ركێ په‌رله‌مانێ كوردستانێ یه، ل خۆلا بۆری یا په‌رله‌مانێ كوردستانێ چه‌ندین دانوستان لدۆر بابه‌تێ لێبۆرینا گشتی هاتینه كرن و گۆت: ( ده‌سته‌یا گشتی یا سه‌ربخۆیا مافێ مرۆڤی ژی لسه‌ر ئاستێ سه‌رۆكێ ده‌سته‌یێ پشكداری كۆمبوونێن تایبه‌ت ب لێبۆرینا گشتی كر و سیاسه‌تا ده‌سته‌یا مافێ مرۆڤی لدۆر ده‌ركرنا قانوونا لێبۆرینا گشتی ئاشكرا كر).
ڕێڤەبەرا گشتی یا مافێ مروڤی د بەردەوامیا ئاخفتنێن خودا گۆت: (به‌لێ چونكی لێبۆرینا گشتی گرێدایی ده‌ستهه‌لاتێن په‌رله‌مانی یه، پێدڤیه ئه‌م چاڤه‌ڕێی ده‌ست بكاربوونا ئه‌ڤێ خۆلا په‌رله‌مانێ كوردستانێ بكه‌ین، ئه‌و پڕۆژێ به‌ری نوكه هاتیه به‌رهه‌ڤكرن یان ژی هەکە پڕۆژێن دی هه‌بن ڤه‌خواندنێ بۆ بكه‌ت و بهێته په‌سه‌ند كرن، واته په‌رله‌مان دێ بڕیارێ لدۆر لێبۆرینا گشتی ده‌ت و ئەڤە بتنێ دده‌ستهه‌لاتا په‌رله‌مانێ كوردستانێ یه).
تاڤگه عومه‌ر دا زانین کو ئێك ژ ئه‌ركێن ده‌سته‌یا مافێ مرۆڤی ل گوره‌ی قانوونا ژماره چوار یا سالا 2010ــێ ده‌سته‌یا مافێ مرۆڤی شیان هه‌نه پێداچوونێ بو هه‌موو وان پڕۆژه قانوونان بكه‌ت یێن كو هه‌ست دكه‌ت بنپێكرن تێدا هه‌نه و دشێت پڕۆژه قانوونێن گونجایی و یێن راستڤه‌كری ژی بده‌ته په‌رله‌مانێ كوردستانێ و گۆت: (چونكی ئه‌ڤه ئێكه ژ تایبه‌تمه‌ندیێن ده‌سته‌یا سه‌ربخۆیا مافێ مرۆڤی، بۆچوونا مه وه‌ك ده‌سته بۆچوونه‌كا ئیلزامیه و ل گوره‌ی قانوونێ هه‌ر بابه‌ته‌كێ سه‌نه‌دێ قانوونی هه‌بیت پالپشتیه‌كه بۆ ده‌سته‌یا مافێ مرۆڤی کو بۆچوونا خۆ لسه‌ر بده‌ت).
